50 ವರ್ಷಗಳ ಹಿಂದೆ: ಭಾನುವಾರ 16-5-1971

ಪಕ್ಷದ ಅಧಿಕಾರ ಸ್ಥಾನಗಳಿಗೆ ‘ಹಳೇ ತಲೆಗಳ’ ಸ್ಪರ್ಧೆ ಇಲ್ಲ

ಮುನ್ಷಿನಗರ, ಮೇ 15– ಪಕ್ಷದ ‘ಹಳೇ ತಲೆಗಳು’ ಅಧ್ಯಕ್ಷ ಸ್ಥಾನವನ್ನೊಳಗೊಂಡು ಯಾವುದೇ ಚುನಾಯಿತ ಹುದ್ದೆಗಳಿಗೆ ಸ್ಪರ್ಧಿಸುವುದಿಲ್ಲವೆಂದು ಸಂಸ್ಥಾ ಕಾಂಗ್ರೆಸ್ಸಿನ ಅಧ್ಯಕ್ಷ ಎಸ್. ನಿಜಲಿಂಗಪ್ಪನವರು ಇಂದು ಇಲ್ಲಿ ಪಕ್ಷದ ಯುವಕರಿಗೆ ತಿಳಿಸಿದರು.

ಇದು ‘ತಮ್ಮ ಹಿರಿಯ ಸಹ ಕಾರ್ಯಕರ್ತರ ಭಾವನೆ ಮತ್ತು ಅಭಿಪ್ರಾಯವೆಂದು’ ವರ್ಣಿಸಿದ ನಿಜಲಿಂಗಪ್ಪನವರು ಈ ಮಹಾನ್ ಸಂಸ್ಥೆಯನ್ನು ನಡೆಸಿಕೊಂಡು ಹೋಗುವ ಹೊಣೆಗಾರಿಕೆಯನ್ನು ವಹಿಸಿಕೊಳ್ಳಲು ಸಮರ್ಥರಾಗುವಂತೆ ಯುವಕರಿಗೆ ತರಬೇತಿ ನೀಡುವುದರಲ್ಲಿ ಮಾತ್ರ ಪಕ್ಷದ ಹಿರಿಯರು ಆಸಕ್ತರಾಗಿದ್ದಾರೆಂದು ನುಡಿದರು.