ಸೆಮಿಫೈನಲ್‌ಗೆ ಕಾಶ್ವಿ ಸುನಿಲ್‌

ಬೆಂಗಳೂರು: ಎರಡನೇ ಶ್ರೇಯಾಂಕದ ಜೈನಾ ಅಂಬರ್ ಸಾಲಾರ್ ಅವರಿಗೆ ಸೋಲುಣಿಸಿದ ಕಾಶ್ವಿ ಸುನಿಲ್, ಎಐಟಿಎ 14 ವರ್ಷದೊಳಗಿನವರ ಟೆನಿಸ್ ಟೂರ್ನಿಯಲ್ಲಿ ಸೆಮಿಫೈನಲ್ ತಲುಪಿದರು.

ಇಲ್ಲಿಯ ಟಾಪ್‌ಸ್ಪಿನ್ ಅಕಾಡೆಮಿಯಲ್ಲಿ ನಡೆಯುತ್ತಿರುವ ಟೂರ್ನಿಯ ಬಾಲಕಿಯರ ಸಿಂಗಲ್ಸ್ ವಿಭಾಗದ ಕ್ವಾರ್ಟರ್‌ಫೈನಲ್‌ನಲ್ಲಿ ಕಾಶ್ವಿ 4–6, 7–5, 6–3ರಿಂದ ಜೈನಾ ಅವರನ್ನು ಮಣಿಸಿದರು. ಕಾಶ್ವಿ ಅವರು ಇಲ್ಲಿ ಏಳನೇ ಶ್ರೇಯಾಂಕ ಪಡೆದಿದ್ದಾರೆ.

ಬಾಲಕಿರ ವಿಭಾಗದ ಎಂಟರಘಟ್ಟದ ಇನ್ನುಳಿದ ಪಂದ್ಯಗಳಲ್ಲಿ ಅನ್ವಿ ಪುನಗಂಟಿ 6-4, 7-6ರಿಂದ ಸಂಗೀತಾ ರಾಮನ್ ಎದುರು, ಉಮಾಮ್‌ ಅಹಮದ್‌ 4-6, 6-2, 7-5ರಿಂದ ಸಾನ್ವಿ ಮಿಶ್ರಾ ಎದುರು, ಶ್ರೀ ತನ್ವಿ 6-1, 6-2ರಿಂದ ಶ್ರೇಯಾಂಶಿ ಘವಾರೆ ಎದುರು ಜಯಿಸಿದರು.

ಬಾಲಕರ ಸಿಂಗಲ್ಸ್ ವಿಭಾಗದ ಕ್ವಾರ್ಟರ್‌ಫೈನಲ್ ಪಂದ್ಯಗಳಲ್ಲಿ ತನುಷ್‌ ಜಿ. 6-2, 6-2ರಿಂದ ಲೇತೀಶ್ ಕೆ. ವಿರುದ್ಧ, ಪ್ರಜ್ವಲ್ ಎಚ್‌. 4-6, 6-2, 6-3ರಿಂದ ಶಿವ ಪ್ರಶಾಂತ್‌ ವಿರುದ್ಧ, ಆರಾಧ್ಯ ಕ್ಷಿತಿಜ್‌ 6-0, 6-3ರಿಂದ ವಿಜಯ್ ಸುಮುಖ್‌ ಎದುರು, ಆರಾಧ್ಯ ದ್ವಿವೇದಿ 6-2, 6-2ರಿಂದ ಆದಿತ್ಯ ನಾರಾಯಣ್ ಎದುರು ಗೆದ್ದು ನಾಲ್ಕರ ಘಟ್ಟ ತಲುಪಿದರು.