ದಾಖಲೆ ಬರೆದ ಇಮ್ರಾನ್ ತಾಹೀರ್

ಲಂಡನ್: ಏಕದಿನ ವಿಶ್ವಕಪ್ ಕ್ರಿಕೆಟ್‌ ಟೂರ್ನಿಯ ಇತಿಹಾಸದಲ್ಲಿಯೇ ಅಪರೂಪದ ದಾಖಲೆಯನ್ನು ದಕ್ಷಿಣ ಆಫ್ರಿಕಾದ ಲೆಗ್‌ಸ್ಪಿನ್ನರ್ ಇಮ್ರಾನ್ ತಾಹೀರ್ ಬರೆದರು.

ಗುರುವಾರ ಆರಂಭವಾದ 12ನೇ ವಿಶ್ವಕಪ್ ಟೂರ್ನಿಯ ಉದ್ಘಾಟನೆ ಪಂದ್ಯದಲ್ಲಿ ಅವರು ಇಂಗ್ಲೆಂಡ್ ಎದುರಿನ ಇನಿಂಗ್ಸ್‌ನ ಮೊದಲ ಓವರ್‌ ಬೌಲಿಂಗ್ ಮಾಡಿದ್ದು ಆ ದಾಖಲೆಯಾಗಿದೆ.

ಟಾಸ್ ಗೆದ್ದ ದಕ್ಷಿಣ ಆಫ್ರಿಕಾ ತಂಡವು ಫೀಲ್ಡಿಂಗ್ ಆಯ್ಕೆ ಮಾಡಿಕೊಂಡಿತು. 40 ವರ್ಷದ ಇಮ್ರಾನ್ ಮೊದಲ ಓವರ್ ಬೌಲಿಂಗ್ ಮಾಡಿದರು.

1975ರಿಂದ 2015ವರೆಗೆ ನಡೆದ ವಿಶ್ವಕಪ್ ಟೂರ್ನಿಗಳಲ್ಲಿ ಹೊಸ ಚೆಂಡಿನಲ್ಲಿ ವೇಗದ ಬೌಲರ್‌ಗಳು ಬೌಲಿಂಗ್ ಆರಂಭಿಸಿದ್ದರು. ಆದರೆ ಇದೇ ಮೊದಲ ಸಲ ಸ್ಪಿನ್ನರ್‌ ಬೌಲಿಂಗ್ ಮಾಡಿದರು. ಎರಡನೇ ಎಸೆತದಲ್ಲಿಯೇ ಜಾನಿ ಬೆಸ್ಟೊ ಅವರ ವಿಕೆಟ್ ಕಬಳಿಸಿದರು. ‌ಅವರು ಒಟ್ಟು ಎರಡು ವಿಕೆಟ್ ಗಳಿಸಿದರು.