ಯುರೋಪ್‌ನಲ್ಲಿ ಒಂದು ವಾರದಲ್ಲಿ ಸೋಂಕು ಶೇ 18ರಷ್ಟು ಹೆಚ್ಚಳ: ಡಬ್ಲ್ಯುಎಚ್‌ಒ

ಜಿನಿವಾ: ಕೊರೊನಾ ವೈರಸ್‌ ಸೋಂಕು ಮತ್ತು ಸೋಂಕು ಸಂಬಂಧಿತ ಸಾವುಗಳು ಕಳೆದ ವಾರ ಯೂರೋಪ್‌ನಲ್ಲಿ ಹೆಚ್ಚಿನ ಪ್ರಮಾಣದಲ್ಲಿ ವರದಿಯಾಗಿವೆ ಎಂದು ವಿಶ್ವ ಆರೋಗ್ಯ ಸಂಸ್ಥೆ ಹೇಳಿದೆ.

53-ದೇಶಗಳ ಯುರೋಪ್‌ನಲ್ಲಿ ಕಳೆದ ವಾರ ಕೋವಿಡ್‌ ಪ್ರಕರಣಗಳಲ್ಲಿ ಶೇ 18 ರಷ್ಟು ಹೆಚ್ಚಳ ಕಂಡು ಬಂದಿದೆ. ಅಷ್ಟೇ ಅಲ್ಲ. ಸತತ ನಾಲ್ಕನೇ ವಾರವೂ ಸೋಂಕು ಹೆಚ್ಚಳವಾಗಿದೆ ಎಂದು ಆರೋಗ್ಯ ಸಂಸ್ಥೆ ತಿಳಿಸಿದೆ.

ಇದೇ ವೇಳೆ ಯುರೋಪ್‌ನಲ್ಲಿ ಕೋವಿಡ್‌ ಸಂಬಂಧಿತ ಸಾವು ಪ್ರಕರಣಗಳಲ್ಲಿಯೂ ಶೇ 14ರಷ್ಟು ಹೆಚ್ಚಳವಾಗಿದೆ.

ಕಳೆದ ವಾರ ಅಲ್ಲಿ 16 ಲಕ್ಷ ಪ್ರಕರಣಗಳು ಪತ್ತೆಯಾದರೆ, 21,000 ಕ್ಕೂ ಹೆಚ್ಚು ಸಾವುಗಳು ಸಂಭವಿಸಿವೆ ಎಂದು ಕೋವಿಡ್‌ ಕುರಿತ ಡಬ್ಲ್ಯುಎಚ್‌ಒದ ಸಾಂಕ್ರಾಮಿಕ ರೋಗಶಾಸ್ತ್ರದ ಸಾಪ್ತಾಹಿಕದಲ್ಲಿ ದಾಖಲಿಸಲಾಗಿದೆ.