ಗುಂಬಜ್, ನಿನಗಿದೋ ಪ್ರಣಾಮ

ಗುಂಬಜ್, ನಿನಗಿದೋ ಪ್ರಣಾಮ

ಇದು ಎಷ್ಟನೇ ಬಾರಿಯೋ?
ಈ ಬಾರಿಯೂ
ಗುಂಬಜ್‌ ಹತ್ತಿ ಇಳಿದೆ

ಕೇಕೆ ಹಾಕಿ ಚಪ್ಪಾಳೆ ತಟ್ಟಿ
ದುಡು ದುಡನೆ ಹತ್ತುವ ಹುಡುಗರು
ಅವರೆದೆಯೊಳಗೆ ಅವಳ ಚಿತ್ರ
ಜೋರಾಗಿ ಕೂಗಿ ಕರೆದು ಬಿಡುವ ರೋಮಾಂಚನದ
ಕ್ಷಣಗಣನೆ

ಚಣ ಚಣ ನಿಂತು
ಉಸಿರು ತೆಗೆದು ಬಿಟ್ಟು ಮೊಳದುದ್ದದ
ಮೆಟ್ಟಿಲ ಮೇಲೆ ಕಾಲು ಎತ್ತಿಡುತ್ತಿರುವೆ
ಓಡಿ ಹೋಗಿ
ಪ್ರತಿಧ್ವನಿಗೊಳುವಂತೆ ಕೂಗಲು ಯಾವ ಹೆಸರಿದೆ?
ಅವಳ ಚಿತ್ರ ಮಂಕಾಗಿದೆ

ಸೈಡು ಹೊಡೆದು ಓಡುತ್ತಾರೆ ಹುಡುಗರು
ಜೊತೆಗೆ ಹುಡುಗಿಯರು
ಗಲಗಲವೆನ್ನುವ ಗುಲ್ಲು
ಕಿಂಡಿಗಳಲಿ ಕಾಣುತಿದೆ ಪೇಲವ ಶಹರ
ಕುಣಿಯುತಿದೆ ಬಿಸಿಲಗುದುರೆ
ಮಾತುಗಾರನ ಕೈಯಲ್ಲಿ
ವಿಜೃಂಭಿಸುತಿದೆ ಗತಕಾಲ

ಬಾಯ್ತೆರೆದು ನಿಂತಿದ್ದಾರೆ ಮಾತುಗಾರನ ಮುಂದೆ
ಗುಂಬ ಗುಂಬಗಳ ನೂರು ಕಥೆ ಹೇಳಿ

ಕೈ ಚಪ್ಪಾಳೆ ಬಾರಿಸುತ್ತಾನೆ
ಗೂಡಿನಿಂದ ಹಾರುತ್ತವೆ ರೆಕ್ಕೆಯಗಲಿಸಿ
ಜೋಡಿ ಪಾರಿವಾಳ
ಮರಳುವುದು ಯಾವಾಗಲೋ
ಕತ್ತಲಿಳಿಯಬೇಕೋ ಏನೋ

ಪಿಸುಗುಟ್ಟಿದೆ ಸಾವಿರ ದನಿ ಸಾವಿರಬಾರಿ
ಆಯೋಮಯ ಗೋಲ
ಕಂಗೆಟ್ಟು ಕಣ್ಣು ಬಿಡುತ್ತಿರುವೆ
ಯಾರ ಹೆಸರಿಗೇಂತ ದನಿ ತೆಗೆಯಲಿ! ಬೇಸತ್ತು
ಬಳಲಿ ಬಾಯಾರಿದ ಶತಮಾನ

ಅಲ್ಲೊಂದು ಸೆಳಕಿನ ಮಿಂಚು
ದನಿಗಳೊಳಗಿಂದ ಪಿಸುದನಿಯ ರವಾನಿಸಿತು ಗುಂಬಜ್‌
ನನ್ನೆದೆಯಿಂದ ಹಾರಿ ಹೋದ ಹಕ್ಕಿ
ಅಂಚಿನಿಂದ ಉಲಿಯುತಿದೆ
ನೆಲತಪ್ಪಿದ ಹಕ್ಕಿಗೆ ನೆಲೆ ಒದಗಿಸಿದೆ ಗುಂಬಜ್‌
ನಿನಗಿದೋ ಪ್ರಣಾಮ

ಗುಂಬಜ್‌ ಇಳಿವಾಗ ಕಾಲಿಗೆ ಹರೆಯ
ಅವಳ ಕೈ ಹೆಗಲ ಮೇಲೆ ಆಸರೆಗೆಂದೇ..!
ಅವಳಿಗೂ ಜೀವ ಸಂಚಾರ
ಕೊರಡು ಕೊಸರುವ ಪರಿಗೆ ಇದು ದಿಬ್ಬ.

ಗುಂಬಗಳ ಬಿಟ್ಟು ಹಾರಿದ್ದ ಪಾರಿವಾಳಗಳು.
ಮರಳಿ ಗೂಡಿಗೆ ಸೇರುವ ಸಮಯ