ಟೆನಿಸ್‌ ದಂತಕತೆ ಆ್ಯಶ್ಲೆ ಕೂಪರ್ ನಿಧನ
ನಾಲ್ಕು ಬಾರಿ ಗ್ರ್ಯಾನ್‌ಸ್ಲಾಮ್‌ ಕಿರೀಟ ಧರಿಸಿದ್ದ ಆಟಗಾರ
ಬ್ರಿಸ್ಬೇನ್‌: ಆಸ್ಟ್ರೇಲಿಯಾ, ವಿಂಬಲ್ಡನ್‌ ಹಾಗೂ ಅಮೆರಿಕ ಚಾಂಪಿಯನ್‌ಷಿಪ್ಸ್‌ ಸೇರಿದಂತೆ ನಾಲ್ಕು ಬಾರಿ ಗ್ರ್ಯಾನ್‌ಸ್ಲಾಮ್‌ ಪ್ರಶಸ್ತಿ ಜಯಿಸಿದ್ದ ಟೆನಿಸ್‌ ದಂತಕತೆ ಆ್ಯಶ್ಲೆ ಕೂಪರ್(83) ಶುಕ್ರವಾರ ನಿಧನರಾದರು.ಅವರು ದೀರ್ಘಕಾಲದಿಂದ ಅನಾರೋಗ್ಯದಿಂದ ಬಳಲುತ್ತಿದ್ದರು.
ಈ ಹಿಂದೆ ವಿಶ್ವ ಕ್ರಮಾಂಕದಲ್ಲಿ ಅಗ್ರ ಪಟ್ಟ ಅಲಂಕರಿಸಿದ್ದ ಕೂಪರ್ ನಿಧನವನ್ನು ಟೆನಿಸ್‌ ಆಸ್ಟ್ರೇಲಿಯಾ ಖಚಿತಪಡಿಸಿದೆ. ಎರಡು ಬಾರಿ ಆಸ್ಟ್ರೇಲಿಯಾ ಓಪನ್‌ (1957, 58), ವಿಂಬಲ್ಡನ್‌ ಹಾಗೂ ಅಮೆರಿಕ ಓಪನ್‌ (ಎರಡೂ 1958ರಲ್ಲಿ) ಸಿಂಗಲ್ಸ್‌ ಪ್ರಶಸ್ತಿಗಳು ಅವರ ಮುಡಿಗೇರಿದ್ದವು. ಡಬಲ್ಸ್‌ನಲ್ಲಿಯೂ ನಾಲ್ಕು ಬಾರಿ ಅವರು ಚಾಂಪಿಯನ್‌ ಆಗಿದ್ದರು.
ಕೂಪರ್ ನೇತೃತ್ವದ ಆಸ್ಟ್ರೇಲಿಯಾ ತಂಡವು 1957ರಲ್ಲಿ ಅಮೆರಿಕ ತಂಡವನ್ನು ಮಣಿಸಿ ಡೇವಿಸ್‌ ಕಪ್‌ ಗೆದ್ದುಕೊಂಡಿತ್ತು. ಮರುವರ್ಷವೇ ಇದಕ್ಕೆ ವ್ಯತಿರಿಕ್ತ ಫಲಿತಾಂಶ ಹೊರಹೊಮ್ಮಿತ್ತು. ಇದರಿಂದ ಕೂಪರ್ ಬಹಳ ನೊಂದುಕೊಂಡಿದ್ದರು. ತನ್ನಿಂದಲೇ ಹೀಗಾಯಿತೆಂದು ಭಾವಿಸಿದ್ದ ಅವರು ವೃತ್ತಿಪರ ಟೆನಿಸ್‌ನಿಂದ ಹಿಂದೆ ಸರಿಯಬೇಕು ಎಂದುಕೊಂಡಿದ್ದರು.
ಆದರೆ 1959ರಲ್ಲೇ ಅವರು ಟೆನಿಸ್‌ ತೊರೆಯಬೇಕಾಯಿತು. ಕಾರಣ ಬೆನ್ನುನೋವು. ಬಳಿಕ ಅವರು ಬ್ರಿಸ್ಬೇನ್‌ನ ಕ್ರೀಡಾ ಆಡಳಿತದಲ್ಲಿ ತೊಡಗಿಸಿಕೊಂಡಿದ್ದರು.
ಮಿಲ್ಟನ್‌ನಲ್ಲಿ ನಡೆಯುತ್ತಿದ್ದ ಪ್ರಮುಖ ಟೆನಿಸ್‌ ಟೂರ್ನಿಗಳು, ಟೆನ್ನಿಸನ್‌ಗೆ ಸ್ಥಳಾಂತರವಾಗುವಂತೆ ಮಾಡುವಲ್ಲಿ ಅವರ ಪಾತ್ರವಿತ್ತು. ಸದ್ಯ ಬ್ರಿಸ್ಬೇನ್‌ ಅಂತರರಾಷ್ಟ್ರೀಯ ಟೂರ್ನಿ ಇಲ್ಲಿಯೇ ನಡೆಯುತ್ತದೆ.
ತಾಜಾ ಸುದ್ದಿಗಾಗಿ ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ | ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ನಮ್ಮ ಫೇಸ್‌ಬುಕ್ ಪುಟ ಫಾಲೋ ಮಾಡಿ.