50 ವರ್ಷದ ಹಿಂದೆ | ಫಕ್ರುದ್ದೀನ್ ಅಲೀ ಅಹ್ಮದ್‌ ಭಾರತದ ನೂತನ ರಾಷ್ಟ್ರಪತಿ

ನವದೆಹಲಿ, ಆ. 20– ರಸ್ತೆಗಳು ಹಾಗೂ ಖಾಸಗಿ ಮತ್ತು ಸರ್ಕಾರಿ ಉದ್ಯಮ
ರಂಗಗಳೆರಡರಲ್ಲೂ ಅನವಶ್ಯಕ ಕಟ್ಟಡಗಳ ನಿರ್ಮಾಣಕ್ಕಾಗಿ ಸಿಮೆಂಟ್ ಬಳಸುವುದರ ಮೇಲೆ ಸರ್ಕಾರ ಇಂದು ಒಂದು ವರ್ಷ ಕಾಲ ಸಂಪೂರ್ಣ ನಿಷೇಧ ವಿಧಿಸಿತು.

ಈ ನಿಷೇಧಾಜ್ಞೆಯು ಮನೆಗಳ ನಿರ್ಮಾಣಕ್ಕೆ ಅನ್ವಯಿಸುವುದಿಲ್ಲ. ಆದರೆ ನಿರ್ಮಾಣಕಾರ್ಯ ಪ್ರಾರಂಭವಾಗದ ಅಥವಾ ಮೇಲುಪಾಯ ದಾಟಿ ಹೋಗದ ಕಚೇರಿ ಕಟ್ಟಡಗಳು, ನಾಟಕ ಮಂದಿರಗಳು, ಹೋಟೆಲುಗಳು ಹಾಗೂ ಅಂಗಡಿಗಳಿಗಾಗಿ ಸಿಮೆಂಟ್ ಬಳಕೆಯನ್ನು ಈ ಆಜ್ಞೆ ಪರಿಣಾಮಕಾರಿಯಾಗಿ ನಿಷೇಧಿಸುತ್ತದೆ.

ನವದೆಹಲಿ, ಆ. 20– ಕಾಂಗ್ರೆಸ್ ಅಭ್ಯರ್ಥಿ ಫಕ್ರುದ್ದೀನ್ ಅಲೀ ಅಹ್ಮದ್ ಅವರು ಭಾರಿ ಬಹುಮತದಿಂದ ಭಾರತದ ರಾಷ್ಟ್ರಪತಿಯಾಗಿ ಇಂದು ಆಯ್ಕೆ ಹೊಂದಿದರು.

ಅಹ್ಮದ್ ಅವರು ಶನಿವಾರ ರಾಷ್ಟ್ರಪತಿ ಭವನದಲ್ಲಿ ರಾಷ್ಟ್ರಪತಿಯಾಗಿ ಪ್ರಮಾಣ ವಚನ ಸ್ವೀಕರಿಸುವರು.

ಫಕ್ರುದ್ದೀನ್ ಅವರಿಗೆ ಶೇಕಡ 80.2ರಷ್ಟು ಮತಗಳು, ವಿರೋಧಿ ಅಭ್ಯರ್ಥಿಯಾದ ಕ್ರಾಂತಿಕಾರಿ ಸಮಾಜವಾದಿ ಪಕ್ಷದ ನಾಯಕ ತ್ರಿದೀಪ್ ಕುಮಾರ್ ಚೌಧರಿಯವರಿಗೆ ಶೇಕಡ 19.8ರಷ್ಟು ಮತಗಳು ಬಂದಿವೆ.