ಬೆಂಗಳೂರು ಯುನೈಟೆಡ್‌ ತಂಡಕ್ಕೆ ಗೆಲುವು

ಬೆಂಗಳೂರು: ಎಫ್‌ಸಿ ಬೆಂಗಳೂರು ಯುನೈಟೆಡ್‌ ತಂಡವು ಗುರುವಾರ ನಡೆದ ಸೂಪರ್‌ ಡಿವಿಷನ್‌ ಲೀಗ್‌ ಫುಟ್‌ಬಾಲ್‌ ಚಾಂಪಿಯನ್‌ಷಿಪ್‌ನ ಪಂದ್ಯದಲ್ಲಿ 6–0 ಗೋಲುಗಳಿಂದ ಬೆಂಗಳೂರು ಡ್ರೀಮ್‌ ಯುನೈಟೆಡ್‌ ಎಫ್‌ಸಿ ತಂಡವನ್ನು ಮಣಿಸಿತು.

ಬೆಂಗಳೂರು ಫುಟ್‌ಬಾಲ್‌ ಕ್ರೀಡಾಂಗಣದಲ್ಲಿ ನಡೆದ ಪಂದ್ಯದಲ್ಲಿ ಬೆಂಗಳೂರು ಯುನೈಟೆಡ್‌ ಪರ ನಿಖಿಲ್ ರಾಜ್ ಮುರುಗೇಶ್ ಕುಮಾರ್ (14ನೇ ಮತ್ತು 40ನೇ) ಎರಡು ಗೋಲು ಗಳಿಸಿದರು. ರಾಯನ್ ವಿಲ್ಫ್ರೆಡ್ ಎಸ್. (5ನೇ) ಮತ್ತು ಮೊಹಮ್ಮದ್‌ ಅಲ್ತಾಬ್ ಹುಸೇನ್ (36ನೇ) ಗೋಲು ಗಳಿಸಿದರು. ಡ್ರೀಮ್‌ ತಂಡದ ಬೂಬ್ನಾಳನ್ (39ನೇ ಮತ್ತು 40+1ನೇ) ಎದುರಾಳಿ ತಂಡಕ್ಕೆ ಎರಡು ಉಡುಗೊರೆ ಗೋಲು ನೀಡಿದರು. 

ಪರಿಕ್ರಮ ಎಫ್‌ಸಿ ತಂಡವು 2–0 ಗೋಲುಗಳಿಂದ ಎಎಸ್‌ಸಿ ಅಂಡ್‌ ಸೆಂಟರ್‌ ಎಫ್‌ಸಿ ತಂಡವನ್ನು ಸೋಲಿಸಿತು. ಪರಿಕ್ರಮ ತಂಡದ ತಂಗ್ಜಲೆನ್ ಹಾವೋಕಿಪ್ (90+1ನೇ) ಗೋಲು ಗಳಿಸಿದರು. ಎಎಸ್‌ಸಿ ತಂಡದ ಸೌಬಮ್ ರೊನಾಲ್ಡೊ ಸಿಂಗ್ (56ನೇ) ಎದುರಾಳಿ ತಂಡಕ್ಕೆ ಉಡುಗೊರೆ ಗೋಲು ನೀಡಿದರು.

ಮತ್ತೊಂದು ಪಂದ್ಯದಲ್ಲಿ ಎಂಇಜಿ ಅಂಡ್‌ ಸೆಂಟರ್‌ ಎಫ್‌ಸಿ ತಂಡವು ರೂಟ್ಸ್‌ ಎಫ್‌ಸಿ ತಂಡದೊಂದಿಗೆ ಗೋಲುರಹಿತವಾಗಿ ಡ್ರಾ ಸಾಧಿಸಿತು.