ಡೀನ್ ಜೋನ್ಸ್‌ಗೆ ಎಂಸಿಜಿಯಲ್ಲಿ ಅಂತಿಮ ನಮನ
ಮೆಲ್ಬರ್ನ್ : ಹೋದ ತಿಂಗಳು ನಿಧನರಾಗಿದ್ದ ಆಸ್ಟ್ರೇಲಿಯಾದ ಮಾಜಿ ಕ್ರಿಕೆಟಿಗ ಮತ್ತು ವೀಕ್ಷಕ ವಿವರಣೆಗರ ಡೀನ್ ಜೋನ್ಸ್(59) ಅವರ ಅಂತ್ಯಕ್ರಿಯೆಯನ್ನು ಬುಧವಾರ ನೆರವೇರಿಸಲಾಯಿತು.
ಮುಂಬೈನ ಹೋಟೆಲ್‌ನಲ್ಲಿ ಅವರು ಹೃದಯಸ್ಥಂಭನದಿಂದ ನಿಧನರಾಗಿದ್ದರು. ಇಂಡಿಯನ್ ಪ್ರೀಮಿಯರ್ ಲೀಗ್ ಕ್ರಿಕೆಟ್ ಟೂರ್ನಿಯ ವೀಕ್ಷಕ ವಿವರಣೆಗಾರರಾಗಿ ಅವರು ಸ್ಟಾರ್ ಸ್ಫೋರ್ಟ್ಸ್‌ ವಾಹಿನಿಯಲ್ಲಿ ಕಾರ್ಯನಿರ್ವಹಿಸಲು ಮುಂಬೈನಲ್ಲಿದ್ದರು.
ಅವರ ಪಾರ್ಥಿವ ಶರೀರವನ್ನು ಭಾರತದಲ್ಲಿ ಸಿದ್ಧಪಡಿಸಿದ ಕಾಫಿನ್ ಬಾಕ್ಸ್‌ನಲ್ಲಿ ಅವರ ತವರೂರಿಗೆ ಕಳಿಸಿ ವಿಶೇಷ ಗೌರವ ಸಲ್ಲಿಸಲಾಗಿತ್ತು. ಅಂತ್ಯಕ್ರಿಯೆಗೂ ಮುನ್ನ ಅಲಂಕೃತ ವಾಹನದಲ್ಲಿ ಜೋನ್ಸ್ ದೇಹವನ್ನು ಇರಿಸಿ ಮೆಲ್ಬರ್ನ್ ಕ್ರಿಕೆಟ್ ಅಂಗಳದಲ್ಲಿ ಒಂದು ಸುತ್ತು ಮೆರವಣಿಗೆ ಮಾಡಲಾಯಿತು. ಅವರ ಟೆಸ್ಟ್‌ ಪದಾರ್ಪಣೆಯ ಕ್ಯಾಪ್‌ನ 324 ಸಂಖ್ಯೆಯನ್ನು ವಾಹನದ ಮೇಲೆ ಚಿತ್ತಾರ ಬಿಡಿಸಲಾಗಿತ್ತು. ಈ ಸಂದರ್ಭದಲ್ಲಿ ಡೀನ್ ಅವರ ಪತ್ನಿ ಜೇನ್, ಪುತ್ರಿಯರಾದ ಇಸಾಬೆಲ್ಲಾ ಮತ್ತು ಪೊಬಾ ಹಾಗೂ ಕುಟುಂಬದ ಸದಸ್ಯರು ಹಾಜರಿದ್ದರು. ಕೋವಿಡ್ –19 ತಡೆ ನಿಯಮಾವಳಿ ಅನ್ವಯ ಕಾರ್ಯಕ್ರಮಕ್ಕೆ ಹೆಚ್ಚು ಜನ ಸೇರಿರಲಿಲ್ಲ.
ಈ ವಿಧಿವಿಧಾನಗಳ ವಿಡಿಯೊವನ್ನು ಕ್ರಿಕೆಟ್ ಆಸ್ಟ್ರೇಲಿಯಾ ಟ್ವೀಟ್ ಮಾಡಿದೆ.
ತಾಜಾ ಸುದ್ದಿಗಾಗಿ ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ | ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ನಮ್ಮ ಫೇಸ್‌ಬುಕ್ ಪುಟ ಫಾಲೋ ಮಾಡಿ.