ನವದೆಹಲಿ: ಮಹಿಳೆಯರ ಮಿನಿ ಐಪಿಎಲ್ ಎಂದೇ ಹೇಳಲಾಗುವ ಚಾಲೆಂಜರ್ ಕ್ರಿಕೆಟ್ ಸರಣಿಯು ಯುನೈಟೆಡ್ ಅರಬ್ ಎಮಿರೇಟ್ಸ್ನಲ್ಲಿ ನವೆಂಬರ್ 4ರಿಂದ 9ರವರೆಗೆ ನಡೆಯಲಿದೆ. ಇಂಡಿಯನ್ ಪ್ರೀಮಿಯರ್ ಲೀಗ್ನ ಮೂಲಗಳು ಬುಧವಾರ ಈ ವಿಷಯ ಖಚಿತಪಡಿಸಿವೆ.
ಕೋವಿಡ್–19 ಪಿಡುಗಿನ ಹಿನ್ನೆಲೆಯಲ್ಲಿ ಭಾರತದಲ್ಲಿ ಮಹಿಳಾ ಕ್ರಿಕೆಟ್ ಚಟುವಟಿಕೆಗಳು ಸ್ಥಗಿತಗೊಂಡಿವೆ. ಮೂರು ತಂಡಗಳ ಸರಣಿಯು ಖಂಡಿತವಾಗಿಯೂ ನಡೆಯಲಿದೆ ಎಂದು ಅಧ್ಯಕ್ಷ ಸೌರವ್ ಗಂಗೂಲಿ ಅವರು ಹೇಳುತ್ತಲೇ ಬಂದಿದ್ದರೂ, ಭಾರತ ಕ್ರಿಕೆಟ್ ನಿಯಂತ್ರಣ ಮಂಡಳಿಗೆ(ಬಿಸಿಸಿಐ) ಟೀಕೆಗಳು ಕೇಳಿಬಂದಿದ್ದವು.
‘ಚಾಲೆಂಜರ್ ಸರಣಿಯ ವೇಳಾಪಟ್ಟಿ ಅಂತಿಮಗೊಂಡಿದೆ. ನವೆಂಬರ್ 4ರಿಂದ 9ರವರೆಗೆ ಯುಎಇಯಲ್ಲಿ ಟೂರ್ನಿ ನಡೆಯಲಿದೆ. ಟ್ರೇಲ್ಬ್ಲೇಜರ್ಸ್, ವೆಲೋಸಿಟಿ ಹಾಗೂ ಸೂಪರ್ನೋವಾಸ್ ತಂಡಗಳು ರೌಂಡ್ ರಾಬಿನ್ ಲೀಗ್ ಮಾದರಿಯಲ್ಲಿ ಸೆಣಸಲಿವೆ. ಫೈನಲ್ ಸೇರಿ ಒಟ್ಟು ನಾಲ್ಕು ಪಂದ್ಯಗಳು ನಡೆಯಲಿವೆ‘ ಎಂದು ಐಪಿಎಲ್ ಅಧಿಕಾರಿಯೊಬ್ಬರು ಹೇಳಿದ್ದಾರೆ.
‘ಮಹಿಳೆಯರ ಪಂದ್ಯಗಳಿಗೂ ಹೆಚ್ಚು ವೀಕ್ಷಕರು ಇರುವುದರಿಂದ, ಪುರುಷರ ಐಪಿಎಲ್ ಫೈನಲ್ ಪಂದ್ಯದ ದಿನ ಚಾಲೆಂಜರ್ ಸರಣಿಯ ಅಂತಿಮ ಪಂದ್ಯವನ್ನು ನಡೆಸುತ್ತಿಲ್ಲ‘ ಎಂದು ಅಧಿಕಾರಿ ನುಡಿದರು.
ಕಳೆದ ವಾರವಷ್ಟೇ, ಮಾಜಿ ಎಡಗೈ ಸ್ಪಿನ್ನರ್ ನೀತು ಡೇವಿಡ್ ನೇತೃತ್ವದಲ್ಲಿ ಬಿಸಿಸಿಐನ ನೂತನ ಮಹಿಳಾ ಆಯ್ಕೆ ಸಮಿತಿಯನ್ನು ರಚಿಸಲಾಗಿದೆ. ಇದೀಗ ಮೂರೂ ತಂಡಗಳನ್ನು ಆಯ್ಕೆ ಮಾಡುವ ಜವಾಬ್ದಾರಿ ಸಮಿತಿಯ ಮೇಲಿದೆ.
ತಾಜಾ ಸುದ್ದಿಗಾಗಿ ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ | ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ನಮ್ಮ ಫೇಸ್ಬುಕ್ ಪುಟ ಫಾಲೋ ಮಾಡಿ.