ಅಮೆರಿಕ ಎಚ್ಚರಿಕೆ ನಡುವೆಯೂ ಮಧ್ಯಮ ಶ್ರೇಣಿಯ ಕ್ಷಿಪಣಿ ಉಡಾವಣೆ ಮಾಡಿದ ಇರಾನ್‌

ತೆಹ್ರಾನ್‌: ನಿರಂತರವಾಗಿ ಅಣ್ವಸ್ತ್ರ ಪ್ರಯೋಗಗಳನ್ನು ನಡೆಸುತ್ತಿರುವ ಉತ್ತರ ಕೊರಿಯಾಗೆ ಅಮೆರಿಕ ಎಚ್ಚರಿಕೆ ನೀಡಿರುವ ನಡುವೆಯೇ, ಹೊಸ ಮಧ್ಯಮ ಶ್ರೇಣಿಯ ಕ್ಷಿಪಣಿಯೊಂದರ ಪರೀಕ್ಷೆಯನ್ನು ಯಶಸ್ವಿಯಾಗಿ ಮಾಡಿರುವುದಾಗಿ ಇರಾನ್ ಶನಿವಾರ ಹೇಳಿಕೊಂಡಿದೆ.

ಸದ್ಯ ಪರೀಕ್ಷೆ ನಡೆಸಲಾಗಿರುವ ‘ಖೊರಾಮ್ಶಹರ್’ ಕ್ಷಿಪಣಿಯನ್ನು ಶುಕ್ರವಾರ ನಡೆದ ಸೇನೆಯ ಉನ್ನತ ಮಟ್ಟದ ಪ್ರದರ್ಶನದ ವೇಳೆ ಮೊದಲ ಬಾರಿಗೆ ಪ್ರದರ್ಶಿಸಲಾಗಿತ್ತು. ಇದರ ಚಿತ್ರಗಳನ್ನು ಇರಾನ್‌ ರಾಷ್ಟ್ರೀಯ ಟಿವಿ ವಾಹಿನಿಯಲ್ಲಿ ಪ್ರಕಟಿಸಲಾಗಿದ್ದು, ಕ್ಷಿಪಣಿಯನ್ನು ಹೊತ್ತೊಯ್ದ ವಿಮಾನದ ವಿಡಿಯೊವನ್ನೂ ಪ್ರಸಾರಮಾಡಲಾಗಿದೆ.

ಈ ಬಗ್ಗೆ ಶುಕ್ರವಾರ ಮಾತನಾಡಿದ್ದ ಸೇನೆಯ ಅಧಿಕಾರಿಗಳು ಶೀಘ್ರದಲ್ಲೇ ಕ್ಷಿಪಣಿ ಪ್ರಯೋಗ ನಡೆಸಲಾಗುವುದು ಎಂದಷ್ಟೇ ಹೇಳಿದ್ದರು.