ಫ್ರೆಂಚ್‌ ಓಪನ್‌ ಟೆನಿಸ್‌: ಸಬಲೆಂಕಾ, ಝೆಂಗ್‌ ಶುಭಾರಂಭ

ಪ್ಯಾರಿಸ್‌: ವಿಶ್ವದ ಅಗ್ರಮಾನ್ಯ ಆಟಗಾರ್ತಿ ಅರಿನಾ ಸಬಲೆಂಕಾ ಇಲ್ಲಿ ಭಾನುವಾರ ಆರಂಭಗೊಂಡ ಫ್ರೆಂಚ್‌ ಓಪನ್‌ ಟೆನಿಸ್‌ ಟೂರ್ನಿಯಲ್ಲಿ ನಿರಾಯಾಸವಾಗಿ ಎರಡನೇ ಸುತ್ತಿಗೆ ಮುನ್ನಡೆದರು.

ರೋಲ್ಯಾಂಡ್ ಗ್ಯಾರೋಸ್‌ನಲ್ಲಿ ತಮ್ಮ ಎಂಟನೇ ವರ್ಷದ ಅಭಿಯಾನ ಆರಂಭಿಸಿದ ಬೆಲಾರಸ್‌ನ ತಾರೆ ಮಹಿಳೆಯರ ಸಿಂಗಲ್ಸ್‌ನ ಮೊದಲ ಸುತ್ತಿನಲ್ಲಿ 6-1, 6-0 ಅಂತರದಿಂದ ರಷ್ಯಾದ ಕಮಿಲ್ಲಾ ರಾಖಿಮೋವಾ ಅವರನ್ನು ಹಿಮ್ಮೆಟ್ಟಿಸಿದರು.

ಸತತ ಮೂರು ಬಾರಿ (2023ರಿಂದ 25) ಇಲ್ಲಿ ಚಾಂಪಿಯನ್‌ ಆಗಿರುವ ಇಗಾ ಶ್ವಾಂಟೆಕ್‌ ಪ್ರಸಕ್ತ ಋತುವಿನಲ್ಲಿ ಲಯ ಕಂಡುಕೊಳ್ಳಲು ಪರದಾಡುತ್ತಿದ್ದಾರೆ. ಈ ಮಧ್ಯೆ 27 ವರ್ಷದ ಸಬಲೆಂಕಾ ನಾಲ್ಕನೇ ಗ್ರ್ಯಾನ್‌ಸ್ಲಾಮ್ ಕಿರೀಟದ ಮೇಲೆ ಕಣ್ಣಿಟ್ಟಿದ್ದಾರೆ.

ಪ್ಯಾರಿಸ್‌ ಒಲಿಂಪಿಕ್‌ ಚಾಂಪಿಯನ್‌ ಝೆಂಗ್‌ ಕ್ವಿನ್ವೆನ್‌ ಅವರೂ ಶುಭಾರಂಭ ಮಾಡಿದರು. ಎಂಟನೇ ಶ್ರೇಯಾಂಕದ ಝೆಂಗ್‌ 6-4, 6-3ರಿಂದ ಫ್ರೆಂಚ್ ಓಪನ್ ಮಾಜಿ ರನ್ನರ್ ಅಪ್ ಅನಸ್ತೇಸಿಯಾ ಪಾವ್ಲಿಚೆಂಕೋವಾ (ರಷ್ಯಾ) ಅವರನ್ನು ಸೋಲಿಸಿ ಎರಡನೇ ಸುತ್ತು ಪ್ರವೇಶಿಸಿದರು.

13ನೇ ಶ್ರೇಯಾಂಕದ ಎಲಿನಾ ಸ್ವಿಟೋಲಿನಾ (ಉಕ್ರೇನ್‌) 6-1, 6-1ರಿಂದ ಟರ್ಕಿಯ ಝೆಯ್ನೆಪ್ ಸೊನ್ಮೆಜ್ ಅವರನ್ನು ಸೋಲಿಸಿದರು.‌ ಈ ಮಧ್ಯೆ ಶ್ರೇಯಾಂಕರಹಿತ ಆಟಗಾರ್ತಿ ಇವಾ ಲೈಸ್ (ಜರ್ಮನಿ) 6-0, 6-3ರಿಂದ 28ನೇ ಶ್ರೇಯಾಂಕದ ಪೇಟನ್ ಸ್ಟಿಯರ್ನ್ಸ್ (ಅಮೆರಿಕ) ಅವರಿಗೆ ಆಘಾತ ನೀಡಿದರು.

ಮುಸೆಟ್ಟಿ ಮುನ್ನಡೆ:

ಪುರುಷರ ಸಿಂಗಲ್ಸ್‌ನಲ್ಲಿ ಎಂಟನೇ ಶ್ರೇಯಾಂಕದ ಲೊರೆಂಝೊ ಮುಸೆಟ್ಟಿ ಶುಭಾರಂಭ ಮಾಡಿದರು. ಇಟಲಿಯ ಆಟಗಾರ ಮೊದಲ ಸುತ್ತಿನಲ್ಲಿ 7–5, 6–2, 6–0ರಿಂದ ಜರ್ಮನಿಯ ಯಾನಿಕ್ ಹಾಫ್‌ಮನ್ ಅವರನ್ನು ಸೋಲಿಸಿದರು.

12ನೇ ಶ್ರೆಯಾಂಕದ ಟಾಮಿ ಪಾಲ್ (ಅಮೆರಿಕ) ಆರಂಭಿಕ ಹಿನ್ನಡೆಯಿಂದ ಚೇತರಿಸಿಕೊಂಡು 6-7 (5/7), 6-2, 6-3, 6-1ರಿಂದ ಡೆನ್ಮಾರ್ಕ್‌ನ ಎಲ್ಮರ್ ಮೊಲ್ಲರ್ ವಿರುದ್ಧ ಗೆದ್ದರು.