ನಾನು... ಹೆಸರಿನ ನಾನು...

ಸಂವಿಧಾನದ ನಿಯಮದಂತೆ ಪ್ರಮಾಣವಚನ ಸ್ವೀಕಾರ ಮಾಡುವವರು ನಿಗದಿತ ಲಿಖಿತ ಪಠ್ಯವನ್ನು ಓದುವ ಪರಿಪಾಟ ಅನೂಚಾನವಾಗಿ ನಡೆದುಬಂದಿದೆ. ವಾಸ್ತವವಾಗಿ ಈ ಪಠ್ಯದ ಒಕ್ಕಣೆಯಲ್ಲಿ ನುಸುಳಿರುವ ಒಂದು ದೋಷವನ್ನು ಇನ್ನೂ ಯಾರೂ ಗಮನಿಸದಿರುವುದು ವಿಷಾದನೀಯ.

ದಶಕಗಳ ಹಿಂದೆ ಯಾರೋ ಅಧಿಕಾರಿ ಇಂಗ್ಲಿಷಿನದ್ದನ್ನು ಮಕ್ಕಿ ಕಾ ಮಕ್ಕಿಯಂತೆ ಕನ್ನಡೀಕರಿಸುವಾಗ ಉಳಿದ ಆ ಕೃತಕತೆ ಹತ್ತಾರು ಮುಖ್ಯಮಂತ್ರಿಗಳು, ನೂರಾರು ಸಚಿವರು, ಸಾವಿರಾರು ಶಾಸಕರು ಅಧಿಕಾರ ಸ್ವೀಕರಿಸಿರುವಾಗಲೂ ಇನ್ನೂ ಹಾಗೆಯೇ ಮುಂದುವರಿದಿದೆ. ಇಂಗ್ಲಿಷ್‌ಗೂ ಕನ್ನಡಕ್ಕೂ ಭಾಷೆ, ವಾಕ್ಯ ಸಂರಚನೆಯಲ್ಲಿ ವ್ಯತ್ಯಾಸವಿರುವುದನ್ನು ಗಮನಿಸದಿದ್ದರೆ ಈ ಆಭಾಸ ಪುನರಾವರ್ತನೆಯಾಗುತ್ತಲೇ ಇರುತ್ತದೆ.

‘ನಾನು... ಹೆಸರಿನ ನಾನು...’ ಎಂದು ಓದುವ ಬದಲು, ‘... ಹೆಸರಿನ ನಾನು’ ಎಂದು ಓದುವುದು ಸುಲಲಿತವೂ ಸಹಜವೂ ಆಗುವುದಿಲ್ಲವೇ? ಬೇಕಿದ್ದರೆ ಇದನ್ನೇ ‘ನಾನು ...’ ಎಂದೂ ಓದಬಹುದು. ಸಂಬಂಧಪಟ್ಟವರು ಈ ಬಗ್ಗೆ ಸೂಕ್ತ ಕ್ರಮ ಕೈಗೊಂಡು ಕನ್ನಡದ ಗೌರವ ಕಾಪಾಡಬೇಕು.

- ಡಾ. ಟಿ.ಗೋವಿಂದರಾಜು,ಬೆಂಗಳೂರು