ಟ್ವಿಟರ್‌ನಲ್ಲಿ ‘ಗೋಡ್ಸೆ ಜಿಂದಾಬಾದ್’ ಟ್ರೆಂಡಿಂಗ್
ಬೆಂಗಳೂರು: ರಾಷ್ಟ್ರಪಿತ ಮಹಾತ್ಮ ಗಾಂಧಿಜನ್ಮದಿನದಂದು ಟ್ವಿಟರ್‌ನಲ್ಲಿ ಸಾವಿರಾರು ಜನ, ಗಾಂಧೀಜಿ ಹಂತಕ ನಾಥೂರಾಮ್‌ ಗೋಡ್ಸೆಗೆ ‘ಜಿಂದಾಬಾದ್’ ಹೇಳಿದರು. ‘ಗೋಡ್ಸೆ ಜಿಂದಾಬಾದ್’ ಹ್ಯಾಶ್ಟ್ಯಾಗ್ ಶುಕ್ರವಾರ ಇಡೀ ದಿನ ಟ್ರೆಂಡಿಂಗ್‌ನಲ್ಲಿತ್ತು.
‘ಭಾರತದ ವಿಭಜಕನಿಗೆ, ಪಾಕಿಸ್ತಾನದ ಪಿತಾಮಹನಿಗೆ ಜನ್ಮದಿನದ ಶುಭಾಶಯ’ ಎಂದು ವಿನಯ್‌ ರಾಯ್ ಎಂಬುವರು ವ್ಯಂಗ್ಯವಾಗಿ ಶುಭಾಶಯ ಕೋರಿದರೆ, ‘ದೇಶವನ್ನು ಕಾಪಾಡಿದವರು ನೀವು ಗೋಡ್ಸೆಜೀ, ಈ ದೇಶ ನಿಮಗೆ ಎಂದಿಗೂ ಆಭಾರಿಯಾಗಿರುತ್ತದೆ’ ಎಂದು ವೀರ್‌ ಗುರ್ಜಾರ್ ಎಂಬುವರು ಟ್ವೀಟ್ ಮಾಡಿದ್ದರು.
‘ಹಿಂದೂ ಹೃದಯಸಾಮ್ರಾಟ ನಾಥೂರಾಮ್‌ ಗೋಡ್ಸೆ, ನಿಮ್ಮ ತ್ಯಾಗಕ್ಕೆ ನಮನ’ ಎಂದು ಮೀರಾ ಎಂಬುವರು ಟ್ವೀಟ್ ಮಾಡಿದರೆ, ‘ಸತ್ಯ ತಿಳಿದುಕೊಳ್ಳಲು ಲಕ್ಷಕ್ಕೂ ಹೆಚ್ಚು ಜನ ಟ್ವೀಟ್ ಮಾಡಿದ್ದಾರೆ. ಎಲ್ಲರಿಗೂ ಅಭಿನಂದನೆ’ ಎಂದು ಅಲ್ಟ್ರಾನ್ಯಾಷನಲಿಸ್ಟ್‌ ಹೆಸರಿನಲ್ಲಿ ಟ್ವೀಟ್ ಮಾಡಲಾಯಿತು.
ಶುಕ್ರವಾರ ಸಂಜೆ ವೇಳೆಗೆ 55 ಸಾವಿರ ಟ್ವೀಟ್‌ಗಳು ಈ ಹ್ಯಾಶ್ಟ್ಯಾಗ್ ಅಡಿ ಇದ್ದವು.
ಅಸಮಾಧಾನ:ಇದಕ್ಕೆ ಪ್ರತಿಯಾಗಿ ‘ಗೋಡ್ಸೆ ಮುರ್ದಾಬಾದ್‌’ ಹೆಸರಿನಲ್ಲಿಯೂ ಸಾವಿರಾರು ಜನ ಟ್ವೀಟ್ ಮಾಡಿದರು.
‘ಮಹಾತ್ಮಗಾಂಧಿ ಜನ್ಮದಿನದಂದೇ ಭಾರತದಲ್ಲಿ ಗೋಡ್ಸೆ ಜಿಂದಾಬಾದ್ ಎನ್ನುವುದು ಟ್ರೆಂಡಿಂಗ್‌ನಲ್ಲಿದೆ. ನಾಥೂರಾಮ್‌ ಗೋಡ್ಸೆ ಆರ್‌ಎಸ್‌ಎಸ್‌ ಮತ್ತು ಬಿಜೆಪಿಗೆ ಗಾಡ್‌ಫಾದರ್‌ ಇದ್ದಂತೆ. ಬಿಜೆಪಿ ಅಧಿಕಾರದಲ್ಲಿದ್ದಾಗ ಇದಕ್ಕಿಂತ ಇನ್ನೇನು ನಿರೀಕ್ಷಿಸಲು ಸಾಧ್ಯ’ ಎಂದು ಭಾರ್ತಿ ಸೈನಿ ಎಂಬುವರು ಟ್ವೀಟ್ ಮಾಡಿದ್ದಾರೆ.
‘ಗೋಡ್ಸೆ ನಮ್ಮ ಆದರ್ಶವಾಗಲು ಸಾಧ್ಯವೇ ಇಲ್ಲ. ಅವನೊಬ್ಬ ಕ್ರಿಮಿನಲ್. ಅದೊಂದೇ ಅವನ ಗುರುತು. ಗಾಂಧೀಜಿ ನಮ್ಮ ಹೀರೊ’ ಎಂದು ಅರ್ಘ್ಯ ಚಟರ್ಜಿ ಟ್ವೀಟ್ ಮಾಡಿದ್ದಾರೆ.
‘ಒಬ್ಬ ಕೊಲೆಗಡುಕನ ಪರವಾಗಿ ಇಷ್ಟು ಜನ ಟ್ವೀಟ್ ಮಾಡಿರುವುದು ನಂಬಲಾಗುತ್ತಿಲ್ಲ’ ಎಂದು ಪ್ರತಿಭಾ ಅಚ್ಚರಿ ವ್ಯಕ್ತಪಡಿಸಿ ಟ್ವೀಟ್ ಮಾಡಿದರು.
ತಾಜಾ ಸುದ್ದಿಗಾಗಿ ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ | ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ನಮ್ಮ ಫೇಸ್‌ಬುಕ್ ಪುಟ ಫಾಲೋ ಮಾಡಿ.