ಸೇಡಂ | ಉತ್ತಮ ಮಳೆ; ಗರಿಗೆದರಿದ ಕೃಷಿ ಚಟುವಟಿಕೆ

ಸೇಡಂ: ಮುಂಗಾರು ತಡವಾಗಿದ್ದರಿಂದ ತಾಲ್ಲೂಕಿನ ರೈತರಲ್ಲಿ ಆತಂಕ ಮನೆಮಾಡಿತ್ತು. ಆದರೆ ಮಂಗಳವಾರ ರಾತ್ರಿ ಸುರಿದ ಮಳೆ ರೈತರ ಮೊಗದಲ್ಲಿ ಮಂದಹಾಸ ಮೂಡಿಸಿದ್ದು ಮತ್ತು ಮುಂಗಾರು ಬೆಳೆಗಳಿಗೆ ಮತ್ತೇ ಭರವಸೆ ಮೂಡಿಸಿದೆ.

ಕೃಷಿ ಇಲಾಖೆಯ ಮಾಹಿತಿಯಯಂತ ತಾಲ್ಲೂಕಿನಾದ್ಯಂತ 85,930 ಹೆಕ್ಟೆರ್ ಮುಂಗಾರು ಬಿತ್ತನೆ ಗುರಿ ಹೊಂದಿದೆ. ಇದರಲ್ಲಿ ಈಗಾಗಲೇ 49,821 ಸಾವಿರಕ್ಕೂ ಅಧಿಕ ಹೆಕ್ಟೇರ್ ಬಿತ್ತನೆಯಾಗಿದೆ. ಶೇ 58 ಮುಂಗಾರು ಬಿತ್ತನೆಯಾಗಿದ್ದು ಮಳೆಯ ಅಭಾವದಿಂದಾಗಿ ರೈತರು ಮುಂಗಾರು ಬಿತ್ತನೆಯನ್ನು ಸ್ಥಗಿತಗೊಳಿಸಿದ್ದರು.

ಬೆಳೆಗಳಿಗೆ ಜೀವಕಳೆ: ತಾಲ್ಲೂಕಿನಾದ್ಯಂತ ಹೆಸರು, ಉದ್ದು, ತೊಗರಿ ಸೇರಿದಂತೆ ಬಿತ್ತಿರುವ ಇನ್ನಿತರ ಮುಂಗಾರು ಬೆಳೆಗಳಿಗೆ ಮಂಗಳವಾರ ಸುರಿದ ಮಳೆ ಜೀವಕಳೆ ಬಂದಂತಾಗಿದೆ.

ಹೆಸರು ಬೆಳೆಗಳು ಈಗಾಗಲೇ ಎತ್ತರಕ್ಕೆ ಬೆಳೆದಿದ್ದು, ನಳನಳಿಸುತ್ತಿವೆ. ಅಲ್ಲದೆ ತಾಲ್ಲೂಕಿನ ವಿವಿಧೆಡೆ ಮುಂಗಾರು ಬಿತ್ತನೆ ನಡೆದರೆ, ಮತ್ತೊಂದೆಡೆ ಹೊಲಗಳಲ್ಲಿ ಕಳೆ (ಸದಿ) ತೆಗೆಯುವ ಕೆಲಸ ನಡೆದಿವೆ. ಸ್ಥಗಿತಗೊಂಡಿದ್ದ ಕೃಷಿ ಚಟುವಟಿಕೆಗಳು ಸುರಿದ ಮಳೆಯಿಂದ ಗರಿಗೆದರಿವೆ.

ತುಂಬಿ ಹರಿದ ನಾಲಾಗಳು: ಮಂಗಳವಾರ ರಾತ್ರಿ ಸುರಿದ ಮಳೆಯಿಂದ ಹಳ್ಳ, ನಾಲಾಗಳು, ಚರಂಡಿಗಳು ತುಂಬಿ ಹರಿದಿವೆ. ಇದರಿಂದಾಗಿ ತಾಲ್ಲೂಕಿನ ಕಮಲಾವತಿ ಮತ್ತು ಕಾಗಿಣಾ ನದಿಗಳಿಗೆ ನೀರು ಹರಿದು ಬಂದಿದೆ.

ಮಳೆ ಪ್ರಮಾಣ: ತಾಲ್ಲೂಕಿನಾದ್ಯಂತ ಮಂಗಳವಾರ ಸುರಿದ ಮಳೆ ಮುಂಗಾರಿನಲ್ಲಿ ಮೊದಲ ಮಳೆ ದಾಖಲೆಯಾಗಿದೆ. ತಾಲ್ಲೂಕಿನ ವಿವಿಧೆಡೆ ಸೇಡಂ 16.4 ಮಿ.ಮೀ, ಆಡಕಿ 58.0 ಮಿ.ಮೀ, ಮುಧೋಳ 87.0 ಮಿ.ಮೀ, ಕೋಡ್ಲಾ 23.4 ಮತ್ತು ಕೋಲ್ಕುಂದಾ 86.05 ಮಳೆಯಾಗಿದೆ. ತಾಲ್ಲೂಕಿನ ಮುಧೋಳ ಗ್ರಾಮದಲ್ಲಿ 87.0 ಮಿ.ಮೀ ದಾಖಲೆ ಮಳೆಯಾಗಿದೆ ಎಂದು ಹವಾಮಾನ ಇಲಾಖೆಯ ಮೂಲಗಳು ತಿಳಿಸಿವೆ.