ಹೈ.ಕ: ಶಾಲಾ ರಜೆ ವಿಸ್ತರಿಸಿ

ಹೈದರಾಬಾದ್– ಕರ್ನಾಟಕ ಭಾಗದಲ್ಲಿ ಬಿಸಿಲಿನ ಪ್ರಖರತೆ ತೀವ್ರವಾಗಿದೆ. ಮಾರ್ಚ್ ಆರಂಭದಿಂದಲೇ ಬಿಸಿಲ ಝಳ ಒಂದು ರೀತಿಯ ಅಘೋಷಿತ ಕರ್ಫ್ಯೂ ವಿಧಿಸಿದೆ.ಮುಂಜಾನೆಯಿಂದ ಸಂಜೆವರೆಗೂ ಜನ ಹೊರಬರಲು ಅಂಜುವಂತಾಗಿದೆ. ಇಂತಹುದರ ಮಧ್ಯೆ ಇಂದಿನಿಂದ (29) ಇಲ್ಲಿ ಶಾಲೆಗಳು ಪ್ರಾರಂಭಗೊಳ್ಳುತ್ತಿವೆ.

ಕೆಲವೆಡೆ 3ರಿಂದ 5 ಕಿ.ಮೀ.ವರೆಗೂ ಮಕ್ಕಳು ನಡೆದುಕೊಂಡೇ ಶಾಲೆಗೆ ಹೋಗಬೇಕಾದ ಪರಿಸ್ಥಿತಿ ಇದೆ. ಬಿಸಿಲ ಝಳಕ್ಕೆ ನಿರ್ಜಲೀಕರಣದಿಂದ ಮಕ್ಕಳ ಆರೋಗ್ಯದಲ್ಲಿ ಏರುಪೇರಾಗುವ ಸಾಧ್ಯತೆ ಇರುತ್ತದೆ.

ಪಕ್ಕದ ತೆಲಂಗಾಣ ರಾಜ್ಯದಲ್ಲಿ ಜೂನ್‌ ಒಂದರಿಂದ ಶಾಲೆಗಳು ಆರಂಭವಾಗಬೇಕಿತ್ತು. ಆದರೆ ಕಡು ಬಿಸಿಲಿನಿಂದ ಮಕ್ಕಳ ಆರೋಗ್ಯ ಕಾಪಾಡಲು ಜೂನ್ 12ರವರೆಗೂ ರಜೆಯನ್ನು ವಿಸ್ತರಿಸಲಾಗಿದೆ. ಹೈ.ಕ. ಭಾಗದ ಜಿಲ್ಲೆಗಳಲ್ಲೂ ಮಕ್ಕಳ ಹಿತದೃಷ್ಟಿಯಿಂದ ಶಾಲೆಗಳ ರಜೆಯನ್ನು ಜೂನ್ ಅಂತ್ಯದವರೆಗೂ ವಿಸ್ತರಿಸುವುದು ಒಳಿತು.
-ಭಾಗ್ಯಶ್ರೀ ಎಸ್. ಪಾಟೀಲ,ಐನಾಪೂರ, ಯಡ್ರಾಮಿ