25 ವರ್ಷಗಳ ಹಿಂದೆ: ಕಾಶ್ಮೀರ ಚರ್ಚೆಗೆ ಹಿಜಬುಲ್‌ನ ಮೂವರ ನಿಯೋಗ

ಕಾಶ್ಮೀರ ಚರ್ಚೆಗೆ ಹಿಜಬುಲ್‌ನ ಮೂವರ ನಿಯೋಗ

ಇಸ್ಲಾಮಾಬಾದ್‌, ಜುಲೈ 30 (ಪಿಟಿಐ)– ಕಾಶ್ಮೀರದಲ್ಲಿ ಕದನ ವಿರಾಮ ಘೋಷಿಸಿ ಮಾತುಕತೆಗೆ ಮುಂದಾಗಿರುವ ಪಾಕಿಸ್ತಾನಿ ಮೂಲದ ಉಗ್ರಗಾಮಿ ಸಂಘಟನೆ ಹಿಜಬುಲ್‌ ಮುಜಾಹಿದ್ದೀನ್‌, ಭಾರತದ ಜತೆ ನವದೆಹಲಿಯಲ್ಲಿ ಮಾತುಕತೆ ನಡೆಸಲು ತನ್ನ ಮೂವರು ಪ್ರತಿನಿಧಿಗಳನ್ನು ಆಯ್ಕೆ ಮಾಡುವ ಮೂಲಕ ಶಾಂತಿ ಸಂಧಾನಕ್ಕೆ ದೃಢಹೆಜ್ಜೆ ಇಟ್ಟಿದೆ.

ಆದರೆ, ಉದ್ದೇಶಿತ ಮಾತುಕತೆಗೆ ಸಿದ್ಧವಾಗಲು ಗಡಿ ನಿಯಂತ್ರಣ ರೇಖೆಯ ಎರಡೂ ಕಡೆಗಿರುವ ತನ್ನ ನಾಯಕರನ್ನು ಭೇಟಿಯಾಗಿ ಮಾತುಕತೆಯ ವಿಧಿ ವಿಧಾನ ಮತ್ತು ಕಾರ್ಯತಂತ್ರದ ಬಗೆಗೆ ಪೂರ್ವಭಾವಿ ಚರ್ಚಿಸಲು ಭಾರತ ಅವಕಾಶ ಕಲ್ಪಿಸಿಕೊಡಬೇಕು ಎಂದು ಹಿಜಬುಲ್‌ ಮುಜಾಹಿದ್ದೀನ್‌ ಸಂಘಟನೆಯ ನಾಯಕ ಸಲಾಹುದ್ದೀನ್ ಇಂದು ರಾತ್ರಿ ತಿಳಿಸಿದರು.