25 ವರ್ಷಗಳ ಹಿಂದೆ: ಸೋಮವಾರ 25.5.1998

ಆರ್ಥಿಕ ದಿಗ್ಬಂಧನ: ಕಹಿ ಆಗಲಿರುವ ಬಜೆಟ್

ನವದೆಹಲಿ, ಮೇ 24 (ಪಿಟಿಐ)– ಭಾರತದ ವಿರುದ್ಧ ಕೆಲವು ದೇಶಗಳು ದಿಗ್ಬಂಧನ ವಿಧಿಸಿರುವುದರಿಂದ ಜೂನ್ 1ರಂದು ಮಂಡನೆಯಾಗುವ ಕೇಂದ್ರದ ಬಿಜೆಪಿ ಮೈತ್ರಿಕೂಟದ ಮೊದಲ ಬಜೆಟ್ ಭಾರಿ ಹೊರೆಯಾಗಿರುವ ಸಾಧ್ಯತೆ ಇದೆ.

ದಿಗ್ಬಂಧನದ ಪ್ರಮಾಣ ಸುಮಾರು 5 ಸಾವಿರ ಕೋಟಿ ರೂಪಾಯಿಗಳೆಂದು ಅಂದಾಜಿಸಲಾಗಿದ್ದು, ಈ ಹಣವನ್ನು ಬಜೆಟ್‌ನಲ್ಲಿ ಒದಗಿಸಬೇಕಾಗಿರುವುದರಿಂದ ಕೆಲವು ಕಠಿಣ ಕ್ರಮಗಳನ್ನು ತೆಗೆದುಕೊಳ್ಳುವುದು ಅನಿವಾರ್ಯವಾಗಬಹುದು ಎಂಬ ಇಂಗಿತವನ್ನು ಕೇಂದ್ರ ಹಣಕಾಸು ಸಚಿವ ಯಶವಂತ ಸಿನ್ಹಾ ಅವರು ವ್ಯಕ್ತಪಡಿಸಿದ್ದಾರೆ.

ಸಂಪನ್ಮೂಲ ಸಂಗ್ರಹಣೆ ಕೊರತೆ, ತೀವ್ರ ಆರ್ಥಿಕ ಬಿಕ್ಕಟ್ಟಿನಿಂದಾಗಿ ಬಜೆಟ್ ಇನ್ನಷ್ಟು ಕಹಿಯಾಗುವ ಸಾಧ್ಯತೆ ಇದೆ. ಭಾರತ ಐದು ಅಣ್ವಸ್ತ್ರ ಸಾಧನ ಪರೀಕ್ಷೆ ನಡೆಸಿದ್ದರಿಂದ ಅಮೆರಿಕ ಮತ್ತು ಜಪಾನ್ ಸೇರಿದಂತೆ ಹಲವಾರು ದೇಶಗಳು ಭಾರತದ ವಿರುದ್ಧ ದಿಗ್ಬಂಧನ ವಿಧಿಸಿವೆ. ಇದರಿಂದಾಗಿ ಕೇಂದ್ರ ಸರ್ಕಾರಕ್ಕೆ ಬಜೆಟ್‌ಗೆ ಅಂತಿಮ ರೂಪ ನೀಡುವುದೇ ಕಷ್ಟವಾಗಿದೆ.