ಶುಕ್ರವಾರ, 14-12-1962

ರಷ್ಯದ ಬೆಂಬಲಕ್ಕೆ ಪಾಕಿಸ್ತಾನದ ಯತ್ನ
ನವದೆಹಲಿ, ಡಿ. 13 - ಕಾಶ್ಮೀರ ವಿವಾದದಲ್ಲಿ ರಷ್ಯವು ಪಾಕಿಸ್ತಾನಕ್ಕೆ ಬೆಂಬಲ ಕೊಡಬೇಕೆಂದೂ, ಹಾಗೆ ಮಾಡಿದರೆ ತಾನು ಆಗ್ನೇಯ ಏಷ್ಯ ಕೌಲು ಕೂಟ (`ಸೀಟೊ') ಮತ್ತು ಮಧ್ಯ ಏಷ್ಯ ಕೌಲು ಕೂಟ (`ಸೆಂಟೊ') ಗಳಿಂದ ತಾನು ಹೊರಕ್ಕೆ ಬರುವುದಾಗಿಯೂ ಪಾಕಿಸ್ತಾನವು ರಷ್ಯಕ್ಕೆ ತಿಳಿಸಿದೆಯೆಂದು ಗೊತ್ತಾಗಿದೆ.

ಕೆಲವು ರಕ್ಷಣಾ ವಸ್ತುಗಳ ಉತ್ಪಾದನೆ ಖಾಸಗಿ ವಲಯಕ್ಕೆ?
ನವದೆಹಲಿ, ಡಿ. 13 - ರಕ್ಷಣಾ ಅವಶ್ಯಕತೆಯ ವಸ್ತುಗಳಲ್ಲಿ ಕೆಲವನ್ನು ಖಾಸಗಿ ವಲಯದ ಕೈಗಾರಿಕೆಗಳು ತಯಾರಿಸಲು ಸ್ಥೂಲವಾದ ಒಡಂಬಡಿಕೆಯೊಂದು ಖಾಸಗಿ ವಲಯದ ಪ್ರತಿನಿಧಿಗಳ ಮತ್ತು ಅರ್ಥಿಕ ರಕ್ಷಣಾ ಸಮನ್ವಯ ಕಾರ್ಯದರ್ಶಿ ಶ್ರೀ ಎಸ್. ಭೂತಲಿಂಗಂರವರ ಸಭೆಯೊಂದರಲ್ಲಿ ಈ ದಿನ ಆಯಿತೆಂದು ಗೊತ್ತಾಗಿದೆ.