ನೇಪಾಳದಲ್ಲಿ ಬಾಂಬ್ ಸ್ಫೋಟ: 8 ಮಂದಿಗೆ ಗಾಯ

ಕಠ್ಮಂಡು: ನೇಪಾಳದ ಸಿಹಾರಾ ಜಿಲ್ಲೆಯ ಜನನಿಬಿಡ ಸರ್ಕಾರಿ ಕಚೇರಿಯೊಂದರಲ್ಲಿ ಭಾನುವಾರ ಪ್ರೆಷರ್‌ ಕುಕ್ಕರ್ ಬಾಂಬ್‌ ಸ್ಫೋಟಿಸಿದ್ದರಿಂದ ಕನಿಷ್ಠ ಎಂಟು ಮಂದಿ ಗಾಯಗೊಂಡಿದ್ದಾರೆ.

ಭೂ ಕಂದಾಯ ಕಚೇರಿಯ ಮೊದಲ ಮಹಡಿಯಲ್ಲಿ ಈ ಸ್ಫೋಟ ಸಂಭವಿಸಿತು. ಗಾಯಗೊಂಡವರೆಲ್ಲ ಕಂದಾಯ ಇಲಾಖೆಯ ಸಿಬ್ಬಂದಿ. ಇವರಲ್ಲಿ ಐವರು ಪುರುಷರು ಮತ್ತು ಮೂವರು ಮಹಿಳೆಯರು ಸೇರಿದ್ದಾರೆ. ಮೂವರ ಸ್ಥಿತಿ ಗಂಭೀರವಾಗಿದೆ ಎಂದು ಸಹಾಯಕ ಮುಖ್ಯ ಜಿಲ್ಲಾ ಅಧಿಕಾರಿ ಕೃಷ್ಣ ಕುಮಾರ್ ನಿರೌಲಾ ತಿಳಿಸಿದ್ದಾರೆ ಎಂಧು ‘ದಿ ಕಠ್ಮಂಡು ಪೋಸ್ಟ್‌’ ವರದಿ ಮಾಡಿದೆ.

ಘಟನಾ ಸ್ಥಳದಿಂದ ಜನತಾಂತ್ರಿಕ್‌ ತೆರೈ ಮುಕ್ತಿ ಮೋರ್ಚಾ (ಕ್ರಾಂತಿಕಾರಿ) ಸಂಘಟನೆಗೆ ಸೇರಿದ ಭಿತ್ತಿಪತ್ರಗಳನ್ನು ವಶಕ್ಕೆ ಪಡೆದಿರುವುದಾಗಿ ಪೊಲೀಸರು ತಿಳಿಸಿದ್ದಾರೆ