ಶ್ವೇತಭವನ ಪತ್ರಕರ್ತರ ಒಕ್ಕೂಟದ ಔತಣಕೂಟಕ್ಕೆ ಟ್ರಂಪ್ ಗೈರು?

ನ್ಯೂಯಾರ್ಕ್ ಟೈಮ್ಸ್, ಸಿಎನ್‌ಎನ್‌, ಬಿಬಿಸಿ ಸೇರಿದಂತೆ ಹಲವು ಮಾಧ್ಯಮಗಳಿಗೆ ಶ್ವೇತಭವನದ ಸುದ್ದಿಗೋಷ್ಠಿಗೆ ತಾತ್ಕಾಲಿಕ ನಿರ್ಬಂಧ ಹೇರಿದ್ದ ಬಳಿಕ ಟ್ರಂಪ್ ಈ ನಿರ್ಧಾರ ಕೈಗೊಂಡಿದ್ದಾರೆ. 

 

ಈ ಕಾರ್ಯಕ್ರಮಕ್ಕೆ ಅಮೆರಿಕದ ಅಧ್ಯಕ್ಷರೊಬ್ಬರು ಗೈರುಹಾಜರಾಗುತ್ತಿರುವುದು ದಶಕಗಳಲ್ಲಿ ಇದೇ ಮೊದಲು. ಪತ್ರಿಕೋದ್ಯಮ ವಿದ್ಯಾರ್ಥಿವೇತನಕ್ಕೆ ದೇಣಿಗೆ ಸಂಗ್ರಹಿಸಲು ಪ್ರತಿವರ್ಷ ಈ ಔತಣಕೂಟ ಏರ್ಪಡಿಸಲಾಗುತ್ತದೆ.

 

ಸಾಮಾನ್ಯವಾಗಿ ಅಮೆರಿಕ ಅಧ್ಯಕ್ಷರು, ಪತ್ರಕರ್ತರು, ಗಣ್ಯರು ಭಾಗಿಯಾಗುತ್ತಾರೆ. 1981ರಲ್ಲಿ ಅಮೆರಿಕದ ಅಧ್ಯಕ್ಷರಾಗಿದ್ದ ರೊನಾಲ್ಡ್ ರೇಗನ್ ಅವರು ತಮ್ಮ ಮೇಲೆ ನಡೆದ ಹತ್ಯೆ ಯತ್ನದಿಂದ ಚೇತರಿಸಿಕೊಳ್ಳುತ್ತಿದ್ದ ಕಾರಣ ಔತಣಕೂಟಕ್ಕೆ ಗೈರಾಗಿದ್ದರು. ಆದರೂ ದೂರವಾಣಿಯಲ್ಲಿ ಶುಭಕೋರಿದ್ದರು. 1972ರಲ್ಲಿ ರಿಚರ್ಡ್ ನಿಕ್ಸನ್  ಅವರೂ ಗೈರಾಗಿದ್ದರು ಎಂದು ನ್ಯಾಷನಲ್ ಪಬ್ಲಿಕ್ ರೇಡಿಯೊ ತಿಳಿಸಿದೆ.