ನವದೆಹಲಿ: ಭಾರತ ಫುಟ್ಬಾಲ್ ತಂಡದ ಆಕ್ರಮಣಕಾರಿ ಆಟಗಾರ್ತಿ ಬಾಲಾ ದೇವಿ ಮತ್ತೆ ಅಂಗಣಕ್ಕೆ ಮರಳಿದ್ದಾರೆ. ಸ್ಕಾಟ್ಲೆಂಡ್ನಲ್ಲಿ ನಡೆಯುತ್ತಿರುವ ಸ್ಕಾಟಿಷ್ ಮಹಿಳಾ ಪ್ರೀಮಿಯರ್ ಲೀಗ್ನಲ್ಲಿ ಸೋಮವಾರ ಅವರು ರೇಂಜರ್ಸ್ ಎಫ್ಸಿ ಪರ ಸಬ್ಸ್ಟಿಟ್ಯೂಟ್ ಆಟಗಾರ್ತಿಯಾಗಿ ಕಣಕ್ಕಿಳಿದರು. ಅವರಿದ್ದ ತಂಡವು 5–1ರಿಂದ ಹಾರ್ಟ್ಸ್ ವಿಮೆನ್ಸ್ ಎಫ್ಸಿ ತಂಡವನ್ನು ಪರಾಭವಗೊಳಿಸಿತು.
30 ವರ್ಷದ ಮಣಿಪುರದ ಆಟಗಾರ್ತಿ, ಕೋವಿಡ್–19 ಪಿಡುಗು ಭಾರತದಲ್ಲಿ ಹರಡುತ್ತಿದ್ದ ಆರಂಭದಲ್ಲಿ ತರಬೇತಿಗಾಗಿ ಸ್ಕಾಟ್ಲೆಂಡ್ನ ಗ್ಲಾಸ್ಗೋದಲ್ಲಿ ಇದ್ದರು. ಲಾಕ್ಡೌನ್ ಜಾರಿಯಾದ ಕಾರಣ ಅಲ್ಲಿಯೇ ಉಳಿಯಲು ನಿರ್ಧರಿಸಿದ್ದರು.
ಸ್ಕಾಟಿಷ್ ಮಹಿಳಾ ಪ್ರೀಮಿಯರ್ ಲೀಗ್ ಭಾನುವಾರ ಆರಂಭವಾಗಿದೆ.
’ಫುಟ್ಬಾಲ್ ಅಂಗಣಕ್ಕೆ ಮರಳಿರುವುದು ಖುಷಿಯ ಸಂಗತಿ. ದೀರ್ಘಕಾಲದಿಂದ ಕ್ರೀಡೆಯಿಂದ ದೂರ ಉಳಿದಿದ್ದು ಕಷ್ಟ ಎನಿಸಿತ್ತು. ಆದರೆ ಈ ದೀರ್ಘಕಾಲದ ವಿರಾಮದಲ್ಲಿ ನಡೆಸಿದ ಪರಿಶ್ರಮಕ್ಕೆ ಫಲ ದೊರೆಯುತ್ತಿದೆ. ಗೆಲುವಿನೊಂದಿಗೆ ನಾವು ಅಭಿಯಾನ ಆರಂಭಿಸಿದ್ದೇವೆ‘ ಎಂದು ಬಾಲಾದೇವಿ ಹೇಳಿದ್ದಾಗಿ ಎಐಎಫ್ಎಫ್ ಡಾಟ್ ಕಾಮ್ ಉಲ್ಲೇಖಿಸಿದೆ.
ಬಾಲಾದೇವಿ ಒಂದೂವರೆ ವರ್ಷ ಸ್ಕಾಟ್ಲೆಂಡ್ನ ರೇಂಜರ್ಸ್ ಫುಟ್ಬಾಲ್ ಕ್ಲಬ್ನಲ್ಲಿ ಆಡಲಿದ್ದಾರೆ. ಬೆಂಗಳೂರು ಫುಟ್ಬಾಲ್ ಕ್ಲಬ್ ಜೊತೆ ಸಹಯೋಗ ಹೊಂದಿರುವ ರೇಂಜರ್ಸ್ ಕ್ಲಬ್ ಬಾಲಾದೇವಿ ಜೊತೆ ಒಪ್ಪಂದ ಮಾಡಿಕೊಂಡಿದೆ.
ತಾಜಾ ಸುದ್ದಿಗಾಗಿ ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ | ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ನಮ್ಮ ಫೇಸ್ಬುಕ್ ಪುಟ ಫಾಲೋ ಮಾಡಿ.