ಐಎಸ್‌ಎಲ್‌: ಮುಂಬೈ –ಎನ್‌ಇಯು ಪಂದ್ಯ ಡ್ರಾ
ಗುವಾಹಟಿ (ಪಿಟಿಐ): ಮೊದಲಾರ್ಧದಲ್ಲಿ 4 ಗೋಲುಗಳು ಮೂಡಿ ಬಂದರೂ ಮುಂಬೈ ಮತ್ತು ಆತಿಥೇಯ ನಾರ್ತ್ ಈಸ್ಟ್ ಯುನೈಟೆಡ್‌ ತಂಡಗಳ ನಡುವಿನ ಪಂದ್ಯ ಡ್ರಾದಲ್ಲಿ (2–2) ಮುಕ್ತಾಯಗೊಂಡಿತು.
ಇಲ್ಲಿನ ಇಂದಿರಾಗಾಂಧಿ ಅಥ್ಲೆಟಿಕ್ ಕ್ರೀಡಾಂಗಣದಲ್ಲಿ ಬುಧವಾರ ನಡೆದ ಇಂಡಿಯನ್ ಸೂಪರ್ ಲೀಗ್ (ಐಎಸ್‌ಎಲ್‌) ಫುಟ್‌ಬಾಲ್ ಟೂರ್ನಿಯ 25ನೇ ಪಂದ್ಯ ರೋಚಕ ಹೋರಾಟಕ್ಕೆ ಸಾಕ್ಷಿಯಾಯಿತು.
ಪನಾಜಿಯೊಟಿಸ್ ಟ್ರಿಯಾಡಿಸ್ 9ನೇ ನಿಮಿಷದಲ್ಲಿ ಮೋಹಕ ಗೋಲು ಗಳಿಸಿ ನಾರ್ತ್ ಈಸ್ಟ್ ಯುನೈಟೆಡ್‌ಗೆ ಮುನ್ನಡೆ ಗಳಿಸಿಕೊಟ್ಟರು. ಆದರೆ ಅಮೀನ್ ಚೆರ್ಮಿಟಿ 23 ಮತ್ತು 32ನೇ ನಿಮಿಷಗಳಲ್ಲಿ ಗೋಲು ಗಳಿಸಿ ಮುಂಬೈ ಪಾಳಯದಲ್ಲಿ ಸಂಭ್ರಮ ಮೂಡಿಸಿದರು.
42ನೇ ನಿಮಿಷದಲ್ಲಿ ಅಸಮೊಹ್ ಗ್ಯಾನ್ ತಿರುಗೇಟು ನೀಡುವುದರೊಂದಿಗೆ ಫುಟ್‌ಬಾಲ್ ಪ್ರಿಯರ ಕುತೂಹಲ ಹೆಚ್ಚಿತು. ಆದರೆ ದ್ವಿತೀಯಾರ್ಧದಲ್ಲಿ ಎರಡೂ ತಂಡಗಳು ಗೋಲು ಗಳಿಸಲು ನಡೆಸಿದ ಪ್ರಯತ್ನ ಫಲಿಸಲಿಲ್ಲ. ನಾರ್ತ್ ಈಸ್ಟ್ ಯುನೈಟೆಡ್‌ 4ನೇ ಸ್ಥಾನದಲ್ಲೂ ಮುಂಬೈ ಸಿಟಿ 7ನೇ ಸ್ಥಾನದಲ್ಲೂ ಉಳಿಯಿತು.
ತಾಜಾ ಸುದ್ದಿಗಾಗಿ ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ | ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ನಮ್ಮ ಫೇಸ್‌ಬುಕ್ ಪುಟ ಫಾಲೋ ಮಾಡಿ.