ಅಂತಿಮ ಸುತ್ತಿನಲ್ಲಿ ಎಡವಿದ ಅಂಕಿತಾ ರೈನಾ

ಮೆಲ್ಬರ್ನ್‌: ಗ್ರ್ಯಾನ್‌ಸ್ಲಾಮ್ ಟೂರ್ನಿಯೊಂದಕ್ಕೆ ಅರ್ಹತೆ ಪಡೆದುಕೊಳ್ಳಬೇಕೆಂಬ ಭಾರತದ ಟೆನಿಸ್ ತಾರೆ ಅಂಕಿತಾ ರೈನಾ ಕನಸು ಈ ಬಾರಿಯೂ ನನಸಾಗಲಿಲ್ಲ. ಆಸ್ಟ್ರೇಲಿಯಾ ಓಪನ್ ಅರ್ಹತಾ ಸುತ್ತಿನ ಅಂತಿಮ ಪಂದ್ಯದಲ್ಲಿ ಅವರು ಬುಧವಾರ ಸರ್ಬಿಯಾದ ಓಲ್ಗಾ ಡೆನಿಲೊವಿಚ್ ಎದುರು ಸೋತರು.

ದುಬೈನಲ್ಲಿ ನಡೆಯುತ್ತಿರುವ ಅರ್ಹತಾ ಸುತ್ತಿನಮಹಿಳಾ ಸಿಂಗಲ್ಸ್ ಟೂರ್ನಿಯ ಪಂದ್ಯದಲ್ಲಿ ಅಂಕಿತಾ 2–6, 6–3, 1–6ರಿಂದ ಸೋಲು ಅನುಭವಿಸಿದರು. ಈ ಹಣಾಹಣಿ ಎರಡು ತಾಸುಗಳವರೆಗೆ ನಡೆಯಿತು.

ಗ್ರ್ಯಾನ್‌ಸ್ಲಾಮ್‌ ಟೂರ್ನಿಯೊಂದಕ್ಕೆ ಅರ್ಹತೆ ಗಿಟ್ಟಿಸಲು ಅಂಕಿತಾ ನಡೆಸಿದ ಆರನೇ ಪ್ರಯತ್ನ ಇದಾಗಿತ್ತು.

ಸುಮಿತ್‌ ನಗಾಲ್‌ ಅವರು ಈ ಬಾರಿಯ ಆಸ್ಟ್ರೇಲಿಯಾ ಓಪನ್ ಸಿಂಗಲ್ಸ್ ವಿಭಾಗದ ಮುಖ್ಯ ಸುತ್ತಿನಲ್ಲಿ ಸ್ಪರ್ಧಿಸಲಿರುವ ಭಾರತದ ಏಕೈಕ ಆಟಗಾರನಾಗಿದ್ದಾರೆ. ನಗಾಲ್ ಅವರಿಗೆ ವೈಲ್ಡ್‌ಕಾರ್ಡ್‌ ಪ್ರವೇಶ ಸಿಕ್ಕಿದೆ.

ಅರ್ಹತಾ ಸುತ್ತಿನ ಮೊದಲ ಪಂದ್ಯದಲ್ಲೇ ರಾಮಕುಮಾರ್ ರಾಮನಾಥನ್ ಅವರು ನಿರ್ಗಮಿಸಿದ್ದರೆ, ಪ್ರಜ್ಞೇಶ್ ಗುಣೇಶ್ವರನ್‌ ಎರಡನೇ ಸುತ್ತಿನಲ್ಲಿ ಸೋಲುಂಡಿದ್ದರು.