50 ವರ್ಷಗಳ ಹಿಂದೆ: ಗುರುವಾರ, 26–11–1970

18 ವರ್ಷದವರಿಗೆ ಮತದಾನದ ಹಕ್ಕು
ನವದೆಹಲಿ, ನ. 25– ಮತದಾನದ ವಯೋಮಿತಿಯನ್ನು 21ರಿಂದ 18 ವರ್ಷಗಳಿಗೆ ಇಳಿಸಲು ಲೋಕಸಭೆಯ ಅರ್ಜಿಗಳ ಸಮಿತಿ ಶಿಫಾರಸು ಮಾಡಿದೆ.

ಈ ಸೂಚನೆಯ ವಿರುದ್ಧ ಪ್ರಬಲವಾದ ವಾದಗಳಿದ್ದರೂ 18 ವರ್ಷಕ್ಕಿಂತ ಹೆಚ್ಚು ವಯಸ್ಸಿನವರಿಗೆ ಮತದಾನದ ಹಕ್ಕನ್ನು ನಿರಾಕರಿಸಲು ಸರಿಯಾದ ಕಾರಣವೇ ಇಲ್ಲ ಎಂದು ಇಂದು ಲೋಕಸಭೆಯಲ್ಲಿ ಮಂಡಿಸಿದ 9ನೇ ವರದಿಯಲ್ಲಿ ತಿಳಿಸಲಾಗಿದೆ.

ಐರೋಪ್ಯ ಕಾನ್ವೆಂಟುಗಳಿಗೆ ಸ್ವಂತ ಇಚ್ಛೆಯಿಂದ ಕೇರಳ ಕನ್ಯೆಯರು
ನವದೆಹಲಿ, ನ. 25– ಐರೋಪ್ಯ ಕಾನ್ವೆಂಟುಗಳಲ್ಲಿ ಕೆಲಸ ಮಾಡುತ್ತಿರುವ ಭಾರತೀಯ ಯುವತಿಯರು ಸ್ವಸಂಕಲ್ಪ ದಿಂದ ಅಲ್ಲಿಗೆ ಹೋಗುತ್ತಿದ್ದಾರೆ ಎಂಬುದು– ವಿದೇಶಗಳಲ್ಲಿ ಭಾರತದ ನಿಯೋಗಗಳು ನಡೆಸಿರುವ ತನಿಖೆಗಳಿಂದ ಕಂಡುಬಂದಿರುವ ಸಂಗತಿ.

ವಿದೇಶಾಂಗ ಸಚಿವ ಸ್ವರಣ್ ಸಿಂಗರು ಈ ವಿಷಯವನ್ನು ಇಂದು ರಾಜ್ಯಸಭೆಗೆ ತಿಳಿಸುತ್ತಾ, ಆ ಯುವತಿಯರನ್ನು ಚೆನ್ನಾಗಿ ನೋಡಿಕೊಳ್ಳಲಾಗುತ್ತಿದೆ, ಅನಪೇಕ್ಷಿತ ನಿರ್ಬಂಧಗಳಾವುವೂ ಅವರ ಮೇಲಿಲ್ಲ ಎಂದು ಹೇಳಿದರು.

ಐರೋಪ್ಯ ಕಾನ್ವೆಂಟುಗಳಿಗೆ ಕೇರಳದ ಹುಡುಗಿಯರನ್ನು ಮಾರಾಟ ಮಾಡಲಾಗಿದೆಯೆಂಬ ಆರೋಪವನ್ನನುಸರಿಸಿ ತನಿಖೆಗಳನ್ನು ಮಾಡಲಾಯಿತು. ಹುಡುಗಿಯರನ್ನು ಕಂಡು ಅವರ ಸ್ಥಿತಿಗತಿಗಳ ಬಗ್ಗೆ ಸರ್ಕಾರಕ್ಕೆ ತಿಳಿಸಬೇಕೆಂದು ನಿಯೋಗಗಳಿಗೆ ಆದೇಶ ಕೊಡಲಾಯಿತು ಎಂದು ಮಾನ್‌ಸಿಂಗ್ ವರ್ಮರಿಗೆ ಅವರು ತಿಳಿಸಿದರು.