ಅಕ್ರಮಕ್ಕೆ ಬೆಂಬಲ ನೀಡಿದ ಲೆಮೈನ್ ಡಿಯಾಕ್‌ಗೆ 2 ವರ್ಷ ಜೈಲು

ಪ್ಯಾರಿಸ್: ಉದ್ದೀಪನ ಮದ್ದು ಸೇವನೆಗೆ ಬೆಂಬಲ ಸೇರಿದಂತೆ ಕ್ರೀಡಾ ಕ್ಷೇತ್ರದ ಬಹುಕೋಟಿ ಅಕ್ರಮದಲ್ಲಿ ಭಾಗಿಯಾದ ಅಂತರರಾಷ್ಟ್ರೀಯ ಅಥ್ಲೆಟಿಕ್ಸ್ ಫೆಡರೇಷನ್‌ನ ಮಾಜಿ ಅಧ್ಯಕ್ಷ ಲೆಮೈನ್ ಡಿಯಾಕ್‌ಗೆ ಪ್ಯಾರಿಸ್‌ ಕೋರ್ಟ್‌ ಎರಡು ವರ್ಷಗಳ ಜೈಲು ಶಿಕ್ಷೆ ವಿಧಿಸಿದೆ.

1999ರಿಂದ 2015ರ ವರೆಗೆ ಫೆಡರೇಷನ್‌ನ ಅಧ್ಯಕ್ಷರಾಗಿದ್ದ ಡಿಯಾಕ್‌ಗೆ ಈಗ 87 ವರ್ಷ. ಉದ್ದೀಪನ ಮದ್ದು ಸೇವಿಸಿದ್ದ ರಷ್ಯಾದ ಕ್ರೀಡಾಪಟುಗಳಿಗೆ ಅಥ್ಲೆಟಿಕ್ ಕೂಟಗಳಲ್ಲಿ ಪಾಲ್ಗೊಳ್ಳಲು ಅವಕಾಶ ಮಾಡಿಕೊಟ್ಟ ವಿವಿಧ ಭ್ರಷ್ಟಾಚಾರ ಪ್ರಕರಣಗಳಲ್ಲಿ ಅವರು ಆರೋಪಿ ಎಂದು ಸಾಬೀತಾಗಿದೆ. ಆದರೆ ಹಣದ ಅಕ್ರಮ ವರ್ಗಾವಣೆ ಪ್ರಕರಣದಲ್ಲಿ ನಿರ್ದೋಷಿ ಎಂದು ನ್ಯಾಯಾಲಯ ಘೋಷಿಸಿತು. ಒಟ್ಟಾರೆ ₹ ನಾಲ್ಕು ಕೋಟಿ 36 ಲಕ್ಷ ಮೊತ್ತದ ದಂಡ ವಿಧಿಸಿತು.

ಡಿಯಾಕ್ ಅವರ ಪುತ್ರ ಪಾಪಾ ಮಸಾಟ ಡಿಯಾಕ್ ಅವರನ್ನೂ ಅಪರಾಧಿ ಎಂದು ಘೋಷಿಸಲಾಗಿದೆ. ಅವರು ಫೆಡರೇಷನ್‌ನ ಮಾರುಕಟ್ಟೆ ಸಲಹೆಗಾರರಾಗಿ ಕಾರ್ಯನಿರ್ವಹಿಸಿದ್ದರು. ಅವರು ಈಗ ಸೆನೆಗಲ್‌ನಲ್ಲಿ ವಾಸವಾಗಿರುವುದರಿಂದ ಬಂಧನಕ್ಕೆ ತೊಡಕಾಗಿದೆ.

2012ರ ಒಲಿಂಪಿಕ್ಸ್‌ಗೂ ಮುನ್ನ ನಡೆದ ಭ್ರಷ್ಟಾಚಾರದಲ್ಲಿ ಡಿಯಾಕ್ ಹೆಸರು ಪ್ರಮುಖವಾಗಿ ಕೇಳಿಬಂದಿದ್ದು ಕ್ರೀಡಾಪಟುಗಳು ಉದ್ದೀಪನ ಮದ್ದು ಸೇವಿಸಿದ್ದನ್ನು ಮುಚ್ಚಿಹಾಕಲು ಕೋಟ್ಯಂತರ ಮೊತ್ತ ಪಡೆದಿರುವುದು ಸಾಬೀತಾಗಿದೆ.

ಐಎಎಎಫ್‌ ಅಧ್ಯಕ್ಷನಾಗಿದ್ದ ಸಂದರ್ಭದಲ್ಲಿ ಡಿಯಾಕ್ ಅವರು ಒಲಿಂಪಿಕ್ಸ್‌ಗೆ ಸಂಬಂಧಿಸಿ ಅತ್ಯಂತ ಪ್ರಭಾವಿ ವ್ಯಕ್ತಿಯಾಗಿದ್ದರು. ಆದರೆ ವಿವಾದಗಳ ಹಿನ್ನೆಲೆಯಲ್ಲಿ ಅವರು 2015ರಲ್ಲಿ ಪದತ್ಯಾಗ ಮಾಡಬೇಕಾಯಿತು. ಇದು ಅಂತರರಾಷ್ಟ್ರೀಯ ಅಥ್ಲೆಟಿಕ್ಸ್ ಫೆಡರೇಷನ್‌ಗೆ ಕಪ್ಪು ಚುಕ್ಕೆಯಾಗಿತ್ತು. ನಂತರ ಅವರನ್ನು ಫ್ರಾನ್ಸ್‌ನಲ್ಲಿ ಬಂಧಿಸಲಾಯಿತು. ಆರೋಪಿ ಅಥ್ಲೀಟ್‌ಗಳ ರಕ್ಷಣೆಗಾಗಿ ಅವರು ಹಣ ಪಡೆದುಕೊಂಡಿರುವ ವಿಷಯವನ್ನು ನಂತರ ತನಿಖಾಧಿಕಾರಿಗಳು ಬಯಲು ಮಾಡಿದ್ದರು.

₹ 29 ಕೋಟಿ 45 ಲಕ್ಷ ಮೊತ್ತದ ವ್ಯವಹಾರ: ಸುಮಾರು ₹ 29 ಕೋಟಿ 45 ಲಕ್ಷ ಮೊತ್ತವನ್ನು ಅವರು ಅಥ್ಲೀಟ್‌ಗಳಿಂದ ಪಡೆದುಕೊಂಡಿದ್ದಾರೆ ಎಂದು ಅಂದಾಜಿಸಲಾಗಿದೆ. ಸೆನೆಗಲ್‌ನ ರಾಜಕೀಯದಲ್ಲಿ ಬಳಸುವುದಕ್ಕಾಗಿ ರಷ್ಯಾದಿಂದ ₹ 11 ಕೋಟಿ ಮೊತ್ತ ಪಡೆದುಕೊಂಡಿದ್ದಾರೆ ಎಂದೂ ಆರೋಪಿಸಲಾಗಿದೆ. 2012ರಲ್ಲಿ ನಡೆದಿದ್ದ ಅಧ್ಯಕ್ಷೀಯ ಮತ್ತು ಶಾಸನ ಸಭೆಯ ಚುನಾವಣೆಯಲ್ಲಿ ಈ ಹಣವನ್ನು ತೊಡಗಿಸಿಕೊಳ್ಳಲಾಗಿದೆ ಎಂದು ಹೇಳಲಾಗಿದೆ.

ರಷ್ಯಾದ ಬ್ಯಾಂಕ್‌, ಚೀನಾದ ತೈಲ ಉದ್ಯಮ, ದಕ್ಷಿಣ ಕೊರಿಯಾದ ತಂತ್ರಜ್ಞಾನ ಕ್ಷೇತ್ರದಲ್ಲಿ ಮಗನಿಗಾಗಿ ಅವರು ಹಣ ಹೂಡಿದ್ದರು ಎನ್ನಲಾಗಿದೆ.