ಭಾರತದೊಂದಿಗೆ ಸೇನಾ ಒಪ್ಪಂದಕ್ಕೆ ರಷ್ಯಾ ತಯಾರಿ

ಪಿಟಿಐ

ಮಾಸ್ಕೊ: ಭಾರತದೊಂದಿಗೆ ಮಾಡಿಕೊಂಡಿರುವ ಸೇನಾ ಒಪ್ಪಂದಕ್ಕೆ ಅನುಮೋದನೆ ನೀಡಲು ರಷ್ಯಾ ಸಂಸತ್‌ ತಯಾರಿ ನಡೆಸಿದೆ. ಅಧ್ಯಕ್ಷ ವ್ಲಾದಿಮಿರ್‌ ಪುಟಿನ್‌ ಅವರು ಡಿ.4 ಮತ್ತು 5ರಂದು ಭಾರತಕ್ಕೆ ಭೇಟಿ ನೀಡುತ್ತಿರುವ ಈ ಹೊತ್ತಿನಲ್ಲಿ ಈ ಪ್ರಕ್ರಿಯೆ ಆರಂಭವಾಗಿದೆ ಎಂದು ವರದಿಯಾಗಿದೆ.

ಮಾಸ್ಕೊದಲ್ಲಿರುವ ಭಾರತ ರಾಯಭಾರಿ ವಿನಯ್‌ ಕುಮಾರ್‌ ಮತ್ತು ರಷ್ಯಾದ ಉಪ ರಕ್ಷಣಾ ಸಚಿವ ಅಲೆಕ್ಸಾಂಡರ್‌ ಫೋಮಿನ್‌ ಅವರು ಒಪ್ಪಂದಕ್ಕೆ ಫೆಬ್ರುವರಿ 18ರಂದು ಸಹಿ ಹಾಕಿದ್ದರು. ಈ ಒಪ್ಪಂದವು ಎರಡೂ ದೇಶಗಳ ಮಧ್ಯೆ ವಿಪತ್ತು ನಿರ್ವಹಣೆ, ಸಮರಾಭ್ಯಾಸ ಸೇರಿದಂತೆ ಹಲವು ಕ್ಷೇತ್ರಗಳಲ್ಲಿ ಪರಸ್ಪರ ಸಹಕಾರ ಹೆಚ್ಚಿಸುವ ಅಂಶಗಳನ್ನು ಒಳಗೊಂಡಿತ್ತು.

‘ಭಾರತದ ತಲ್ವಾರ್‌ ಸರಣಿಯ ಲಘು ಯುದ್ಧನೌಕೆ ಮತ್ತು ಯುದ್ಧ ವಿಮಾನ ಸಾಗಣೆಗೆ ಬಳಸುವ ಐಎನ್‌ಎಸ್‌ ವಿಕ್ರಮಾದಿತ್ಯ ನೌಕೆಯು ಆರ್ಟಿಕ್‌ ಸಾಗರದಲ್ಲಿ ಸಮುದ್ರದ ನೀರು ಮಂಜುಗಡ್ಡೆಯಾಗಿರುವಾಗ ರಷ್ಯಾದ ಸೇನಾ ನೆಲೆಯನ್ನು ಬಳಕೆ ಮಾಡಿಕೊಳ್ಳಲು ಈ ಒಪ್ಪಂದ ಅನುವು ಮಾಡಿಕೊಡಲಿದೆ. ಹಿಂದೂ ಮಹಾಸಾಗರ ಪ್ರದೇಶದಲ್ಲಿ ಚೀನಾ ಮತ್ತು ಇತರ ದೇಶಗಳ ಪ್ರಾಬಲ್ಯವನ್ನು ತಡೆಯಲು ರಷ್ಯಾವು ಭಾರತದ ಸೌಕರ್ಯಗಳನ್ನು ಬಳಸಿಕೊಳ್ಳಲು ಈ ಒಪ್ಪಂದ ನೆರವಾಗಲಿದೆ’ ಎಂದು ತಜ್ಞರ ಹೇಳಿದರು.