ಸಂಭಾವ್ಯ ದೂರಸಂಪರ್ಕ ದಾಳಿ ತಡೆದ ಅಮೆರಿಕ

ನ್ಯೂಯಾರ್ಕ್‌: ನ್ಯೂಯಾರ್ಕ್‌ನ ದೂರಸಂಪರ್ಕ ಜಾಲವನ್ನು ಸ್ಥಗಿತಗೊಳಿಸಬಹುದಾದ ಒಂದು ಲಕ್ಷಕ್ಕೂ ಹೆಚ್ಚು ಸಿಮ್‌ಕಾರ್ಡ್‌ಗಳ ಜಾಲವನ್ನು ಕಿತ್ತುಹಾಕಿರುವುದಾಗಿ ಅಮೆರಿಕ ಸೀಕ್ರೇಟ್‌ ಸರ್ವೀಸ್‌ ಮಂಗಳವಾರ ತಿಳಿಸಿದೆ.

ವಿಶ್ವಸಂಸ್ಥೆಯ ಸಾಮಾನ್ಯ ಸಭೆಗೂ ಮುನ್ನ ಈ ಕಾರ್ಯ ಮಾಡಿರುವುದಾಗಿ ಅದು ಹೇಳಿದೆ. ದೇಶ ಮತ್ತು ಸರ್ಕಾರಕ್ಕೆ ಇದರಿಂದ ಬೆದರಿಕೆ ಎದುರಾಗುವ ಸಾಧ್ಯತೆಯಿತ್ತು. ಹೀಗಾಗಿ ತ್ವರಿತವಾಗಿ ಕ್ರಮಗಳನ್ನು ತೆಗೆದುಕೊಳ್ಳಲಾಯಿತು ಎಂದು ಅದು ಹೇಳಿದೆ. 

ಅನಾಮಧೇಯ ಕರೆಗಳ ಮೂಲಕ ಬರಬಹುದಾದ ಬೆದರಿಕೆಗಳು ಮತ್ತು ದೂರಸಂಪರ್ಕ ದಾಳಿ ಸಾಧ್ಯತೆಗಳನ್ನು ಈ ಮೂಲಕ ತಡೆಯಲಾಗಿದೆ ಎಂದು ಅದು ವಿವರಿಸಿದೆ.

ವಿಶ್ವಸಂಸ್ಥೆಯ ಸಾಮಾನ್ಯ ಸಭೆ ನಡೆಯುವ ಸ್ಥಳದಿಂದ 56 ಕಿ.ಮೀ. ದೂರದಲ್ಲಿ ಈ ಸಾಧನಗಳನ್ನು ವಶಪಡಿಸಿಕೊಳ್ಳಲಾಗಿದೆ ಎಂದು ಅದು ಮಾಹಿತಿ ನೀಡಿದೆ. ವಶಪಡಿಸಿಕೊಂಡಿರುವ ಸಾಧನಗಳನ್ನು ವಿಧಿವಿಜ್ಞಾನ ಪರೀಕ್ಷೆಗೆ ಒಳಪಡಿಸಿ, ಸಮಗ್ರ ತನಿಖೆ ನಡೆಸಲಾಗುವುದು ಎಂದು ಅದು ಹೇಳಿದೆ.