ಪಠ್ಯಕ್ರಮ ಬದಲಾಗಬೇಕು

‘ಔದ್ಯೋಗಿಕ ನಿರುಪಯುಕ್ತತೆ- ಕಾಲೇಜು ಶಿಕ್ಷಣ’ (ಪ್ರ.ವಾ., ಡಿ. 27) ಲೇಖನ ಸಮಯೋಚಿತವಾದುದು. ಕಾಲೇಜುಗಳು ಎದುರಿಸುತ್ತಿರುವ ಮೂಲಸೌಕರ್ಯಗಳ ಕೊರತೆ ಮತ್ತು ಹದಗೆಟ್ಟಿರುವ ಇಂದಿನ ಶಿಕ್ಷಣ ವ್ಯವಸ್ಥೆಯ ಯಥಾವತ್ ಚಿತ್ರಣವನ್ನು ಲೇಖಕರು ನೀಡಿದ್ದಾರೆ.

ಇಲ್ಲಿ ಗಮನಿಸಬೇಕಾದ ಇನ್ನೊಂದು ಅಂಶವೆಂದರೆ, ಇಂದಿನ ಸ್ಪರ್ಧಾತ್ಮಕ ಯುಗದಲ್ಲಿ ಬೇಕಾಗುವ ಹೊಸ ಹೊಸ ವಿಷಯಗಳ ಅಳವಡಿಕೆಯಲ್ಲಿ ಹಿಂದುಳಿದಿರುವ ವಿಶ್ವವಿದ್ಯಾಲಯಗಳು ಪದವಿಗಳನ್ನು ನಿರುಪಯುಕ್ತಗೊಳಿಸುವಲ್ಲಿ ಪ್ರಮುಖ ಪಾತ್ರ ವಹಿಸಿವೆ ಎಂಬುದು. ಹಿಂದೆ ಇದ್ದ ಕೇವಲ ಮೂರು ವಿಶ್ವವಿದ್ಯಾಲಯಗಳು, ಗುಣಮಟ್ಟದ ಶಿಕ್ಷಣ ಮತ್ತು ಪ್ರಾಮಾಣಿಕ ಪರೀಕ್ಷಾ ವ್ಯವಸ್ಥೆ ನೀಡುವಲ್ಲಿ ಸಫಲವಾಗಿದ್ದವು. ಇಂದು ಹತ್ತಾರು ವಿಶ್ವವಿದ್ಯಾಲಯಗಳು ಉತ್ತೀರ್ಣತೆಯ ಪ್ರಮಾಣವನ್ನು ಹೆಚ್ಚಿಸಲು ಏನೆಲ್ಲಾ ಮಾಡುತ್ತಿವೆ ಎಂಬುದು ಎಲ್ಲರಿಗೂ ತಿಳಿದಿರುವ ವಿಚಾರ. ಕೆಲವು ವಿದೇಶಿ ವಿಶ್ವವಿದ್ಯಾಲಯಗಳಲ್ಲಿ ಇರುವಂತೆ ನಮ್ಮಲ್ಲೂ ಕ್ರೀಯಾಶೀಲ ಪಠ್ಯಕ್ರಮ ಜಾರಿಗೆ ಬರಬೇಕು. ಅದನ್ನು ಅನುಸರಿಸಿ ಬೋಧಕ ಸಿಬ್ಬಂದಿಯು ವಿದ್ಯಾರ್ಥಿಗಳನ್ನು ಈಗಿನ ಯುಗಕ್ಕೆ ಹೊಂದುವಂತೆ ತಯಾರು ಮಾಡಬೇಕು. ಆಗ ಮಾತ್ರ ಶಿಕ್ಷಣದ ಉಪಯುಕ್ತತೆ ಹೆಚ್ಚುತ್ತದೆ.

ಆರ್.ವಿ.ಭಟ್ಟ, ಬೆಳಗಾವಿ