ಬ್ಯಾಡ್ಮಿಂಟನ್: ಚೆನ್, ವಾಂಗ್‌ಗೆ ಪ್ರಶಸ್ತಿ

ಟೋಕಿಯೊ (ಐಎಎನ್‌ಎಸ್): ಜಪಾನ್ ಓಪನ್ ಬ್ಯಾಡ್ಮಿಂಟನ್ ಟೂರ್ನಿಯಲ್ಲಿ ಚೀನಾದ ಸ್ಪರ್ಧಿಗಳು ಪ್ರಭುತ್ವ ಮೆರೆದಿದ್ದಾರೆ. ಚೆನ್ ಲಾಂಗ್ ಮತ್ತು ವಾಂಗ್ ಯಿಹಾನ್ ಕ್ರಮವಾಗಿ ಪುರುಷರ ಮತ್ತು ಮಹಿಳೆಯರ ಸಿಂಗಲ್ಸ್ ವಿಭಾಗದಲ್ಲಿ ಪ್ರಶಸ್ತಿ ಗೆದ್ದುಕೊಂಡರು.

ಭಾನುವಾರ ನಡೆದ ಪುರುಷರ ವಿಭಾಗದ ಫೈನಲ್‌ನಲ್ಲಿ ಚೆನ್ 21-8, 10-21, 21-19 ರಲ್ಲಿ ವಿಶ್ವದ ಅಗ್ರ ರ‌್ಯಾಂಕಿಂಗ್‌ನ ಆಟಗಾರ ಮಲೇಷ್ಯದ ಲೀ ಚೊಂಗ್ ವೀ ಅವರಿಗೆ ಆಘಾತ ನೀಡಿದರು. 73 ನಿಮಿಷಗಳ ಕಾಲ ನಡೆದ ಹೋರಾಟದಲ್ಲಿ ಚೆನ್ ಆಕರ್ಷಕ ಪ್ರದರ್ಶನ ನೀಡಿದರು.

ಮಹಿಳೆಯರ ವಿಭಾಗದ ಫೈನಲ್‌ನಲ್ಲಿ ಅಗ್ರಶ್ರೇಯಾಂಕದ ವಾಂಗ್ 21-16, 21-14 ರಲ್ಲಿ ಜರ್ಮನಿಯ ಜೂಲಿಯನ್ ಶೆಂಕ್ ವಿರುದ್ಧ ಜಯ ಪಡೆದರು. ಶೆಂಕ್ ಸೆಮಿಫೈನಲ್‌ನಲ್ಲಿ ಸೈನಾ ನೆಹ್ವಾಲ್ ಅವರನ್ನು ಮಣಿಸಿದ್ದರು.