ಬ್ಯಾಡ್ಮಿಂಟನ್ ಟೂರ್ನಿ: ಫೈನಲ್‌ಗೆ ಶ್ರೀಕಾಂತ್, ಟ್ರೀಸಾ–ಗಾಯತ್ರಿ
ಲಖನೌ: ಮಾಜಿ ಚಾಂಪಿಯನ್ ಕಿದಂಬಿ ಶ್ರೀಕಾಂತ್ ಅವರು ಮೂರು ಗೇಮ್‌ಗಳ ಸೆಣಸಾಟದಲ್ಲಿ ಕನ್ನಡಿಗ ಮಿಥುನ್ ಮಂಜುನಾಥ್ ಅವರನ್ನು ಸೋಲಿಸಿ ಸೈಯ್ಯದ್ ಮೋದಿ ಅಂತರರಾಷ್ಟ್ರೀಯ ಬ್ಯಾಡ್ಮಿಂಟನ್ ಟೂರ್ನಿಯ ಫೈನಲ್ ತಲುಪಿದರು. ಮಹಿಳೆಯರ ವಿಭಾಗದ ಡಬಲ್ಸ್‌ನಲ್ಲಿ ಹಾಲಿ ಚಾಂಪಿಯನ್ ಟ್ರೀಸಾ ಜೋಳಿ ಮತ್ತು ಗಾಯತ್ರಿ ಗೋಪಿಚಂದ್ ಜೋಡಿ ಪ್ರಶಸ್ತಿ ಸುತ್ತಿಗೆ ಲಗ್ಗೆಯಿಟ್ಟಿತು.
32 ವರ್ಷ ವಯಸ್ಸಿನ ಶ್ರೀಕಾಂತ್ ಶನಿವಾರ ನಡೆದ ಸಿಂಗಲ್ಸ್ ಸೆಮಿಫೈನಲ್ ಪಂದ್ಯದಲ್ಲಿ, 2023ರ ರಾಷ್ಟ್ರೀಯ ಚಾಂಪಿಯನ್ ಮಿಥುನ್ ಅವರ ಸ್ಫೂರ್ತಿಯುತ ಸವಾಲನ್ನು 21–15, 19–21, 21–13 ರಲ್ಲಿ ಬದಿಗೊತ್ತಿದರು. ಶ್ರೀಕಾಂತ್ 2016ರಲ್ಲಿ ಈ ಟೂರ್ನಿಯಲ್ಲಿ ಚಾಂಪಿಯನ್ ಆಗಿದ್ದರು.
‘ಉತ್ತಮ ಆರಂಭ ಪಡೆದು, ತಪ್ಪುಗಳನ್ನು ಕಡಿಮೆಯಾಗುವಂತೆ ನೋಡಿಕೊಳ್ಳುವುದು ಮುಖ್ಯವಾಗಿತ್ತು. ನನ್ನ ಎದುರು ಅವರು (ಮಿಥುನ್) ಇದುವರೆಗಿನ ಪಂದ್ಯಗಳಲ್ಲಿ ಉತ್ತಮವಾಗಿ ಆಡಿದ್ದಾರೆ. ಹೀಗಾಗಿ ನನ್ನ ಆಟದಿಂದ ಸಂತೃಪ್ತಿಯಾಗಿದೆ’ ಎಂದು ಶ್ರೀಕಾಂತ್ ಪ್ರತಿಕ್ರಿಯಿಸಿದರು.
ಈ ವರ್ಷ ಮಲೇಷ್ಯಾ ಮಾಸ್ಟರ್ಸ್‌ ಫೈನಲ್ ತಲುಪಿದ್ದ ಶ್ರೀಕಾಂತ್ ಅವರು ಫೈನಲ್‌ನಲ್ಲಿ ಹಾಂಗ್‌ಕಾಂಗ್‌ನ ಜೇಸನ್ ಗುನವಾನ್ ಅವರನ್ನು ಎದುರಿಸಲಿದ್ದಾರೆ.
ವಿಶ್ವ ಕ್ರಮಾಂಕದಲ್ಲಿ 14ನೇ ಸ್ಥಾನದಲ್ಲಿರುವ ಟ್ರೀಸಾ– ಗಾಯತ್ರಿ ಜೋಡಿ ಡಬಲ್ಸ್ ಸೆಮಿಫೈನಲ್‌ನಲ್ಲಿ ತಂತ್ರಗಾರಿಕೆ ಮತ್ತು ಉತ್ತಮ ನಿಯಂತ್ರಣದೊಡನೆ ಆಡಿ ಮಲೇಷ್ಯಾದ ಒಂಗ್ ಕ್ಸಿನ್ ಯೀ– ಕಾರ್ಮೆನ್ ತಿಂಗ್‌ ಜೋಡಿಯನ್ನು ಮಣಿಸಿತು. ಮಲೇಷ್ಯಾದ ಜೋಡಿ 33ನೇ ಕ್ರಮಾಂಕ ಪಡೆದಿದೆ.
ಭುಜದ ನೋವಿಗಾಗಿ ಐದು ತಿಂಗಳು ವಿಶ್ರಾಂತಿಯಲ್ಲಿದ್ದ ಗಾಯತ್ರಿ, ಪುನರಾಗಮನದ ಬಳಿಕ ಆಡುತ್ತಿರುವ ಎರಡನೇ ಟೂರ್ನಿ ಇದಾಗಿದೆ. ಟ್ರೀಸಾ–ಗಾಯತ್ರಿ ಜೋಡಿ ಭಾನುವಾರ ನಡೆಯುವ ಫೈನಲ್ ಪಂದ್ಯದಲ್ಲಿ ಎಂಟನೇ ಶ್ರೇಯಾಂಕದ ಕಾಹೊ ಒಸಾವ– ಮಾಯಿ ತನಾಬೆ ಜೋಡಿಯನ್ನು ಎದುರಿಸಲಿದೆ.
‘ದೀರ್ಘಕಾಲದ ನಂತರ ಮರಳಿರುವುದು ಸಂತಸ ಮೂಡಿಸಿದೆ. ನಾವು ಇಲ್ಲಿ ಹಾಲಿ ಚಾಂಪಿಯನ್ ಆಗಿದ್ದು, ನಾಳೆ ಫೈನಲ್ ಆಡುತ್ತಿರುವುದು ಖುಷಿ ಉಂಟುಮಾಡಿದೆ’ ಎಂದು ಗಾಯತ್ರಿ ಪ್ರತಿಕ್ರಿಯಿಸಿದರು.
‘ಪಂದ್ಯ ನಮ್ಮ ನಿಯಂತ್ರಣದಲ್ಲಿತ್ತು. ನಾವು ಸಂಯಮದಿಂದ ಆಡಿದೆವು’ ಎಂದು ಟ್ರೀಸಾ ಹೇಳಿದರು.
ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ವಾಟ್ಸ್ಆ್ಯಪ್, ಎಕ್ಸ್, ಫೇಸ್‌ಬುಕ್ ಮತ್ತು ಇನ್‌ಸ್ಟಾಗ್ರಾಂನಲ್ಲಿ ಪ್ರಜಾವಾಣಿ ಫಾಲೋ ಮಾಡಿ.