ಮುಂಬರುವ ಒಲಿಂಪಿಕ್ಸ್ ನಲ್ಲಿ ಆಡುತ್ತೀನೋ ಇಲ್ಲವೋ ಗೊತ್ತಿಲ್ಲ; ಕಣ್ಣೀರಿಟ್ಟ ಸಾನಿಯಾ

ರಿಯೊ ಡಿ ಜನೈರೊ (ಐಎಎನ್‍ಎಸ್): ಭಾನುವಾರ ನಡೆದ ಮಿಶ್ರ ಡಬಲ್ಸ್‌ ವಿಭಾಗದ ಟೆನಿಸ್ ಪಂದ್ಯದಲ್ಲಿ ಸಾನಿಯಾ ಮಿರ್ಜಾ- ರೋಹನ್ ಬೋಪಣ್ಣ  ಜೋಡಿ ಕಂಚಿನ ಪದಕವನ್ನು ಗೆಲ್ಲುತ್ತಾರೆ ಎಂಬ ನಿರೀಕ್ಷೆ ಇತ್ತು. ಆದರೆ ಕಂಚಿನ ಪದಕದ ಹೋರಾಟದಲ್ಲಿ ಬೋಪಣ್ಣ  ಮತ್ತು ಸಾನಿಯಾ 6–1, 7–5ರ ನೇರ ಸೆಟ್‌ಗಳಿಂದ ಜೆಕ್‌ ಗಣರಾಜ್ಯದ ರಾಡೆಕ್‌ ಸ್ಟೆಪಾನೆಕ್‌ ಮತ್ತು ಲೂಸಿ ರಾಡೆಕಾ  ವಿರುದ್ಧ ಸೋಲು ಅನುಭವಿಸುವ ಮೂಲಕ ಈ ನಿರೀಕ್ಷೆಯೂ ಇಲ್ಲದಂತಾಯಿತು.

ಪಂದ್ಯ ಸೋತ ನಂತರ ಕಣ್ಣೀರಿಟ್ಟ ಸಾನಿಯಾ, ತುಂಬಾ ದುಃಖವಾಗುತ್ತಿದೆ. ನಾಲ್ಕು ವರುಷಗಳ ನಂತರ ನಾನು ಟೆನಿಸ್ ಆಡುತ್ತೇನೋ ಇಲ್ಲವೋ ಎಂಬುದು ಗೊತ್ತಿಲ್ಲ ಎಂದು ಹೇಳಿದ್ದಾರೆ. ನಾಲ್ಕು ವರ್ಷಗಳ ನಂತರ ಟೋಕಿಯೊದಲ್ಲಿ ಒಲಿಂಪಿಕ್ಸ್ ಕ್ರೀಡಾಕೂಟ ನಡೆಯಲಿದೆ.

ಮಾಧ್ಯಮದವರ ಪ್ರಶ್ನೆಗೆ ಉತ್ತರಿಸುವಾಗ ಸಾನಿಯಾ ಬಿಕ್ಕಿ ಬಿಕ್ಕಿ ಅಳುತ್ತಲೇ ಮಾತನಾಡಿದ್ದಾರೆ. ನಮಗಿಂದು ಉತ್ತಮ ಪ್ರದರ್ಶ ನೀಡಲು ಸಾಧ್ಯವಾಗಿಲ್ಲ. ನಾವು ನಮ್ಮ ಕೈಲಾದ ಪ್ರಯತ್ನವನ್ನು ಮಾಡಿದೆವು. ಆದರೆ ಗೆಲುವು ಸಾಧ್ಯವಾಗಲಿಲ್ಲ ಎಂದು ಸಾನಿಯಾ ಕಣ್ಣೀರು ಹಾಕಿದ್ದಾರೆ.