ಕವಿತೆ: ಹೇಗೆ ಕರೆತರಲಿ...

ಮತ್ತೆ ಹೇಗೆ ನಾ
ನಿಮ್ಮನ್ನು ಹುಡುಕಲಿ
ಹೇಗೆ ಕರೆತರಲಿ
ಗಾಡಂಧಕಾರವೇ....
ಲೋಕ ವ್ಯಾಪಿಸಿ
ಮೌಲ್ಯಗಳು ಕಾಣದಂತೆ;

ವ್ಯೂಹಗಳ ಜಾಲ
ಸತ್ಯ ನಿಷ್ಠೆಯ
ತಕ್ಕಡಿ
ಮೇಲೆಕೆಳಗೆ ತಿರುಗಿಸುವ

ಮೂಢರ ಕೈಚಳಕವೇ
ಮುಖ್ಯವಾಗಿ ನಿಮ್ಮ
‘ಚರಕದ ತಿರುಗು ಗಾಣದೆ’
ಆ ಸಿದ್ಧಾಂತ ತತ್ವಗಳು
ತೂರಿ ಹಾರಿಸಿ
ಅಟ್ಟಹಾಸಗೈಯುವ
ಅರಾಜಕತೆಯ ತಾಂಡವ
ವಿಜೃಂಭಿಸುವಾಗ

ಅಭಯದ ನೆರಳಿಂದ ನಿಮ್ಮ
ಎಲ್ಲಿ ಹುಡುಕಲಿ ಹೇಗೆ ಕರೆತರಲಿ
ಕರಕಾಗುವ ಅಹಿಂಸೆ
ನಾನಾ ರೂಪಗಳ ಕೂಪವಾಗಿ
ಹೆಣ್ತನವ ಕುಕ್ಕಿಕುಕ್ಕಿ ಕೊಲ್ಲುವ ಕಮಟು

ಧಗೆಯ ದಟ್ಟವಾಗಿ
ಶಾಂತಿಯ ಸಮನ್ವಯದ
ಸಹಬಾಳ್ವೆಗೆ
‘ಅಭಯವೆ’
ಎಲ್ಲಿ ಹುಡುಕಲಿ
ಹೇಗೆ ಕರೆತರಲಿ