‘ಗ್ರೀಕ್ – ಕನ್ನಡ ನಾಟಕಗಳಲ್ಲಿ ಸಾಮ್ಯತೆ’

ಬೆಂಗಳೂರು: 'ಗ್ರೀಕ್ ಹಾಗೂ ಕನ್ನಡ ನಾಟಕ ಪ್ರಕಾರಗಳಲ್ಲಿ ಹಲವು ಸಾಮ್ಯತೆಗಳಿವೆ. ಈ ಕುರಿತ ಸಂಶೋಧನೆಗಳು ನಡೆಸಬೇಕಿದೆ' ಎಂದು ಕೇಂದ್ರ ಸಾಹಿತ್ಯ ಅಕಾಡೆಮಿ ಅಧ್ಯಕ್ಷ ಡಾ.ಚಂದ್ರಶೇಖರ ಕಂಬಾರ ಅಭಿಪ್ರಾಯಪಟ್ಟರು.

ರಾಷ್ಟ್ರೀಯ ನಾಟಕ ಶಾಲೆಯು ನಗರದಲ್ಲಿ ಭಾನುವಾರ ಆಯೋಜಿಸಿದ್ದ ‘ಹೊಸ ರಂಗಭಾಷೆಯ ಹುಡುಕಾಟ...’ ಕುರಿತ ವಿಚಾರ ಸಂಕಿರಣದಲ್ಲಿ ಅವರು ಮಾತನಾಡಿದರು.

'ಉಡುಪಿಯ ‘ಮಲ್ಪೆ’ ತೀರದ ಬಳಿ ನಡೆದ ಪ್ರಸಂಗವೊಂದು ಗ್ರೀಕ್‌ ನಾಟಕವೊಂದರಲ್ಲಿ ಪ್ರಸ್ತಾಪವಾಗಿದೆ. ಕನ್ನಡ ಸಂಭಾಷಣೆಯೂ ನಾಟಕದಲ್ಲಿ ಬಳಕೆಯಾಗಿದೆ. ಅದೇ ಮಾದರಿಯಲ್ಲಿ ಹಲವು ನಾಟಕಗಳಲ್ಲಿ ಕನ್ನಡದ ಪದಗಳು ಬಳಸಲಾಗಿದೆ. ಆ ಕುರಿತು ಹೆಚ್ಚಿನ ಸಂಶೋಧನೆಗಳು ನಡೆದಿಲ್ಲ.
ರಾಷ್ಟ್ರೀಯ ನಾಟಕ ಶಾಲೆಯ ತಜ್ಞರು ಆ ಬಗ್ಗೆ ಗಮನ ಹರಿಸಬೇಕು' ಎಂದು ಸಲಹೆ ನೀಡಿದರು.

'ಶಿವನನ್ನು ದ್ರಾವಿಡ ನಾಟಕ ಪರಂಪರೆಯ ಮೂಲ ಪುರುಷ ಎಂದು ನಂಬಲಾಗಿದೆ.  ಮೈಗೆ ವಿಭೂತಿ ಹಚ್ಚಿ, ಒಂದು ಕೈಯಲ್ಲಿ ಡಮರುಗ, ಮತ್ತೊಂದು ಕೈಯಲ್ಲಿ ತ್ರಿಶೂಲ ಹಿಡಿದು ಕುಣಿಯುವ ದೃಶ್ಯ ಪ್ರೇಕ್ಷಕರನ್ನು ಸೆಳೆಯುತ್ತದೆ. ಗ್ರೀಕ್‌ ನಾಟಕಗಳಲ್ಲೂ ಶಿವನನ್ನು ಹೋಲುವಂತಹ ವೇಷಭೂಷಣಗಳು ಬಳಕೆಯಾಗಿವೆ' ಎಂದು ಅವರು ವಿವರಿಸಿದರು.

'ನಾಟಕವೆಂದರೆ ಕೇವಲ ಮನರಂಜನೆಯಲ್ಲ. ಬದುಕನ್ನು ರೂಪಿಸುವ ಹಾಗೂ ನಿರೂಪಿಸುವ ಕ್ಷೇತ್ರವದು. ಕತೆ, ಹಾಡು, ನೃತ್ಯ ಹಾಗೂ ಅಭಿನಯದ ಮೂಲಕ ನೋಡುಗರಿಗೆ ನಾಟಕದ ಆಶಯವನ್ನು ಕಟ್ಟಿಕೊಡಲಾಗುತ್ತದೆ. ಅವರನ್ನು ಚಿಂತನೆಗೆ ದೂಡುವಂತೆ ಮಾಡಲಾಗುತ್ತದೆ' ಎಂದರು.

'ನಾಟಕಕಾರ ಹಾಗೂ ನಿರ್ದೇಶಕ ತನ್ನ ರಂಗಭಾಷೆಯನ್ನು ಹುಡುಕಲೇ ಬೇಕು. ಅದರ ಅಸ್ತಿತ್ವವನ್ನು ಉಳಿಸಬೇಕು. ಆದರೆ, ನಿರ್ದೇಶಕ ಹಾಗೂ ನಾಟಕಕಾರನ ಸ್ಥಾನಮಾನ ಪ್ರಸ್ತುತ ಸನ್ನಿವೇಶದಲ್ಲಿ ಬದಲಾಗಿದೆ' ಎಂದು ಬೇಸರ ವ್ಯಕ್ತಪಡಿಸಿದರು.

ಬೆಂಗಳೂರು ವಿಶ್ವವಿದ್ಯಾಲಯದ ಹಂಗಾಮಿ ಕುಲಪತಿ ಪ್ರೊ.ವಿ.ಸುದೇಶ್, ‘ಬದುಕು ಒಂದು ನಾಟಕ. ಬದುಕಿನ ಸೂಕ್ಷ್ಮತೆಗಳನ್ನು ರಂಗದ ಮೇಲೆ
ತರುವ ಮೂಲಕ ಪ್ರೇಕ್ಷಕರಲ್ಲಿ ರಸಾನುಭವ ಉಂಟು ಮಾಡುವುದೇ ನಾಟಕದ ಹೆಚ್ಚುಗಾರಿಕೆ’ ಎಂದು ತಿಳಿಸಿದರು.