IND vs AUS Test: ಭಾರತ ಪತನ 36/9; ಆಸೀಸ್ ಗೆಲುವಿಗೆ 90 ರನ್ ಗುರಿ

ಅಡಿಲೇಡ್: ಆಸ್ಟ್ರೇಲಿಯಾ ಬೌಲರ್‌ಗಳ ಮಾರಕ ದಾಳಿಗೆ ತತ್ತರಿಸಿರುವ ಟೀಮ್ ಇಂಡಿಯಾ, ಇಲ್ಲಿನ ಅಡಿಲೇಡ್ ಓವಲ್ ಮೈದಾನದಲ್ಲಿ ನಡೆಯುತ್ತಿರುವ ಮೊದಲ ಪಿಂಕ್ ಬಾಲ್ ಡೇ-ನೈಟ್ ಟೆಸ್ಟ್ ಪಂದ್ಯದಲ್ಲಿ ದ್ವಿತೀಯ ಇನ್ನಿಂಗ್ಸ್‌ನಲ್ಲಿ 21.2 ಓವರ್‌ಗಳಲ್ಲಿ ಒಂಬತ್ತು ವಿಕೆಟ್ ನಷ್ಟಕ್ಕೆ 36 ರನ್ ಗಳಿಸಿದೆ. ಕೊನೆಯವರವಾಗಿ ಬ್ಯಾಟಿಂಗ್‌ಗಿಳಿದ ಮೊಹಮ್ಮದ್ ಶಮಿ ಗಾಯಗೊಂಡ ಪರಿಣಾಮ ಇನ್ನಿಂಗ್ಸ್ ಮುಂದುವರಿಸಲಾಗಲಿಲ್ಲ. ಇದರಿಂದಾಗಿ ಭಾರತೀಯ ಇನ್ನಿಂಗ್ಸ್ ಮುಕ್ತಾಯಗೊಳಿಸಬೇಕಾಯಿತು.

ಅತ್ತ ಆತಿಥೇಯ ಆಸೀಸ್ ತಂಡದ ಗೆಲುವಿಗೆ 90 ರನ್‌ಗಳ ಸುಲಭ ಗೆಲುವಿನ ಗುರಿ ಒಡ್ಡಿದೆ. ಇದು ಟೆಸ್ಟ್ ಕ್ರಿಕೆಟ್ ಇತಿಹಾಸದಲ್ಲಿ ಇನ್ನಿಂಗ್ಸ್‌ವೊಂದರಲ್ಲಿ ಭಾರತದಿಂದ ದಾಖಲಾದ ಅತಿ ಕನಿಷ್ಠ ಮೊತ್ತವಾಗಿದೆ.

ಮೊದಲ ಇನ್ನಿಂಗ್ಸ್‌ನಲ್ಲಿ 53 ರನ್‌ಗಳ ಮಹತ್ವದ ಮುನ್ನಡೆಯೊಂದಿಗೆ ದ್ವಿತೀಯ ಇನ್ನಿಂಗ್ಸ್‌ನಲ್ಲಿ 9/1 ಎಂಬಲ್ಲಿದ್ದ ಮೂರನೇ ದಿನದಾಟ ಮುಂದುವರಿಸಿದ ಟೀಮ್ ಇಂಡಿಯಾ ದೊಪ್ಪನೆ ಕುಸಿಯಿತು.

ಇದನ್ನೂ ಓದಿ:4,9,2,0,4,0,8,4,0,4,1: 36; ಟೀಂ ಇಂಡಿಯಾ ಆಟಗಾರರ ರನ್‌ಗಳಿವು...!

ಆಸೀಸ್ ವೇಗಿಗಳಾದ ಪ್ಯಾಟ್ ಕಮಿನ್ಸ್ ಹಾಗೂ ಜೋಶ್ ಹ್ಯಾಜಲ್‌ವುಡ್, ಎದುರಾಳಿಗಳ ಬ್ಯಾಟ್ಸ್‌ಮನ್‌ಗಳನ್ನು ಕಟ್ಟಿ ಹಾಕಿದರು. ಟೀಮ್ ಇಂಡಿಯಾದ ಯಾವನೇ ಬ್ಯಾಟ್ಸ್‌ಮನ್ ಎರಡಂಕಿಯನ್ನು ದಾಟಲಿಲ್ಲ.

ನೈಟ್ ವಾಚ್‌ಮ್ಯಾನ್ (2) ಹೊರದಬ್ಬಿದ ಕಮಿನ್ಸ್, ಭಾರತೀಯ ಪತನಕ್ಕೆ ನಾಂದಿ ಹಾಡಿದರು. ಚೇತೇಶ್ವರ ಪೂಜಾರ (0), ಮಯಂಕ್ ಅಗರವಾಲ್ (9), ಅಜಿಂಕ್ಯ ರಹಾನೆ (0) ಮತ್ತು ನಾಯಕ ವಿರಾಟ್ ಕೊಹ್ಲಿ (4) ಒಬ್ಬರ ಹಿಂದೆ ಒಬ್ಬರಂತೆ ಪೆವಿಲಿಯನ್ ಹಾದಿ ಹಿಡಿದರು.

ಈ ಮೂಲಕ 13.4 ಓವರ್‌ಗಳಲ್ಲಿ 19 ರನ್ ಗಳಿಸುವಷ್ಟರಲ್ಲಿ ಪ್ರಮುಖ ಆರು ವಿಕೆಟ್‌ಗಳನ್ನು ಕಳೆದುಕೊಂಡು ಭಾರಿ ಸಂಕಷ್ಟಕ್ಕೆ ಸಿಲುಕಿತ್ತು.ಇಲ್ಲಿಂದ ಬಳಿಕವು ಪರಿಸ್ಥಿತಿ ಭಿನ್ನವಾಗಿರಲಿಲ್ಲ. ಅಂತಿಮವಾಗಿ 21.2 ಓವರ್‌ಗಳಲ್ಲೇ 36 ರನ್‌ಗಳಿಗೆ ಒಂಬತ್ತು ವಿಕೆಟ್ ಕಳೆದುಕೊಂಡಿತು.

ಮೊಹಮ್ಮದ್ ಶಮಿ (1) ಕ್ರೀಸಿಗಿಳಿದರೂ ಗಾಯಗೊಂಡ ಪರಿಣಾಮ ಬ್ಯಾಟಿಂಗ್ ಮುಂದುವರಿಸಲಾಗದೇ ಪೆವಿಲಿಯನ್‌ಗೆ ಮರಳಿದರು. ಇನ್ನುಳಿದಂತೆ ಹನುಮ ವಿಹಾರಿ (8), ವೃದ್ಧಿಮಾನ್ ಸಹಾ (4), ರವಿಚಂದ್ರನ್ ಅಶ್ವಿನ್ (0) ಹಾಗೂ ಉಮೇಶ್ ಯಾದವ್ (4*) ರನ್ ಗಳಿಸಿದರು. ಈ ಮೊದಲು ಪೃಥ್ವಿ ಶಾ (4) ನಿರಾಸೆ ಮೂಡಿಸಿದ್ದರು.

ಆಸೀಸ್ ಪರ ಮಾರಕ ದಾಳಿ ಸಂಘಟಿಸಿದ ಜೋಶ್ ಹ್ಯಾಜಲ್‌ವುಡ್ 5 ಓವರ್‌ಗಳಲ್ಲಿ ಕೇವಲ 8 ರನ್ ತೆತ್ತು ಐದು ವಿಕೆಟ್ ಕಿತ್ತು ಮಿಂಚಿದರು. ಇದರಲ್ಲಿ ಮೂರು ಮೇಡನ್ ಓವರ್ ಸೇರಿತ್ತು. ಇವರಿಗೆ ತಕ್ಕ ಸಾಥ್ ನೀಡಿದ ಪ್ಯಾಟ್ ಕಮಿನ್ಸ್ 21 ರನ್ನಿಗೆ ನಾಲ್ಕು ವಿಕೆಟ್ ಕಿತ್ತು ನಿಖರ ದಾಳಿ ಸಂಘಟಿಸಿದರು.