ಸರ್ವಋತು ಸಮ್ಮೊಹಿನಿ

ಹೆಂಡತಿ ಮೋಹವ ಕರಗಿಸಲೆಂದೇ ಹುಟ್ಟಿದಳು ಮಗಳು
ಈ ಭವ ದಾಹವ ಮೆರುಗಿಸಲೆಂದೇ ಹುಟ್ಟಿದಳು ಮಗಳು

ಹೆಣ್ಣಿನ ಮಹತಿಯ ತಿಳಿಸಲು ಎಂದೇ ಹೆಣ್ಣಾದಳು ಮಗಳು
ಪೊರೆಗಳ ಹರಿದು ಹೊಸಲೋಕ ಕಾಣಿಸಿದ ಕಣ್ಣಾದಳು ಮಗಳು

ಮುಗ್ಧತೆ ಬೀಜವ ಮತ್ತೆ ಎದೆ ಹೊಲದಿ ನಾಟಿದಳು ಇವಳು
ಉರುಳಿದ ಬಾಲ್ಯವ ಮರಳಿಸಿ ಹುಚ್ಚನು ಕೆರಳಿಸಿದಳು ಇವಳು

ಹಸಿವು, ನಿದ್ದೆ, ನೀರಡಿಕೆಯನೂ ಮರೆಸಿದಳು ಇವಳು
ಕಣ್ಣಿನ ಗಾಯಕೆ ಕನ್ನಡಿ ಹಿಡಿದು ಕಣ್ತೆರಸಿದಳಿವಳು

ನನ್ನ ಜೀವವೇ  ನದಿಯಾದಂತೆ  ಜುಳು ಜುಳು  ಹರಿದಿಹಳು
ನನ್ನನು ಅಪ್ಪನ ಮಾಡಿ ಮೆರೆಯಿಸಿದ ನನ್ನಮ್ಮಳು ಇವಳು