ಹಾಕಿ: ಭಾರತದ ಜಯ ತಪ್ಪಿಸಿದ ಇಂಗ್ಲೆಂಡ್

ಬರ್ಮಿಂಗ್‌ಹ್ಯಾಮ್: ಪಂದ್ಯದ ಮೊದಲಾರ್ಧ ಅವಧಿಯಲ್ಲಿ ಮೂರು ಗೋಲುಗಳ ಮುನ್ನಡೆಯಿದ್ದರೂ ಜಯ ಗಳಿಸಲು ಭಾರತ ತಂಡಕ್ಕೆ ಸಾಧ್ಯವಾಗಲಿಲ್ಲ. ದಿಟ್ಟ ಆಟವಾಡಿದ ಇಂಗ್ಲೆಂಡ್ 4–4ರಿಂದ ಸಮಬಲ ಸಾಧಿಸಿತು.

ಸೋಮವಾರ ನಡೆದ ಬಿ ಗುಂಪಿನ ಪುರುಷರ ಹಾಕಿ ಪಂದ್ಯದಲ್ಲಿ ಲಲಿತ್ ಉಪಾಧ್ಯಾಯ (3ನೇ ನಿ), ಮನದೀಪ್ ಸಿಂಗ್ (13 ಮತ್ತು 22 ನಿ) ಪ್ರಥಮಾರ್ಧದಲ್ಲಿಯೇ ಭಾರತಕ್ಕೆ 3–0 ಮುನ್ನಡೆ ಗಳಿಸಿಕೊಟ್ಟಿದ್ದರು. 46ನೇ ನಿಮಿಷದಲ್ಲಿಹರ್ಮನ್‌ಪ್ರೀತ್ ಸಿಂಗ್ ಪೆನಾಲ್ಟಿ ಕಾರ್ನರ್‌ ಅವಕಾಶವನ್ನು ಗೋಲಿನಲ್ಲಿ ಪರಿವರ್ತಿಸಿದರು.

ದ್ವಿತೀಯಾರ್ಧದಲ್ಲಿ ಪುಟಿದೆದ್ದ ಇಂಗ್ಲೆಂಡ್ ಆಟಗಾರರು ಅಮೋಘ ಆಟವಾಡಿದರು. ಲಿಯಾಮ್ ಅನ್ಸೆಲ್ (42ನೇ ನಿ), ನಿಕ್ ಬ್ಯಾಂಡುರಕ್ (47ನೆ ನಿ, 53ನಿ) ಹಾಗೂ ಫಿಲ್ ರಾಪರ್ (53 ನಿ) ಗೋಲು ಗಳಿಸಿ ತಂಡವನ್ನು ಸೋಲಿನಿಂದ ಪಾರು ಮಾಡಿದರು. ಪಂದ್ಯದ ಮುಕ್ತಾಯಕ್ಕೆ ಎರಡು ನಿಮಿಷ ಬಾಕಿಯಿದ್ದಾಗ ಇಂಗ್ಲೆಂಡ್‌ ಪೆನಾಲ್ಟಿ ಅವಕಾಶ ಪಡೆದಿತ್ತು. ಭಾರತದ ರಕ್ಷಣಾ ಪಡೆಯು ಇಂಗ್ಲೆಂಡ್ ಗೋಲು ಗಳಿಕೆಯ ಗುರಿಯನ್ನು ತಪ್ಪಿಸಿದರು.

ಬುಧವಾರ ನಡೆಯುವ ಪಂದ್ಯದಲ್ಲಿ ಭಾರತವು ಕೆನಡಾ ತಂಡವನ್ನು ಎದುರಿಸಲಿದೆ.