ಚೀನಾ ಓಪನ್ ಸೂಪರ್‌ ಬ್ಯಾಡ್ಮಿಂಟನ್‌ ಟೂರ್ನಿ: ಸಿಂಧುಗೆ ಮಣಿದ ಮಿಯಾಝಾಕಿ

ಚಾಂಗ್‌ಝೌ: ವಿಶ್ವದ ಆರನೇ ಕ್ರಮಾಂಕದ ಆಟಗಾರ್ತಿ ಟೊಮೊಕಾ ಮಿಯಾಝಾಕಿ ಅವರನ್ನು ಸೋಲಿಸುವ ಮೂಲಕ ಭಾರತದ ಪಿ.ವಿ.ಸಿಂಧು ಚೀನಾ ಓಪನ್ ಸೂಪರ್‌ ಬ್ಯಾಡ್ಮಿಂಟನ್‌ ಟೂರ್ನಿಯಲ್ಲಿ ಬುಧವಾರ ಭರವಸೆಯ ಆರಂಭ ಮಾಡಿದರು.

ಎರಡು ಒಲಿಂಪಿಕ್ಸ್‌ಗಳಲ್ಲಿ ಪದಕ ಗೆದ್ದಿರುವ ಸಿಂಧು 21–15, 8–21, 21–17 ರಿಂದ ಮಾಜಿ ವಿಶ್ವ ಜೂನಿಯರ್ ಚಾಂಪಿಯನ್ ಮಿಯಾಝಾಕಿ ಅವರನ್ನು ಸೋಲಿಸಿದರು. 62 ನಿಮಿಷಗಳಲ್ಲಿ ಗೆದ್ದ ಹೈದರಾಬಾದಿನ ಆಟಗಾರ್ತಿ ಪ್ರಿಕ್ವಾರ್ಟರ್‌ಫೈನಲ್ ತಲುಪಿದರು.

‘ಇದು ನಾನು ಬಹುಕಾಲದಿಂದ ಕಾಯುತ್ತಿದ್ದ ಗೆಲುವು. ಮೊದಲ ಸುತ್ತು ದಾಟುವುದು ನನಗೆ ಬಹಳ ಮಹತ್ವದ್ದಾಗಿತ್ತು’ ಎಂದು 30 ವರ್ಷ ವಯಸ್ಸಿನ ಸಿಂಧು ಪ್ರತಿಕ್ರಿಯಿಸಿದರು. ‘ನಾನು ಉತ್ತಮ ಆರಂಭ ಮಾಡಿದೆ. ಆದರೆ ಎರಡನೇ ಗೇಮ್‌ನಲ್ಲಿ ನಿಯಂತ್ರಣ ಸಾಧಿಸುವುದು ಕಠಿಣವಾಯಿತು. ಮೂರನೇ ಗೇಮ್‌ನಲ್ಲಿ ಆರಂಭದಲ್ಲೇ ಲೀಡ್‌ ಪಡೆದು ಅದನ್ನು ಕಾಪಾಡಿಕೊಳ್ಳುವುದು ನನಗೆ ಮುಖ್ಯವಾಗಿತ್ತು’ ಎಂದೂ ಹೇಳಿದರು.

ಭಾರತದ ಆಟಗಾರ್ತಿ ಮುಂದಿನ ಸುತ್ತಿನಲ್ಲಿ ಸ್ವದೇಶದ ಉದಯೋನ್ಮುಖ ಆಟಗಾರ್ತಿ ಉನ್ನತಿ ಹೂಡಾ ಅವರನ್ನು ಎದುರಿಸಲಿದ್ದಾರೆ. 

17 ವರ್ಷ ವಯಸ್ಸಿನ ಉನ್ನತಿ 21–11, 21–16 ರಿಂದ ಎರಡಯ ಬಾರಿ ಕಾಮನ್ವೆಲ್ತ್‌ ಕ್ರೀಡೆಗಳ ಪದಕ ವಿಜೇತೆ, ಸ್ಕಾಟ್ಲೆಂಡ್‌ನ  ಕಿರ್ಸ್ಟಿ ಗಿಲ್ಮೊರ್ ಅವರಿಗೆ ಆಘಾತ ನೀಡಿದರು. ಎರಡು ಸೂಪರ್ 100 ಟೂರ್ನಿಗಳಲ್ಲಿ (2022ರ ಒಡಿಶಾ ಮಾಸ್ಟರ್ಸ್‌, 2023ರ ಅಬುಧಾಬಿ ಮಾಸ್ಟರ್ಸ್‌) ಪ್ರಶಸ್ತಿ ಗೆದ್ದಿರುವ ಉನ್ನತಿ ಕೇವಲ 36 ನಿಮಿಷಗಳಲ್ಲಿ ಗೆಲುವು ಪಡೆದರು.

ವಿಶ್ವದ 15ನೇ ಕ್ರಮಾಂಕದ ಡಬಲ್ಸ್ ಜೋಡಿಯಾದ ಸಾತ್ವಿಕ್‌ಸಾಯಿರಾಜ್ ರಣಕಿರೆಡ್ಡಿ ಮತ್ತು ಚಿರಾಗ್‌ ಶೆಟ್ಟಿ ಕೂಡ ಉತ್ತಮ ಆರಂಭ ಮಾಡಿದರು. ಮೊದಲ ಸುತ್ತಿನಲ್ಲಿ ಜಪಾನ್‌ನ ಕೆನ್ಯಾ ಮಿತ್ಸುಹಶಿ– ಹಿರೋಕಿ ಒಕಾಮುರಾ ಅವರನ್ನು ಕೇವಲ 31 ನಿಮಿಷಗಳಲ್ಲಿ 21–13, 21–9 ರಿಂದ ಸೋಲಿಸಿದರು.

ಮುಂದಿನ ಸುತ್ತಿನಲ್ಲಿ ಭಾರತದ ಆಟಗಾರರು, ಎಂಟನೇ ಶ್ರೇಯಾಂಕದ ಇಂಡೊನೇಷ್ಯಾದ ಜೋಡಿ ಲಿಯೊ ರೋಲಿ ಕರ್ನಾಂಡೊ– ಬಗಾಸ್‌ ಮೌಲಾನಾ ಅವರನ್ನು ಎದುರಿಸಲಿದ್ದಾರೆ.

ವಿಶ್ವದ ಮಾಜಿ ಅಗ್ರಮಾನ್ಯ ಜೋಡಿ ‘ಸೆಮಿಫೈನಲ್ ತಡೆ’ ದಾಟಲು ಯತ್ನಿಸುತ್ತಿದೆ. ಭಾರತದ ಆಟಗಾರರು ಈ ವರ್ಷ ಮಲೇಷ್ಯಾ ಓಪನ್‌, ಇಂಡಿಯಾ ಓಪನ್‌ ಮತ್ತು ಸಿಂಗಪುರ ಓಪನ್ ಸೆಮಿಫೈನಲ್‌ನಲ್ಲಿ ಸೋತಿದ್ದರು.

ಆದರೆ ಮಹಿಳೆಯರ ಡಬಲ್ಸ್‌ನಲ್ಲಿ ರುತುಪರ್ಣಾ ಪಂಡಾ– ಶ್ವೇತಪರ್ಣ ಪಂಡಾ ಜೋಡಿ 12–21, 13–21 ರಲ್ಲಿ ಹಾಂಗ್‌ಕಾಂಗ್‌ನ ಗಾ ಟಿಂಗ್‌ ಇಯುಂಗ್– ಪುಯಿ ಲಾಮ್‌ ಇಯುಂಗ್ ಜೋಡಿಯನ್ನು ಸೋಲಿಸಿತು. ಎರಡೂ ಜೋಡಿಗಳಲ್ಲಿದ್ದವರು ಅಕ್ಕ–ತಂಗಿಯರು ಎನ್ನುವುದು ವಿಶೇಷ.