ಭಕ್ತರ ಆಕರ್ಷಿಸಿದ ಶ್ರೀನಿವಾಸ ಕಲ್ಯಾಣೋತ್ಸವ

ಬೆಂಗಳೂರಿನ ಶ್ರೀವಾರಿ ಪ್ರತಿಷ್ಠಾನದ ವೆಂಕಟೇಶಮೂರ್ತಿ ಅವರ ತಂಡವು ವರ್ಣರಂಜಿತ ವೇದಿಕೆಯಲ್ಲಿ ಸಂದರ್ಭಕ್ಕೆ ತಕ್ಕಂತೆ ಹಾಡು, ಭಜನೆ ಮತ್ತು ಕಲ್ಯಾಣದ ಕೈಂಕರ್ಯವನ್ನು ಸಾಲಂಕೃತವಾಗಿ ನಡೆಸಿಕೊಟ್ಟರು.

 

ತಿರುಪತಿಯಲ್ಲಿ ವೆಂಕಟೇಶ್ವರನಿಗೆ ನಡೆಯುವ ನಿತ್ಯ ಕಲ್ಯಾಣೋತ್ಸವ ತದ್ರೂಪ­ವಾಗಿಯೇ ರಾಯರ ಮಠದಲ್ಲಿ ಅನಾವರಣಗೊಳಿಸಿದ ವೈಕಾಸನ ಋಷಿ ವಿಧಿಯಂತೆ ನಡೆದುಕೊಂಡು ಬಂದ ಕಲ್ಯಾಣೋತ್ಸವ ಪಟ್ಟಾಭಿಷೇಕಕ್ಕೆ ಕಲಶವಿಟ್ಟಿತು.
 

ಮೊದಲು ಪದ್ಮಾವತಿ, ವೆಂಕ­ಟೇಶ್ವರ, ಮಹಾಲಕ್ಷ್ಮಿಯನ್ನು ಬರಮಾ­ಡಿಕೊಳ್ಳುವ ಸನ್ನಿವೇಶದಲ್ಲಿ ಮಂಗಲ ವಾದ್ಯಗಳು ಮೊಳಗಿದವು. ಜಾಗಟೆ, ಶಂಖ, ನಿನಾದಗಳು ಭಕ್ತಿ ಪರವಶತೆ­ಯನ್ನು ಹೆಚ್ಚಿಸಿದವು. ಇಲ್ಲಿಂದ ಆರಂಭ­ವಾದ ಬೀಸುವ ಕಲ್ಲು, ಒರಳುಕಲ್ಲು ಪೂಜೆ, ಗಣಪತಿ ಪೂಜೆಯ ಸಂದರ್ಭ­ದಲ್ಲಿ ತೂರಿಬಂದ ಸುವ್ವಿ ಸುವ್ವಿ ಹಾಡು­ಗಳು ಭಕ್ತರನ್ನು ಪರವಶ­ಗೊಳಿಸಿದವು. 

 

ಮಂಗಲಾಷ್ಟಕ ಶ್ಲೋಕದೊಂದಿಗೆ ಅಕ್ಷತಾ­ರೋಪಣ ಆರತಿ ಹೀಗೆ ನಾನಾ ಸೇವೆಗಳ ಮೂಲಕ ಶ್ರೀವಾರಿ ಪ್ರತಿ­ಷ್ಠಾನದ ತಂಡ ಆಗಾಗ ಭಕ್ತರನ್ನು ಸಮ್ಮೋಹನಗೊಳಿಸಿತು.
 

ಕೊನೆಯಲ್ಲಿ ನಡೆದ ಏಕಾಂತ ಸೇವೆಯಲ್ಲಿ ಮೌನ ಧ್ಯಾನ, ಭಜನೆಯ ಓಂಕಾ­ರ ವೇದಿಕೆಯಲ್ಲಿ ಆಲಾ­ಪಿಸಿದವು. ಸಂಸದ ಪ್ರಹ್ಲಾದ ಜೋಶಿ ಸೇರಿದಂತೆ ಹಲವು ಗಣ್ಯರು ಕಲ್ಯಾಣೋತ್ಸವವನ್ನು ವಿವರಿಸಿದರು.