ಕೀವ್‌ ಸೇರಿದಂತೆ ಉಕ್ರೇನ್‌ನ ಹಲವು ನಗರಗಳಲ್ಲಿನ ಸೇನಾ ನೆಲೆ ನಾಶ: ರಷ್ಯಾ

ಮಾಸ್ಕೋ: ಉಕ್ರೇನ್‌ನ ಕೀವ್‌ ಹಾಗೂ ಜಪೋರಿಝಿಯಾ ಪ್ರಾಂತ್ಯದಲ್ಲಿನ ಸೇನಾ ನೆಲೆಗಳ ಮೇಲೆ ಸೋಮವಾರ ತಡರಾತ್ರಿ ಭಾರಿ ಪ್ರಮಾಣದ ದಾಳಿ ನಡೆಸಲಾಗಿದೆ ಎಂದು ರಷ್ಯಾದ ರಕ್ಷಣಾ ಸಚಿವಾಲಯವು ಮಂಗಳವಾರ ತಿಳಿಸಿದೆ.

ರಷ್ಯಾ ಸೇನೆಯು ಹೆಚ್ಚಿನ ನಿಖರತೆ ಹೊಂದಿರುವ ವಾಯು, ಭೂ ಹಾಗೂ ನೌಕಾ ಪಡೆಯ ಆಯುಧಗಳನ್ನು ಬಳಸಿಕೊಂಡು ಸೇನಾ ಶಿಬಿರಗಳನ್ನು ಗುರಿಮಾಡಿಕೊಂಡು ಏಕಕಾಲದಲ್ಲಿ ದಾಳಿಮಾಡಿದೆ. ಇದರಲ್ಲಿ ಡ್ರೋನ್‌ಗಳನ್ನು ಕೂಡ ಬಳಸಿಕೊಳ್ಳಲಾಗಿದ್ದು, ದಾಳಿಯಲ್ಲಿ ನಿಗದಿತ ಗುರಿಗಳನ್ನು ನಾಶಮಾಡಲಾಗಿದೆ ಎಂದು ಹೇಳಿದೆ.

ಸೋಮವಾರ ತಡರಾತ್ರಿ ನಡೆದ ಕ್ಷಿಪಣಿ ಹಾಗೂ ಡ್ರೋನ್ ದಾಳಿಯಲ್ಲಿ ಕನಿಷ್ಠ 15 ಜನರು ಮೃತಪಟ್ಟಿರುವುದಾಗಿ ಉಕ್ರೇನ್‌ ತಿಳಿಸಿದೆ.