ಟಿಟಿ: ಯಶಸ್ವಿನಿ ಪಾರಮ್ಯ

ಮೈಸೂರು: ಪ್ರಭಾವಿ ಆಟವಾಡಿದ ಯಶಸ್ವಿನಿ ಘೋರ್ಪಡೆ ಅವರು ರಾಜ್ಯ ರ‍್ಯಾಂಕಿಂಗ್‌ ಟೇಬಲ್‌ ಟೆನಿಸ್‌ ಟೂರ್ನಿಯಲ್ಲಿ ಮಹಿಳೆಯರ ಮತ್ತು ಜೂನಿಯರ್‌ ಬಾಲಕಿಯರ ವಿಭಾಗಗಳಲ್ಲಿ ಚಾಂಪಿಯನ್‌ ಆದರು. ಯೂತ್‌ ಬಾಲಕಿಯರ ವಿಭಾಗದಲ್ಲೂ ಪ್ರಶಸ್ತಿ ಜಯಿಸಿದ್ದ ಅವರು ‘ಹ್ಯಾಟ್ರಿಕ್‌’ ಸಾಧನೆ ಮಾಡಿದರು.

ಮೈಸೂರು ಜಿಲ್ಲಾ ಟೇಬಲ್‌ ಟೆನಿಸ್‌ ಸಂಸ್ಥೆ ಆಶ್ರಯದಲ್ಲಿ ವಿ.ವಿ. ಜಿಮ್ಖಾನಾ ಹಾಲ್‌ನಲ್ಲಿ ನಡೆಯುತ್ತಿರುವ ಟೂರ್ನಿಯಲ್ಲಿ ಶುಕ್ರವಾರ ಮಹಿಳೆಯರ ವಿಭಾಗದ ಫೈನಲ್‌ನಲ್ಲಿ ಸ್ಕೈಸ್‌ ಅಕಾಡೆಮಿಯ ಯಶಸ್ವಿನಿ 11-9,11-4,9-11,13-11,11-9 ರಲ್ಲಿ ಬಿಎನ್‌ಎಂನ ವಿ.ಖುಷಿ ಅವರನ್ನು ಮಣಿಸಿದರು. ಸಂಜೆ ನಡೆದ ಜೂನಿಯರ್‌ ಬಾಲಕಿಯರ ವಿಭಾಗದ ಫೈನಲ್‌ನಲ್ಲಿ 11-6,13-11,10-12,11-8,11-6 ಎಂಎಸ್‌ಎಸ್‌ನ ಅನರ್ಘ್ಯಾ ಮಂಜುನಾಥ್ ವಿರುದ್ಧ ಗೆದ್ದರು.

ಅನಿರ್ಬನ್‌ಗೆ ಪ್ರಶಸ್ತಿ: ಸಿಟಿಬಿಯ ಅನಿರ್ಬನ್‌ ರಾಯ್‌ ಚೌಧರಿ ಅವರು ಪುರುಷರ ವಿಭಾಗದಲ್ಲಿ ಪ್ರಶಸ್ತಿ ಗೆದ್ದರು. ಫೈನಲ್‌ನಲ್ಲಿ 11-3,11-8,11-9,11-5 ರಲ್ಲಿ ಸಮರ್ಥ್‌ ಕೆ. ಅವರನ್ನು ಸೋಲಿಸಿದರು.ಜೂನಿಯರ್‌ ಬಾಲಕರ ವಿಭಾಗದ ಫೈನಲ್‌ನಲ್ಲಿ ಪಿ.ವಿ.ಶ್ರೀಕಾಂತ್‌ ಕಶ್ಯಪ್ 11-13,9-11,11-9,11-1,11-7,11-3 ಸುಜನ್‌ ಆರ್‌.ಭಾರದ್ವಾಜ್‌ ಅವರನ್ನು ಸೋಲಿಸಿ ಚಾಂಪಿಯನ್‌ ಆದರು.