ಮೂರನೇ ಜಯದ ಮೇಲೆ ಮುಂಬೈ ಕಣ್ಣು
ಇಂಡಿಯನ್ ಸೂಪರ್ ಲೀಗ್‌ ಫುಟ್ಬಾಲ್ ಟೂರ್ನಿ: ಇಂದು ಒಡಿಶಾ ವಿರುದ್ಧ ಪಂದ್ಯ
ಬ್ಯಾಂಬೊಲಿಮ್‌, ಗೋವಾ: ಇಂಡಿಯನ್ ಸೂಪರ್ ಲೀಗ್‌ (ಐಎಸ್‌ಎಲ್‌) ಫುಟ್ಬಾಲ್ ಟೂರ್ನಿಯಲ್ಲಿ ಸತತ ಮೂರನೇ ಜಯದ ನಿರೀಕ್ಷೆಯಲ್ಲಿರುವ ಮುಂಬೈ ಸಿಟಿ ಎಫ್‌ಸಿ ತಂಡವು ಭಾನುವಾರ ಒಡಿಶಾ ಎಫ್‌ಸಿ ತಂಡವನ್ನು ಎದುರಿಸಲಿದೆ.
ಮುಂಬೈ ತಾನಾಡಿದ ಮೊದಲ ಪಂದ್ಯದಲ್ಲಿ ನಾರ್ತ್‌ಈಸ್ಟ್ ಯುನೈಟೆಡ್‌ ಎಫ್‌ಸಿ ಎದುರು ಸೋತಿತ್ತು. ಎರಡನೇ ಪಂದ್ಯದಲ್ಲಿ 1–0ಯಿಂದ ಎಫ್‌ಸಿ ಗೋವಾ ಎದುರು ಗೆದ್ದಿತ್ತು. ಕೊನೆಯ ಪಂದ್ಯದಲ್ಲಿ 3–0ಯಿಂದ ಎಸ್‌ಸಿ ಈಸ್ಟ್ ಬೆಂಗಾಲ್ ಎದುರು ಗೆದ್ದಿತ್ತು.
ಪಾಯಿಂಟ್ಸ್ ಪಟ್ಟಿಯಲ್ಲಿ ಎರಡನೇ ಸ್ಥಾನದಲ್ಲಿರುವ ಮುಂಬೈ ತಂಡವು ಗೆಲುವಿಗೆ ಆ್ಯಡಂ ಲೆ ಫೊಂಡ್ರೆ ಹಾಗೂ ಬಾರ್ತೊಲೊಮಿವ್ ಒಗ್ಬೆಚೆ ಅವರನ್ನು ಹೆಚ್ಚಾಗಿ ಅವಲಂಬಿಸಿದೆ. ಈಸ್ಟ್ ಬೆಂಗಾಲ್ ಎದುರು ಫೊಂಡ್ರೆ ಎರಡು ಗೋಲು ಗಳಿಸಿದ್ದರು. ಮಿಡ್‌ ಫೀಲ್ಡರ್‌ಗಳಾದ ಅಹ್ಮದ್‌ ಜಾನೊಹ್‌, ಸೈ ಗೊಡ್ಡಾರ್ಡ್‌ ಅವರೂ ಮಿಂಚಲು ಸಜ್ಜಾಗಿದ್ದಾರೆ.
ಈಸ್ಟ್ ಬೆಂಗಾಲ್ ಎದುರು ಕಾಲ್ಚಳಕ ತೋರಿದ್ದ ಹೆರ್ನಾನ ಸಂಟಾನ ಕೂಡ ಅದ್ಭುತ ಲಯದಲ್ಲಿದ್ದಾರೆ.
ಈ ಆವೃತ್ತಿಯಲ್ಲಿ ಒಡಿಶಾ ಎಫ್‌ಸಿಗೆ ಒಂದು ಪಂದ್ಯದಲ್ಲೂ ಗೆಲುವು ಒಲಿದಿಲ್ಲ. ಆಡಿರುವ ಮೂರು ಪಂದ್ಯಗಳಲ್ಲಿ ಆ ತಂಡ ಎರಡರಲ್ಲಿ ಸೋಲು ಹಾಗೂ ಒಂದು ಡ್ರಾ ಸಾಧಿಸಿದೆ.
ಮೇಲ್ನೋಟಕ್ಕೆ ಮುಂಬೈ ಬಲಿಷ್ಠವಾಗಿದೆ. ಆದರೆ ಒಡಿಶಾ ಪುಟಿದೇಳುವ ನಿರೀಕ್ಷೆಯಿದೆ.
ತಾಜಾ ಸುದ್ದಿಗಾಗಿ ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ | ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ನಮ್ಮ ಫೇಸ್‌ಬುಕ್ ಪುಟ ಫಾಲೋ ಮಾಡಿ.