ಜಪಾನ್‌ನಲ್ಲಿ 2021ರಲ್ಲಿ ನಿಗದಿಯಾಗಿದ್ದ ವಿಶ್ವ ಈಜು ಚಾಂಪಿಯನ್‌ಷಿಪ್‌ 2022ಕ್ಕೆ

ಪ್ಯಾರಿಸ್‌: ಜಪಾನ್‌ನಲ್ಲಿ 2021ರಲ್ಲಿ ನಿಗದಿಯಾಗಿದ್ದ ವಿಶ್ವ ಈಜು ಚಾಂಪಿಯನ್‌ಷಿಪ್‌ ಅನ್ನು 2022ರ ಮೇ ತಿಂಗಳಿಗೆ ಮುಂದೂಡಲಾಗಿದೆ. ಟೋಕಿಯೊ ಒಲಿಂಪಿಕ್ಸ್ 2021ಕ್ಕೆ ಮುಂದೂಡಿಕೆಯಾದ ಕಾರಣ ಈ ನಿರ್ಧಾರಕ್ಕೆ ಬರಲಾಗಿದೆ ಎಂದು ಅಂತರರಾಷ್ಟ್ರೀಯ ಈಜು ಫೆಡರೇಷನ್‌ (ಫಿನಾ) ಸೋಮವಾರ ಹೇಳಿದೆ.

ಈಜು ಚಾಂಪಿಯನ್‌ಷಿಪ್‌ ಮುಂದಿನ ವರ್ಷದ ಜುಲೈ 16ರಿಂದ ಆಗಸ್ಟ್‌ 1ರವರೆಗೆ ಫುಕುವೊಕಾದಲ್ಲಿ ನಡೆಯಬೇಕಿತ್ತು. ಆದರೆ ಸದ್ಯ 2022ರ ಮೇ 13ರಿಂದ 29ಕ್ಕೆ ಆಯೋಜಿಸಲು ನಿರ್ಧರಿಸಲಾಗಿದೆ.

ಚಾಂಪಿಯನ್‌ಷಿಪ್‌ನಲ್ಲಿ ಭಾಗವಹಿಸುವ ದೇಶಗಳ ಸಂಸ್ಥೆಗಳನ್ನು ಸಂಪರ್ಕಿಸಿ, ಸಮಾಲೋಚಿಸಿ ಈ ನಿರ್ಧಾರ ಕೈಗೊಳ್ಳಲಾಗಿದೆ ಎಂದು ಫಿನಾ ಅಧ್ಯಕ್ಷ ಜೂಲಿಯೊ ಮ್ಯಾಗ್ಲಿಯೋನ್‌ ಹೇಳಿದ್ದಾರೆ.