ಸಿಂಗಪುರ ಓಪನ್ ಸೂಪರ್‌ ಸೀರಿಸ್ ಬ್ಯಾಡ್ಮಿಂಟನ್ ಟೂರ್ನಿ ಕಿರೀಟ ಮುಡಿಗೇರಿಸಿಕೊಂಡ ಬಿ. ಸಾಯಿಪ್ರಣೀತ್‌

ಸಿಂಗಪುರ: ಇಲ್ಲಿ ನಡೆಯುತ್ತಿರುವ ಸಿಂಗಪುರ ಓಪನ್‌ ಬ್ಯಾಡ್ಮಿಂಟನ್ ಟೂರ್ನಿಯಲ್ಲಿ ಭಾನುವಾರ ಬಿ. ಸಾಯಿಪ್ರಣೀತ್‌ ಮತ್ತು ಕೆ. ಶ್ರೀಕಾಂತ್‌ ನಡುವೆ ನಡೆದ ಫೈನಲ್‌ ಹೋರಾಟದಲ್ಲಿ ಸಾಯಿಪ್ರಣೀತ್‌ ಜಯ ಸಾಧಿಸಿದ್ದಾರೆ.

17–21, 21–17, 21–12 ಸೆಟ್‌ಗಳ ಅಂತರದಲ್ಲಿ ಕೆ. ಶ್ರೀಕಾಂತ್‌ ವಿರುದ್ಧ ಜಯ ಸಾಧಿಸುವ ಮೂಲಕ ಬಿ. ಸಾಯಿಪ್ರಣೀತ್‌ ಸಿಂಗಪುರ ಓಪನ್‌ ಬ್ಯಾಡ್ಮಿಂಟನ್ ಟೂರ್ನಿ ಕಿರೀಟವನ್ನು ಮುಡಿಗೇರಿಸಿಕೊಂಡರು.

ಶನಿವಾರ ನಡೆದ ಮೊದಲ ಸೆಮಿಫೈನಲ್‌ನಲ್ಲಿ ಸಾಯಿಪ್ರಣೀತ್‌ 21–6, 21–8ರಲ್ಲಿ ದಕ್ಷಿಣ ಕೊರಿಯಾದ ಲೀ ಡಾಂಗ್‌ ಕುಯೆನ್ ಎದುರು ಗೆಲುವು ಸಾಧಿಸಿದರು. ನಾಲ್ಕರ ಘಟ್ಟದ ಇನ್ನೊಂದು  ಪಂದ್ಯದಲ್ಲಿ ಶ್ರೀಕಾಂತ್‌   21–13, 21–14ರಲ್ಲಿ ಇಂಡೊನೇಷ್ಯಾದ ಆ್ಯಂಟನಿ ಸಿನಿಸುಕ ಗಿಂಟಿಂಗ್ ಅವರನ್ನು ಮಣಿಸಿದರು.

ಬ್ಯಾಡ್ಮಿಂಟನ್ ಇತಿಹಾಸದಲ್ಲಿಯೇ ಮೊದಲ ಬಾರಿಗೆ ಅಂತರರಾಷ್ಟ್ರೀಯ ಟೂರ್ನಿಯೊಂದರ ಪುರುಷರ ಸಿಂಗಲ್ಸ್‌ ವಿಭಾಗದ ಫೈನಲ್‌ನಲ್ಲಿ ಭಾರತದ ಇಬ್ಬರು ಮುಖಾಮುಖಿಯಾಗಿರುವ ಅಪರೂಪದ ಸಾಧನೆ ಮಾಡಿದ್ದರು.