ವಾಚಕರ ವಾಣಿ| ಪುಸ್ತಕಕ್ಕೆ ಅಗೌರವ ತರವಲ್ಲ

ಪರಿಷ್ಕೃತ ಪಠ್ಯಪುಸ್ತಕಗಳ ವಿರುದ್ಧ ಪಠ್ಯಪುಸ್ತಕವನ್ನು ಹರಿದುಹಾಕುವ ಮೂಲಕ ಪ್ರತಿಭಟಿಸಿರುವುದು ಸರಿಯಲ್ಲ. ಬಾಲ್ಯದಿಂದಲೂ ಪಠ್ಯಪುಸ್ತಕಗಳ ಬಗ್ಗೆ ಬಹಳ ಗೌರವದಿಂದ ನಡೆದುಕೊಳ್ಳಲು ಕಲಿಸಲಾಗುತ್ತದೆ. ಅವುಗಳ ಬಗ್ಗೆ ಅಗೌರವ ತೋರಿಸಿದರೆ ವಿದ್ಯೆ ಒಲಿಯುವುದಿಲ್ಲ ಎಂಬ ಭಾವನೆ ಮೂಡಿರುತ್ತದೆ. ನಮ್ಮೆಲ್ಲರ ಜೀವನದಲ್ಲಿ ಪಠ್ಯಪುಸ್ತಕಗಳಿಗೆ ವಿಶೇಷ ಸ್ಥಾನಮಾನವಿದೆ. ಅವುಗಳನ್ನು ನೆಲದ ಮೇಲೆ ಬಿಸಾಡುವುದಾಗಲೀ ಆಕಸ್ಮಿಕವಾಗಿ ಕಾಲು ತಾಗಿಸುವುದಾಗಲೀ ಮಾಡಿದಲ್ಲಿ ಅಪರಾಧಿ ಭಾವ ಮೂಡುವಷ್ಟರಮಟ್ಟಿಗೆ ಎಲ್ಲರಲ್ಲಿ ಒಂದು ಗೌರವಪೂರ್ವಕ ಸ್ಥಾನಮಾನ ನೀಡಲಾಗಿದೆ. ಅವುಗಳ ಒಳಗಿನ ವಿಷಯಗಳ ಬಗ್ಗೆ ಯಾವುದೇ ತರಹದ ಭಿನ್ನಾಭಿಪ್ರಾಯ ಇದ್ದರೂ ಪುಸ್ತಕ ಹರಿದು ವಿರೋಧಿಸುವ ಕ್ರಮ ಸರಿಯಲ್ಲ.

- ಎ.ಜೆ.ಜಾವೀದ್,ಹಾಸನ