ಲಾರೆಯಸ್‌ ಕ್ರೀಡಾ ಪುರಸ್ಕಾರ: ಅಂತಿಮ ಐವರಲ್ಲಿ ಸಚಿನ್‌ ಹೆಸರು
ಫೆ. 16ರಂದು ಮುಗಿಯಲಿರುವ ಪ್ರಕ್ರಿಯೆ
ನವದೆಹಲಿ: ‘ಲಾರೆಯಸ್‌ಸ್ಪೋರ್ಟಿಂಗ್‌ ಮೋಮೆಂಟ್‌ 2000–2020’ (ಕ್ರೀಡಾ ಗಳಿಗೆ) ಪುರಸ್ಕಾರಕ್ಕಾಗಿ ಅಂತಿಮಗೊಳಿಸಲಾಗಿರುವ ಐವರು ಕ್ರೀಡಾ ತಾರೆಯರಲ್ಲಿ ಭಾರತದ ಕ್ರಿಕೆಟ್‌ ತಾರೆ ಸಚಿನ್‌ ತೆಂಡೂಲ್ಕರ್‌ ಸಹ ಒಳಗೊಂಡಿದ್ದಾರೆ.
ಮೂರನೇ ಹಾಗೂ ಅಂತಿಮ ಹಂತದ ಮತದಾನದ ನಂತರ ವಿಜೇತ ಕ್ರೀಡಾಪಟುವನ್ನು ಆಯ್ಕೆ ಮಾಡಲಾಗುವುದು. ಈ ಪ್ರಕ್ರಿಯೆ ಫೆ. 16ರಂದು ಮುಕ್ತಾಯಗೊಳ್ಳಲಿದೆ. ‘ಕ್ಯಾರೀಡ್‌ ಆನ್‌ ದಿ ಶೌಲ್ಡರ್ಸ್‌ ಆಫ್‌ ಎ ನೇಷನ್‌’ ಶೀರ್ಷಿಕೆಯ ಈ ಘಳಿಗೆಯು ಭಾರತ ತಂಡ 2011ರ ಐಸಿಸಿ ವಿಶ್ವಕಪ್‌ ಗೆದ್ದುಕೊಂಡ ಸಂದರ್ಭದ್ದು.
ಆ ವೇಳೆ ತಮ್ಮ ಆರನೇ ವಿಶ್ವಕಪ್‌ನಲ್ಲಿ ಆಡಿದ ತೆಂಡೂಲ್ಕರ್‌ ಮೊದಲ ಬಾರಿ ಯಶಸ್ಸು ಸವಿದಿದ್ದರು. ತವರು ಮುಂಬೈನಲ್ಲಿ ಭಾರತ ತಂಡ ಫೈನಲ್‌ನಲ್ಲಿ ಆರು ವಿಕೆಟ್‌ಗಳಿಂದ ಶ್ರೀಲಂಕಾ ತಂಡವನ್ನು ಸೋಲಿಸಿದ ನಂತರ ಆಟಗಾರರು ಅವರನ್ನು ಹೆಗಲ ಮೇಲೆ ಕೂರಿಸಿ ಕ್ರೀಡಾಂಗಣದ ಸುತ್ತುಹಾಕಿದ್ದರು.
ವಿಜೇತ ಕ್ರೀಡಾಪಟುವಿನ ಹೆಸರನ್ನು ಫೆಬ್ರುವರಿ 17ರಂದು ಲಾರೆಯಸ್‌ ವಿಶ್ವ ಕ್ರೀಡಾ ಪ್ರಶಸ್ತಿ ಮೇಳದಂದು ಬರ್ಲಿನ್‌ನಲ್ಲಿ ನೀಡಲಾಗುವುದು.
ತಾಜಾ ಸುದ್ದಿಗಾಗಿ ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ | ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ನಮ್ಮ ಫೇಸ್‌ಬುಕ್ ಪುಟ ಫಾಲೋ ಮಾಡಿ.