ಆರಾಮದ ಸೆಲ್ಫೀ

ಈಗ ಸೆಲ್ಫೀ ಕ್ಲಿಕ್ಕಿಸದ ಸ್ಮಾರ್ಟ್‌ಫೋನ್‍ಗಳೇ ಇಲ್ಲವೇನೋ. ಸೆಲ್ಫೀಗಳಲ್ಲೂ ಒಂದಲ್ಲ ಎರಡಲ್ಲ, ನಾನಾ ಶೈಲಿ. ಆದರೆ ಸೆಲ್ಫೀ ತೆಗೆಯುವ ಬಗೆ ಮಾತ್ರ ಒಂದೇ. ಕೈಗಳು ಇಲ್ಲವೇ ಸೆಲ್ಫೀ ಸ್ಟಿಕ್ ಬಳಸಬೇಕು. ಅಪಾಯಕಾರಿ ಜಾಗಗಳಲ್ಲಿ ನಿಂತು ಹೀಗೆ ಸೆಲ್ಫೀ ತೆಗೆದುಕೊಳ್ಳುವಾಗ ಸಂಭವಿಸಿರುವ ಉದಾಹರಣೆಗಳೂ ಕಡಿಮೆಯಿಲ್ಲವೆನ್ನಿ.

ಇದನ್ನೇ ಗಮನದಲ್ಲಿಟ್ಟುಕೊಂಡು ಆರಾಮಾಗಿ ಸೆಲ್ಫೀ ಕ್ಲಿಕ್ಕಿಸಿಕೊಳ್ಳುವ ಸಾಧನವೊಂದು ರೂಪಿತಗೊಂಡಿದೆ. ಅದೇ ‘ಏರ್‌ ಸೆಲ್ಫೀ’. ಗಾಳಿಯಲ್ಲಿ ತೇಲಿಬಿಟ್ಟು ತೆಗೆದುಕೊಳ್ಳುವ ಸೆಲ್ಫೀ.

ಪಾಕೆಟ್‍ನಲ್ಲಿ ಇಟ್ಟುಕೊಳ್ಳಬಹುದಾದಂಥ ಪುಟ್ಟ ಡ್ರೋಣ್ ಇದಾಗಿದ್ದು, ನಿಮ್ಮ ಸ್ಮಾರ್ಟ್‌ಫೋನ್‌ಗೆ ಹೊಂದಿಕೊಂಡು ಕೆಲಸ ನಿರ್ವಹಿಸುತ್ತದೆ. ಗಾಳಿಯಲ್ಲಿ ತೇಲುವ ಕ್ಯಾಮೆರಾದಂತೆ ಕೆಲಸ ಮಾಡುತ್ತದೆ. ಉತ್ತಮ ಗುಣಮಟ್ಟದ ಸೆಲ್ಫೀ ಕ್ಲಿಕ್ಕಿಸಿಕೊಳ್ಳಲು 5 ಎಂ.ಪಿ. ಕ್ಯಾಮೆರಾ ನೀಡಲಾಗಿದೆ. ನಾಲ್ಕು ರೆಕ್ಕೆಗಳಿದ್ದು, 66 ಅಡಿಗಳಷ್ಟು ಮೇಲೆ ಹಾರಲು ಇದು ಸಹಕಾರಿ.

ಏರಿಯಲ್ ಶಾಟ್ ಸೆಲ್ಫೀಗಳು ಈಗೀಗ ಹೆಚ್ಚು ಪ್ರಚಲಿತವಾಗಿರುವುದರಿಂದ ಈ ಪಾಕೆಟ್ ಡ್ರೋಣ್ ಕ್ಯಾಮೆರಾವನ್ನು ಕಂಡುಹಿಡಿಯಲಾಗಿದೆ ಎಂದು ಹೇಳಿಕೊಂಡಿದೆ ಎರಡು ವರ್ಷಗಳಿಂದಲೂ ಇದರ ತಯಾರಿಯಲ್ಲಿ ತೊಡಗಿಕೊಂಡಿದ್ದ ಲಂಡನ್ ಮೂಲದ ಕಂಪನಿ.

ಚಿತ್ರಗಳು ಅಲ್ಲಾಡಬಾರದು ಎಂದೇ ಇದರಲ್ಲಿ ಕಂಪನ ನಿಯಂತ್ರಕ ಇದೆ. ತನ್ನದೇ 2.4 ಗಿಗಾ ಹರ್ಟ್ಸ್ ಸಾಮರ್ಥ್ಯದ ವೈಫೈ ನೆಟ್‍ವರ್ಕ್ ಹೊಂದಿದ್ದು, ಇದರಿಂದ ಸ್ಮಾರ್ಟ್‌ಫೋನ್‌ ಸಂಪರ್ಕ ಸಾಧ್ಯವಾಗಲಿದೆ. ಐಒಎಸ್ ಅಥವಾ ಆ್ಯಂಡ್ರಾಯ್ಡ್ ಮೊಬೈಲ್ ಆ್ಯಪ್ ಬಳಸಿ ಡ್ರೋಣ್ ನಿಯಂತ್ರಿಸಬಹುದು. ಬ್ಯಾರೊಮೀಟರ್, ಜಿಯೊಮ್ಯಾಗ್ನೆಟಿಕ್ ಸೆನ್ಸರ್ ಇದ್ದು, ಕ್ಯಾಮೆರಾ ಮೇಲೆ ಹೋದಾಗ ಹಸ್ತ ಚಾಚಿದರೆ ಅದರ ಮೇಲೆ ಬಂದು ನಿಲ್ಲುತ್ತದೆ. ಸೆಲ್ಫೀ ಡಿಲೇ ಟೈಮರ್ ಇದ್ದು, ಹತ್ತು ಸೆಕೆಂಡುಗಳವರೆಗೂ ಫೋಟೊ ತೆಗೆದುಕೊಳ್ಳಲು ಸಮಯ ನೀಡುತ್ತದೆ. ಒಂದೇ ಬಾರಿ ಎಂಟು ಫೋಟೊಗಳನ್ನು ಕ್ಲಿಕ್ಕಿಸಬಹುದು.

ಕ್ಲಿಕ್ಕಿಸಿದ ಫೋಟೊಗಳು 4ಜಿಬಿ ಮೆಮೊರಿ ಕಾರ್ಡ್‌ನಲ್ಲಿ ಶೇಖರಣೆಯಾಗುತ್ತವೆ. 30 ನಿಮಿಷಗಳಲ್ಲಿ ಪೂರ್ಣ ಚಾರ್ಜ್ ಆಗುತ್ತದೆ. ಮೂರು ನಿಮಿಷದವರೆಗೂ ಹಾರಾಡಬಲ್ಲದು. ಇದರ ಬೆಲೆ $300. (₹20,000).

ಸೆಲ್ಫೀಗೆಂದು ತೋಳುಗಳನ್ನು ನೋಯಿಸಿಕೊಳ್ಳಬೇಕಿಲ್ಲ, ಸೆಲ್ಫೀ ಸ್ಟಿಕ್ ಹಿಡಿದುಕೊಳ್ಳುವ ಅಗತ್ಯವೂ ಇಲ್ಲ. ಅದನ್ನೆಲ್ಲ ಬಿಟ್ಟು ಆರಾಮಾಗಿ ಗಾಳಿಯಲ್ಲಿ ಕ್ಯಾಮೆರಾ ಹಾರಿಸಿ ಸೆಲ್ಫೀ ತೆಗೆದುಕೊಳ್ಳಬಹುದು.