ಮೂತ್ರಪಿಂಡದ ಕಾಯಿಲೆ ನಡುವೆಯೂ ಗ್ರೀನ್ ಉನ್ನತ ಸಾಧನೆ

ಪರ್ತ್‌: ಆಸ್ಟ್ರೇಲಿಯಾ ಆಟಗಾರ ಕ್ಯಾಮರಾನ್ ಗ್ರೀನ್ ಅವರು ಹುಟ್ಟಿನಿಂದಲೇ ಮೂತ್ರಪಿಂಡದ ಕಾಯಿಲೆಯಿಂದ ಬಳಲುತ್ತಿದ್ದಾರೆ. ಅವರು ಕೇವಲ 12 ವರ್ಷ ಮಾತ್ರ ಬದುಕುತ್ತಾರೆಂದು ವೈದ್ಯರು ಹೇಳಿದ್ದರು. ಆದರೆ ಆ ಸವಾಲು ಮೀರಿದ ಗ್ರೀನ್ ದೊಡ್ಡ ಕ್ರಿಕೆಟಿಗ ಆಟಗಾರನಾಗಿ ಬೆಳೆದಿದ್ದಾರೆ. 

ಆಸ್ಟ್ರೇಲಿಯಾ ಕ್ರಿಕೆಟ್ ತಂಡದ ಪ್ರಮುಖ ಆಲ್‌ರೌಂಡರ್ ಆಗಿರುವ ಅವರು, ‘ಈ ರೋಗಕ್ಕೆ ಯಾವುದೇ ಲಕ್ಷಣಗಳಿಲ್ಲ ಮತ್ತು ಪೂರ್ಣ ಗುಣಮುಖವಾಗದು. ನನ್ನ ಮೂತ್ರಪಿಂಡವು ಶೇ 60ರಷ್ಟು ಮಾತ್ರ ಕಾರ್ಯನಿರ್ವಹಿಸುತ್ತಿದೆ. ಇದು ಈ ಕಾಯಿಲೆಯ ಎರಡನೇ ಹಂತವಾಗಿದೆ. ಐದನೇ ಹಂತಕ್ಕೆ ಕಸಿ ಅಥವಾ ಡಯಾಲಿಸಿಸ್ ಅಗತ್ಯವಿದೆ’ ಎಂದು 24 ವರ್ಷದ ಗ್ರೀನ್ ಬಹಿರಂಗಪಡಿಸಿದರು.

‘ನಾನು ಹುಟ್ಟಿದಾಗ ದೀರ್ಘಕಾಲದ ಮೂತ್ರಪಿಂಡದ ಕಾಯಿಲೆ ಇದೆ ಎಂದು ನನ್ನ ತಂದೆ, ತಾಯಿಗೆ ವೈದ್ಯರು ಹೇಳಿದರು.  ಮೂಲತಃ ಯಾವುದೇ ರೋಗಲಕ್ಷಣಗಳಿರಲಿಲ್ಲ. ಅದು ಅಲ್ಟ್ರಾಸೌಂಡ್‌ ಮೂಲಕ ಗೊತ್ತಾಯಿತು’ ಎಂದು ಗ್ರೀನ್ ಅವರು ಚಾನೆಲ್  ಸೆವೆನ್‌ ಸಂದರ್ಶನದಲ್ಲಿ ತಿಳಿಸಿದ್ದಾರೆ.  

‘ದೀರ್ಘಕಾಲದ ಕಾಯಿಲೆಯಿಂದಾಗಿ ರಕ್ತ ದ ಶುದ್ಧೀಕರಣ ಕಾರ್ಯವು ಪೂರ್ಣಪ್ರಮಾಣದಲ್ಲಿ ಆಗುತ್ತಿಲ್ಲ. ಶೇ 60ರಷ್ಟು ಮಾತ್ರ ಕಾರ್ಯನಿರ್ವಹಣೆ ಇದೆ. ಅದೃಷ್ಟವಶಾತ್ ನಾನು ಎರಡನೇ ಹಂತದಲ್ಲಿದ್ದೇನೆ. ಆದರೆ ಆರೋಗ್ಯದ ಕಡೆ ಹೆಚ್ಚು ಗಮನ ಹರಿಸಬೇಕು. ಇಲ್ಲವಾದರೆ ಸಮಸ್ಯೆ ಉಂಟಾಗುತ್ತದೆ. ಮೂತ್ರಪಿಂಡಗಳು ಉತ್ತಮಗೊಳ್ಳಲು ಸಾಧ್ಯವಿಲ್ಲ. ಉಪ್ಪು ಮತ್ತು ಪ್ರೋಟೀನ್ ಆಹಾರಗಳನ್ನು ತುಂಬಾ ಕಡಿಮೆ ಪ್ರಮಾಣದಲ್ಲಿ ಸೇವಿಸಬೇಕು’ ಎಂದು ಗ್ರೀನ್ ಹೇಳಿದ್ದಾರೆ.

2020ರಲ್ಲಿ ಆಸ್ಟ್ರೇಲಿಯಾ ತಂಡಕ್ಕೆ ಪದಾರ್ಪಣೆ ಮಾಡಿದಾಗಿನಿಂದ 24 ಟೆಸ್ಟ್, 23 ಏಕದಿನ ಮತ್ತು ಎಂಟು ಟಿ20 ಪಂದ್ಯಗಳಲ್ಲಿ  ಗ್ರೀನ್ ಆಡಿದ್ದಾರೆ.

‘ಈ ರೋಗವು ತನ್ನ ಕ್ರಿಕೆಟ್ ವೃತ್ತಿಜೀವನದ ಮೇಲೂ ಕೆಟ್ಟ ಪರಿಣಾಮ ಬೀರುತ್ತಿದೆ. ಕೆಲವು ತಿಂಗಳುಗಳ ಹಿಂದೆ ನ್ಯೂಜಿಲೆಂಡ್ ಎದುರಿನ ಏಕದಿನ ಕ್ರಿಕೆಟ್ ಪಂದ್ಯದಲ್ಲಿ ಉತ್ತಮವಾಗಿ ಆಡುತ್ತಿದ್ದೆ. ಆದರೆ ಈ ಕಾಯಿಲೆಯ ಪರಿಣಾಮದಿಂದಾಗಿ ಸ್ನಾಯುಸೆಳೆತದ ಸಮಸ್ಯೆಗೆ ಒಳಗಾಗಿದ್ದೆ’ ಎಂದು ಬೇಸರ ವ್ಯಕ್ತಪಡಿಸಿದರು.