ಸ್ಪೀಕರ್: ಸುಮಿತ್ರ ಮಹಾಜನ್ ಅವಿರೋಧ ಆಯ್ಕೆ

ನವದೆಹಲಿ (ಪಿಟಿಐ): 16ನೇ ಲೋಕಸಭೆಯ ಸ್ಪೀಕರ್ ಆಗಿ ಸಂಸದೆ ಸುಮಿತ್ರ ಮಹಾಜನ್ ಶುಕ್ರವಾರ ಅವಿರೋಧವಾಗಿ ಆಯ್ಕೆಯಾಗಿದ್ದಾರೆ.

ಸ್ಪೀಕರ್‌ ಸ್ಥಾನಕ್ಕೆ ಸುಮಿತ್ರಾ ಮಹಾಜನ್‌ ಒಬ್ಬರೇ ನಾಮಪತ್ರ ಸಲ್ಲಿಸಿದ್ದರಿಂದ ಅವಿರೋಧವಾಗಿ ಆಯ್ಕೆಯಾಗಿದ್ದಾರೆ ಎಂದು ಘೋಷಿಸಲಾಯಿತು.

ಸದನದಲ್ಲಿ ಮಾತನಾಡಿದ ಪ್ರಧಾನಮಂತ್ರಿ ನರೇಂದ್ರ ಮೋದಿ ಅವರು ಸ್ಪೀಕರ್‌ ಅವರನ್ನು ಅವಿರೋಧವಾಗಿ ಆಯ್ಕೆ ಮಾಡಿದಕ್ಕೆ ಎಲ್ಲಾ ಪಕ್ಷದ ಸಂಸದರಿಗೆ ವಂದನೆ ಸಲ್ಲಿಸಿದರು.

ಅನುಭವಿ ಸಂಸದೀಯ ಪಟು ಎಂಬ ಹೆಗ್ಗಳಿಕೆಗೆ ಪಾತ್ರರಾಗಿರುವ ಸುಮಿತ್ರಾ ಮಹಾಜನ್‌ ಅವರ ಸೇವೆ ಸದನಕ್ಕೆ ಅವಶ್ಯವಿತ್ತು ಎಂದು ಮೋದಿ ತಿಳಿಸಿದರು.

71 ವರ್ಷದ ಸುಮಿತ್ರಾ ಅವರು ಸತತ ಎಂಟು ಸಲ ಸಂಸದೆಯಾಗಿ ಆಯ್ಕೆಯಾಗಿದ್ದಾರೆ. ಮಾಜಿ ಪ್ರಧಾನಿ ಅಟಲ್ ಬಿಹಾರಿ ವಾಜಪೇಯಿ ಅವರ ಆಡಳಿತದಲ್ಲಿ ರಾಜ್ಯ ಸಚಿವೆಯಾಗಿ ಕಾರ್ಯನಿರ್ವಹಿಸಿದ್ದರು.

ಡೆಪ್ಯುಟಿ ಸ್ಪೀಕರ್‌: ಡೆಪ್ಯುಟಿ ಸ್ಪೀಕರ್‌ ಸ್ಥಾನಕ್ಕೆ ಎಐಎಡಿಎಂಕೆಯ ಸಂಸದ ತಂಬಿದೊರೈ ಅವರ ಹೆಸರು ಬಲವಾಗಿ ಕೇಳಿಬರುತ್ತಿದೆ.