ಜಲಮೂಲ ಸಂರಕ್ಷಣೆ ಮಹಿಳೆಯರ ಕಾಯಕ

ರಾಜ್ಯದಲ್ಲಿ ಒಂದೂ ನದಿ ಮೂಲ ಇಲ್ಲದ ಜಿಲ್ಲೆ ಕೋಲಾರ. ಇಲ್ಲಿನ ಶ್ರಮಜೀವಿ ರೈತರು ಮಳೆ, ಕೆರೆ, ಕೊಳವೆಬಾವಿ ನೀರನ್ನು ನಂಬಿಕೊಂಡೇ ಕೃಷಿಯಲ್ಲಿ ತೊಡಗಿಸಿಕೊಂಡಿದ್ದಾರೆ. ಬರಪೀಡಿತ, ಬಯಲುಸೀಮೆಯ ಈ ಜಿಲ್ಲೆಯಲ್ಲಿ ಒಂದು ಕಾಲದಲ್ಲಿ ನಾಲ್ಕೂವರೆ ಸಾವಿರಕ್ಕೂ ಅಧಿಕ ಕೆರೆಗಳಿದ್ದವು. ಕಾಲಾಂತರದಲ್ಲಿ ಈ ಸಂಖ್ಯೆ ತಗ್ಗುತ್ತಾ ಬರುತ್ತಿದ್ದು, ಇದೀಗ ಎರಡೂವರೆ ಸಾವಿರಕ್ಕೆ ಬಂದು ನಿಂತಿದೆ. ಇದಕ್ಕೆ ಕಾರಣ ಜೀವನಾಡಿಗಳಾಗಿರುವ ಕೆರೆಗಳತ್ತ ನಿರ್ಲಕ್ಷ್ಯ ಧೋರಣೆ, ಜೊತೆಗೆ ಬಲಾಢ್ಯರ ಒತ್ತುವರಿ. ಇದರಿಂದ ಜಿಲ್ಲೆಯ ಜನರು ಜಮೀನು ಪಾಳು ಬಿಟ್ಟು ಕೂಲಿ ಹುಡುಕಿಕೊಂಡು ನಿತ್ಯ ಬೆಂಗಳೂರಿಗೆ ಹೋಗಿಬರಬೇಕು.

ಕೆರೆಯೊಂದು ರೈತರ ಬದುಕನ್ನು ಮುನ್ನಡೆಸುತ್ತದೆ. ಜೀವರಾಶಿಗಳ ಹೊಟ್ಟೆ ತುಂಬಿಸುತ್ತದೆ. ಮರಗಿಡಗಳಿಗೆ ಉಸಿರು ತುಂಬುತ್ತದೆ. ಅದರಲ್ಲೂ ಕೋಲಾರ ಜಿಲ್ಲೆಯ ಜನರಿಗೆ ಕೆರೆಗಳೇ ದೇವರು, ಕೆರೆಗಳೇ ಅನ್ನದಾತ!

ಇಂಥ ಜಿಲ್ಲೆಯಲ್ಲಿ ಒಂದಿಷ್ಟು ಹಳ್ಳಿಗಳನ್ನು ಆಯ್ಕೆ ಮಾಡಿಕೊಂಡು ಕೆರೆಗಳ ಉಳಿವಿಗಾಗಿ, ಅವುಗಳ ಪುನಶ್ಚೇತನಕ್ಕಾಗಿ ಟೊಂಕಕಟ್ಟಿ ನಿಂತ ಸ್ವಯಂ ಸೇವಾ ಸಂಸ್ಥೆಗಳಲ್ಲಿ ‘ಆರೋಹಣ ಗ್ರಾಮೀಣಾಭಿವೃದ್ಧಿ ಸಂಸ್ಥೆ’ಯೂ ಒಂದು. ಗಾಂಧೀಜಿ ಕಂಡ ಗ್ರಾಮ ಸ್ವರಾಜ್ ಕನಸು, ಹಳ್ಳಿ ಅಭಿವೃದ್ಧಿಯಾದರೆ ದೇಶದ ಅಭಿವೃದ್ಧಿ, ಕೆರೆಗಳಿಂದಲೇ ನಾಡು ಎಂಬ ಮಾತಿನಲ್ಲಿ ನಂಬಿಕೆ ಇಟ್ಟು ಈ ಸಂಸ್ಥೆ ಕೆಲಸ ಮಾಡುತ್ತಿದೆ.

2020ರ ನಂತರವಷ್ಟೇ ಕೋಲಾರ ಜಿಲ್ಲೆಯ ಕೆರೆಗಳು ಭರ್ತಿಯಾಗಿದ್ದು. ಕೆ.ಸಿ.ವ್ಯಾಲಿ ಯೋಜನೆ ಕೂಡ ಇದಕ್ಕೊಂದು ಕಾರಣ. ಇದಕ್ಕೂ ಮೊದಲು ಮಳೆ ಇಲ್ಲದೆ ನೂರಾರು ಕೆರೆಗಳು ಬತ್ತಿ ಹೋಗಿದ್ದವು. ಹೀಗಾಗಿ, ಕೆರೆ ಅಂಗಳದಲ್ಲೇ ಕೊಳವೆಬಾವಿ ಕೊರೆಯಲಾಯಿತು. 1,500 ಅಡಿ ಕೊರೆದರೂ ನೀರು ಸಿಗುತ್ತಿರಲಿಲ್ಲ. ನೀರಿಗಾಗಿ ಜಿಲ್ಲೆಯ ಜನ ಪರದಾಡಿದ್ದು ಅಷ್ಟಿಷ್ಟಲ್ಲ. ನೀರು ಹುಡುಕಿಕೊಂಡು ಕುರಿ ಕಾಯುವವರು ಏಳೆಂಟು ಕಿಲೋಮೀಟರ್‌ ಹೋಗಬೇಕಿತ್ತು. ಶುದ್ಧ ಕುಡಿಯುವ ನೀರು ಈಗಲೂ ಮರೀಚಿಕೆಯಾಗಿದೆ.

ಕೆರೆಗಳತ್ತ ನೆಟ್ಟ ದೃಷ್ಟಿ

ಈ ಹಂತದಲ್ಲಿ ಕೆರೆಗಳು ಹೂಳು ತುಂಬಿಕೊಂಡು, ಕಳೆ ಬೆಳೆದು ಪಾಳುಬಿದ್ದವು. ಆಗ ಆರೋಹಣ ಸಂಸ್ಥೆಯ ಸದಸ್ಯರ ಕಣ್ಣು ಕೆರೆಗಳತ್ತ ನೆಟ್ಟಿತು. ಮುಳಬಾಗಿಲು ತಾಲ್ಲೂಕಿನ ಊರುಕುಂಟೆ ಮಿಟ್ಟೂರು ಗ್ರಾಮ ಪಂಚಾಯಿತಿ ವ್ಯಾಪ್ತಿಯ ಹಳ್ಳಿಗಳಲ್ಲಿ ಕೆರೆ ಅಭಿವೃದ್ಧಿಗೆ ಮುಂದಾದರು. ಇಲ್ಲಿನ ಇಪ್ಪತ್ತಾರು ಕೆರೆಗಳ ಸ್ಥಿತಿಗತಿಯನ್ನು ಪಟ್ಟಿ ಮಾಡಿಕೊಂಡು ಕೆಲಸ ಶುರು ಮಾಡಿದರು. ಜೊತೆಗೆ ಬಾವಿಗಳು, ಕಲ್ಯಾಣಿಗಳ ಪುನರುಜ್ಜೀವನಕ್ಕೆ ಮುಂದಾದರು. ಹದಿನಾಲ್ಕು ಕೆರೆ, ನಾಲ್ಕು ಕಲ್ಯಾಣಿ, ಆರು ಬಾವಿ ಹಾಗೂ ಹತ್ತಾರು ಕಾಲುವೆಗಳ ಹೂಳನ್ನು ತೆಗೆದಿದ್ದಾರೆ. ಹತ್ತು ಮನೆಗಳು ಹಾಗೂ ನಾಲ್ಕು ಶಾಲೆಗಳಲ್ಲಿ ಮಳೆ ನೀರು ಸಂಗ್ರಹಕ್ಕೆ ವ್ಯವಸ್ಥೆ ಮಾಡಿದ್ದಾರೆ. ಮಳೆ ನೀರು ಹರಿಯುವ ಕಾಲುವೆಗಳನ್ನು ಸ್ವಚ್ಛಗೊಳಿಸಿದ್ದಾರೆ. ಕೆರೆಗಳಿಂದ ತೆಗೆದ 48 ಸಾವಿರ ಟ್ರ್ಯಾಕ್ಟರ್‌ ಲೋಡ್‌ ಮಣ್ಣನ್ನು 400ಕ್ಕೂ ಅಧಿಕ ರೈತರು ಕೃಷಿ ಜಮೀನಿಗೆ ಬಳಸಿಕೊಂಡಿದ್ದಾರೆ. ಇದರಿಂದ ಉತ್ತಮ ಬೆಳೆಯನ್ನು ಕಂಡಿದ್ದಾರೆ. ಕೆರೆಯಲ್ಲಿ ಮೀನುಗಾರಿಕೆಗಾಗಿ ಟೆಂಡರ್‌ ನೀಡಿದ್ದು, ಗ್ರಾಮ ಪಂಚಾಯಿತಿಗೆ ಆದಾಯ ಬರುತ್ತಿದೆ.

ಗ್ರಾಮದಲ್ಲಿ ಈ ಎನ್‌ಜಿಒ ಕೈಗೆತ್ತಿಕೊಂಡಿದ್ದ ಕಾಲುವೆ ಹೂಳೆತ್ತುವ ಕಾಮಗಾರಿಯನ್ನು ಮಹಿಳೆಯರ ಕೈಯಲ್ಲೇ ಮಾಡಿಸಿರುವುದು ವಿಶೇಷ. ಈ ಕೆಲಸಕ್ಕೆ ಆಗ ಸಂಸ್ಥೆಯಿಂದ ನಿತ್ಯ ₹450 ಕೂಲಿ ಹಾಗೂ ಊಟ ಕೊಡಲಾಗಿತ್ತು. ಈಗ ₹ 500ಕ್ಕೆ ಏರಿಸಿದ್ದಾರೆ. ಕೂಲಿಯಿಂದ ಬರುವ ಹಣದಿಂದ ಹಲವು ಮಹಿಳೆಯರು ಸ್ವಾವಲಂಬಿಗಳಾಗಿದ್ದಾರೆ. ಕೆರೆ ಹೂಳೆತ್ತಲು ಮಾತ್ರ ಜೆಸಿಬಿ ಬಳಸಿಕೊಳ್ಳುತ್ತಾರೆ. ಈ ಸಂಸ್ಥೆಯಿಂದ ಈಗಲೂ ಹೂಳು ತೆಗೆದು ಕಾಲುವೆ ವಿಸ್ತರಿಸುವ ಕೆಲಸಕ್ಕೆ ಮಹಿಳಾ ಕಾರ್ಮಿಕರಿಗೆ ಆದ್ಯತೆ ನೀಡಲಾಗುತ್ತಿದೆ.

‘ಅಭಿವೃದ್ಧಿ ಕೆಲಸ ಮಾಡಲು ದಾನಿಗಳು ಬೇಕಾಗುತ್ತದೆ. ಕಂಪನಿಗಳನ್ನು ಹುಡುಕಿ, ಕಾಡಿಬೇಡಿ ಸಿಎಸ್‌ಆರ್‌ ಅನುದಾನ ತಂದು ಕೆಲಸ ಮಾಡಿದ್ದೇವೆ. ಗ್ರಾಮ ಪಂಚಾಯಿತಿಯಿಂದ ಅನುಮತಿ ಪಡೆದು ಜೆಸಿಬಿ ಬಳಸಿ ಹೂಳೆತ್ತುವ ಕೆಲಸ ಮಾಡಿದ್ದೇವೆ. ಮುಂದಿನ ಪೀಳಿಗೆಗೆ ಕೆರೆಗಳನ್ನು ಉಳಿಸುವುದು ನಮ್ಮ ಉದ್ದೇಶ. ಸ್ಥಳೀಯ ಸಂಸ್ಥೆಗಳು ಹಾಗೂ ಗ್ರಾಮಸ್ಥರು ಪೂರಕವಾಗಿ ಸ್ಪಂದಿಸಿದರು’ ಎಂದು ಸಂಸ್ಥೆಯ ಸಂಸ್ಥಾಪಕ ಕಾರ್ಯದರ್ಶಿ ಎಸ್‌.ಆಶಾ ಹೇಳುತ್ತಾರೆ.

ಪಿಚ್ಚಗುಂಟ್ಲಹಳ್ಳಿಯ ಹೊಸಕೆರೆ ಸುತ್ತಿನ ಭಾಗದಲ್ಲಿ ಹಿಂದೆ ಕೆಲವೇ ರೈತರು ಭತ್ತ ಬೆಳೆಯುತ್ತಿದ್ದರು. ಕೆರೆ ಪುನಶ್ಚೇತನದ ಬಳಿಕ 58 ರೈತರು ವರ್ಷಕ್ಕೆ ಎರಡು ಬೆಳೆ ಬೆಳೆಯುತ್ತಿದ್ದಾರೆ. ಪ್ರತಿ ಮನೆಯಲ್ಲಿ ಮೂರು ವರ್ಷಕ್ಕೆ ಆಗುವಷ್ಟು ಭತ್ತ ಸಂಗ್ರಹಿಸಿ ಉಳಿದಿದ್ದನ್ನು ಮಾರಾಟ ಮಾಡಿದ್ದಾರೆ. ಇನ್ನು ಮೂರು ವರ್ಷ ಬರ ಬಂದರೂ ಅವರಿಗೆ ಚಿಂತೆ ಇಲ್ಲ ಎನ್ನುವುದನ್ನು ಹೇಳಲು ಆಶಾ ಮರೆಯಲಿಲ್ಲ.

ತಮ್ಮ ತಮ್ಮ ಮನೆ ಮುಂದೆ ಎರಡೆರಡು ಹಣ್ಣಿನ ಗಿಡ ನೆಟ್ಟು ಬೆಳೆಸಲು ಮಹಿಳೆಯರಿಗೆ ಹೇಳಿದ್ದೇವೆ. ಊರು
ಕುಂಟೆ ಮಿಟ್ಟೂರು ಗ್ರಾಮ ಪಂಚಾಯಿತಿ ವ್ಯಾಪ್ತಿಯಲ್ಲಿ 1,225 ಮನೆಗಳಿದ್ದು, ಇಲ್ಲಿ ಈ ಕೆಲಸ ನಡೆಯುತ್ತಿದೆ. ಮೂರು ಕೆರೆ ಅಂಗಳದಲ್ಲಿ ಪಕ್ಷಿಗಳಿಗೆ ನೆರವಾಗುವ ಗಿಡ ನೆಟ್ಟು ಬೆಳೆಸುತ್ತಿದ್ದೇವೆ. ಕೆರೆಗಳ ಹೂಳು ತೆಗೆದಿದ್ದರಿಂದ ಅಂತರ್ಜಲ ಮಟ್ಟವೂ ಹೆಚ್ಚಾಗಿದೆ. ಕೃಷಿಯಿಂದ ದೂರ ಉಳಿದಿದ್ದ ರೈತರು ಮತ್ತೆ ಕೃಷಿ ಚಟುವಟಿಕೆಗಳಲ್ಲಿ ತೊಡಗಿದ್ದಾರೆ. ಜಾನುವಾರುಗಳಿಗೆ ಹಸಿರು ಮೇವು ಸಿಗುತ್ತಿದೆ. ಕುಡಿಯುವ ನೀರು ಕೂಡ ಸಿಗುತ್ತಿದೆ. ದೊಡ್ಡ ದೊಡ್ಡ ರೈತರು ವ್ಯವಸಾಯದಲ್ಲಿ ತೊಡಗಿದಾಗ ಹಳ್ಳಿಯ ಜನರಿಗೆ ಕೆಲಸವೂ ಸಿಕ್ಕಿತು. ಬೆಂಗಳೂರಿಗೆ ಕೂಲಿಗೆ ಹೋಗುವುದೂ ತಪ್ಪಿತು ಎಂದು ಸಂಸ್ಥೆ ಹೇಳುತ್ತದೆ.

ಮುಳಬಾಗಿಲು ನಗರಕ್ಕೆ ಹೋದರೆ ಕುಡಿಯಲು ಒಂದು ಲೋಟ ನೀರು ಕೂಡ ಸಿಗುವುದಿಲ್ಲ. ದುಡ್ಡು ಕೊಟ್ಟು ನೀರಿನ ಬಾಟಲಿ ಖರೀದಿಸಬೇಕು. ಹೀಗಾಗಿ, ನೀರಿನ ರಕ್ಷಣೆ ಅತ್ಯಗತ್ಯ. ಪಂಚಾಯಿತಿಗಳಲ್ಲಿ ನರೇಗಾದಲ್ಲಿ ಕೆಲಸ ಮಾಡಿಸಲು ಅವಕಾಶವಿದೆ. ಇದನ್ನು ಪರಿಣಾಮಕಾರಿಯಾಗಿ ಬಳಸಿಕೊಳ್ಳಬೇಕಿದೆ ಎಂದು ಆಶಾ ಹೇಳುತ್ತಾರೆ.

ಇಂಥ ಕೆಲಸಗಳ ಮೂಲಕ ಆರೋಹಣ ಸಂಸ್ಥೆ ಮಾದರಿಯಾಗಿದೆ. ಕೋಲಾರ ಭಾಗದಲ್ಲಿ ಕೆರೆಗಳ ಬಗ್ಗೆ ಜನರಿಗೆ ಅಪಾರ ಪ್ರೀತಿ. ಮೊದಲೇ ಹೇಳಿದಂತೆ ಕೆರೆಗಳು ಬದುಕು ಕಟ್ಟಿಕೊಟ್ಟಿವೆ. ಈ ಕೆರೆಗಳ ಮೇಲೆ ಜನಪದರು ಹಾಡು ಕಟ್ಟಿದ್ದು, ಜನ ಈಗಲೂ ಅವುಗಳನ್ನು ಗುನುಗುತ್ತಾರೆ. ರಾಜ್ಯದ ವಿವಿಧೆಡೆ ಜಲಾಶಯಗಳು ತುಂಬಿದಾಗ ಬಾಗಿನ ಅರ್ಪಿಸಲಾಗುತ್ತದೆ. ಆದರೆ ಕೋಲಾರ ಭಾಗದಲ್ಲಿ ಕೆರೆಗಳು ತುಂಬಿ ಕೋಡಿ ಬಿದ್ದಾಗ ದೀಪೋತ್ಸವ ನಡೆಯುತ್ತದೆ!

ಕೆಲವು ಮಹಿಳೆಯರ ಸಂಘಟಿತ ಪ್ರಯತ್ನದಿಂದ ಕೆರೆಗಳು, ಬಾವಿಗಳು, ಕಾಲುವೆಗಳಲ್ಲಿ ನೀರು ಕಾಣಿಸುತ್ತಿದೆ. ಹೀಗಿರುವಾಗ ಕೇವಲ ಪೂಜನೀಯ ಭಾವದಿಂದ ಕೆರೆಗಳನ್ನು ನೋಡಿದರೆ ಸಾಲು, ಜಲ ಮೂಲಗಳನ್ನು ಸಂರಕ್ಷಿಸುವ ಜವಾಬ್ದಾರಿಯನ್ನು ಎಲ್ಲರೂ ಹೊರಬೇಕಲ್ಲವೇ?

‘ಕೆರೆಗಳು ಹಳ್ಳಿಗಳ ಜೀವನಾಡಿ’

ನನ್ನ ತಾಯಿ ಮನೆ ಶಿವಮೊಗ್ಗ ಜಿಲ್ಲೆಯ ತೀರ್ಥಹಳ್ಳಿ. ಅಲ್ಲಿನ ಮಳೆ, ನದಿ, ತೊರೆ, ಹಸಿರು ನೋಡುತ್ತಾ ಬೆಳೆದಿದ್ದ ನನ್ನನ್ನು ಕೋಲಾರ ಜಿಲ್ಲೆಗೆ ಮದುವೆ ಮಾಡಿಕೊಟ್ಟರು. ಈ ಬಯಲುಸೀಮೆ ಜಿಲ್ಲೆಯಲ್ಲಿ ನೋಡಿದರೆ ನೀರೇ ಇಲ್ಲ. ಕೆರೆಗಳ ಜಿಲ್ಲೆ ಎನಿಸಿದರೂ ಮಳೆ ಇಲ್ಲದೆ ಬತ್ತಿ ಹೋಗಿದ್ದವು. ಈ ಪರಿಸ್ಥಿತಿ ನೋಡಿ ಸಂಕಟವಾಯಿತು. ಇರುವ ನೀರಿನ ಮೂಲಗಳನ್ನು ರಕ್ಷಣೆ ಮಾಡಬೇಕೆನಿಸಿತು. ಆ ನಂತರ ಸ್ವಯಂ ಸೇವಾ ಸಂಸ್ಥೆ ಕಟ್ಟಿ ನೀರು, ಮಣ್ಣು, ಹಸಿರೀಕರಣ ಕೆಲಸದಲ್ಲಿ ತೊಡಗಿದೆ.

ಕೆರೆಗಳು ಹಳ್ಳಿಗಳ ಜೀವನಾಡಿ. ಒಂದು ಕೆರೆ ಅಭಿವೃದ್ಧಿಯಾದರೆ ಇಡೀ ಹಳ್ಳಿಯೇ ಅಭಿವೃದ್ಧಿಯಾದಂತೆ. ಹೂಳು ತೆಗೆದು ಒಂದು ಕೆರೆ ಪುನಶ್ಚೇತನ ಮಾಡಿದರೆ ನೀರು ಹಿಡಿದಿಡುವ ಸಾಮರ್ಥ್ಯ ಹೆಚ್ಚಾಗುತ್ತದೆ. ಅಂತರ್ಜಲ ಮಟ್ಟ ಹೆಚ್ಚುತ್ತದೆ. ಫಲವತ್ತಾದ ಮಣ್ಣು ಸಿಗುತ್ತದೆ. ಸುತ್ತಲಿನ ಪ್ರದೇಶದ ಕೊಳವೆಬಾವಿಗಳಲ್ಲಿ ನೀರು ಹೆಚ್ಚಾಗುತ್ತದೆ. ಮೀನುಗಾರಿಕೆ ಮಾಡಬಹುದು. ಜೀವ ವೈವಿಧ್ಯಕ್ಕೆ ನೆರವಾಗುತ್ತದೆ.

ನಾವು ವಿವಿಧ ಕಂಪನಿಗಳು, ರೋಟರಿ ಕ್ಲಬ್‌ಗಳ ಸಿಎಸ್‌ಆರ್‌ ಅನುದಾನ ಪಡೆದು ಕೆಲಸ ಮಾಡುತ್ತಿದ್ದೇವೆ. ಲೆಕ್ಕಪತ್ರಗಳಲ್ಲಿ ಪಾರದರ್ಶಕತೆ ಕಾಯ್ದುಕೊಂಡಿದ್ದೇವೆ. ಹಲವರು ಅಡ್ಡಿ ಮಾಡಿದ್ದುಂಟು, ಅವ್ಯವಹಾರ ನಡೆಯಬಹುದೆಂದು ಅನುಮಾನ ಕೂಡ ವ್ಯಕ್ತಪಡಿಸುತ್ತಾರೆ. ಮಹಿಳೆಯರು ಏನು ಕೆಲಸ ಮಾಡುತ್ತಾರೆ ಎಂದು ಹೀಯಾಳಿಸಿ ಕಾಲೆಳೆದಿದ್ದೂ ಉಂಟು. ಆ ಎಲ್ಲಾ ಅಡೆತಡೆ, ಸವಾಲುಗಳೊಂದಿಗೆ ಕೆಲಸ ಮಾಡುತ್ತಿದ್ದೇವೆ.

-ಆಶಾ, ಆರೋಹಣ ಗ್ರಾಮೀಣಾಭಿವೃದ್ಧಿ ಸಂಸ್ಥೆ ಸಂಸ್ಥಾಪಕ ಕಾರ್ಯದರ್ಶಿ

ಮಹಿಳೆಯರೇ ಕಟ್ಟಿ ನಡೆಸುತ್ತಿರುವ ಎನ್‌ಜಿಒ

ಆರೋಹಣ ಗ್ರಾಮೀಣಾಭಿವೃದ್ಧಿ ಸಂಸ್ಥೆಯ ಆಡಳಿತ ಮಂಡಳಿಯಲ್ಲಿ ನಿರ್ದೇಶಕರಾಗಿ ಏಳು ಜನರಿದ್ದು, ಎಲ್ಲರೂ ಮಹಿಳೆಯರು ಎನ್ನುವುದು ವಿಶೇಷ. ಮಿಣಿಜೇನಹಳ್ಳಿಯ ಎಸ್‌.ಆಶಾ ಸಂಸ್ಥಾಪಕ ಕಾರ್ಯದರ್ಶಿ, ಕೋಲಾರ ತಾಲ್ಲೂಕಿನ ಶಿಲ್ಪಾ ಅಧ್ಯಕ್ಷೆ, ಮುಳಬಾಗಿಲು ನಗರದ ಶಾರದಾ ಖಜಾಂಚಿ. ಇನ್ನುಳಿದಂತೆ ಪ್ರಜ್ಞಾ, ಪ್ರೇಮಾವತಿ, ಪುಂಗೋಡಿ ಹಾಗೂ ಶೋಭಾ ನಿರ್ದೇಶಕರಾಗಿದ್ದಾರೆ.

‘ಇಂಡಿಯನ್ ವಾಟರ್‌ ವಾರಿಯರ್ಸ್’ ಪ್ರಶಸ್ತಿ ಸೇರಿದಂತೆ ಹಲವಾರು ಪ್ರಶಸ್ತಿಗಳು ಲಭಿಸಿವೆ.

ಆರೋಹಣ ಸಂಸ್ಥೆ ಮಾಡುತ್ತಿರುವ ಕೆಲಸವೇನು?

ಮಕ್ಕಳ ಸರ್ವಾಂಗೀಣ ಅಭಿವೃದ್ಧಿ, ಮಹಿಳೆಯರ ಆರೋಗ್ಯ ಹಾಗೂ ಆರ್ಥಿಕ ಸಬಲೀಕರಣ, ಪರಿಸರ ಸಂರಕ್ಷಣೆ ಆರೋಹಣ ಗ್ರಾಮೀಣಾಭಿವೃದ್ಧಿ ಸಂಸ್ಥೆಯ ಧ್ಯೇಯ. ನೀರು, ಮಣ್ಣು, ಹಸಿರೀಕರಣಕ್ಕೆ ಒತ್ತು ನೀಡುತ್ತಿದೆ. ಸ್ಥಳೀಯ ಸಂಸ್ಥೆಗಳ ಸಹಭಾಗಿತ್ವದಲ್ಲಿ ಕೆಲಸ ಮಾಡುತ್ತಿದೆ.

ಗ್ರಾಮಗಳ ಕೆರೆಗಳ ಸುತ್ತ ನೂರಾರು ಗಿಡ ನೆಡಲಾಗಿದೆ. ವಿವಿಧ ಸ್ತ್ರೀಶಕ್ತಿ ಸಂಘಗಳ ಸುಮಾರು 520 ಮಹಿಳೆಯರಿಗೆ ಸಪೋಟ, ಸೀಬೆ, ತೆಂಗು ಸೇರಿದಂತೆ ವಿವಿಧ ಸಸಿ ವಿತರಿಸಿ ಪ್ರತಿ ಮನೆ ಮುಂದೆ ನೆಡಬೇಕೆಂಬ ಯೋಜನೆ ರೂಪಿಸಿದೆ. 50 ಹೆಣ್ಣು ಮಕ್ಕಳಿಗೆ ಆರ್ಥಿಕ ಸಹಾಯ ನೀಡಿ ಅವರನ್ನು ಓದಿಸುವ ಜವಾಬ್ದಾರಿಯನ್ನೂ ಹೊಂದಿದೆ.

ಸರ್ಕಾರಿ ಶಾಲಾ ಕಾಲೇಜುಗಳ ಅಭಿವೃದ್ಧಿಯಲ್ಲೂ ಸಂಸ್ಥೆ ತೊಡಗಿಸಿಕೊಂಡಿದೆ. ಮುಳಬಾಗಿಲು ತಾಲ್ಲೂಕಿನ ಆವಣಿ, ತಾಯಲೂರು ಸೇರಿದಂತೆ ಹಲವು ಶಾಲಾ ಕಾಲೇಜುಗಳಿಗೆ ಟೇಬಲ್‌, ಕುರ್ಚಿ, ಕಂಪ್ಯೂಟರ್‌, ಗ್ರಂಥಾಲಯಕ್ಕೆ ಪುಸ್ತಕ, ಹಸಿರು ಫಲಕ, ಕಲಿಕಾ ಸಾಮಗ್ರಿ ನೀಡಿದೆ. ಕಂಪ್ಯೂಟರ್‌ ಪ್ರಯೋಗಾಲಯ ನಿರ್ಮಿಸಿ ಕೊಟ್ಟಿದೆ. ಅಂಗನವಾಡಿಗಳಿಗೆ ಆಟದ ಸಾಮಗ್ರಿ ನೀಡಿದೆ. ಮಹಿಳೆಯರಿಗೆ ಟೈಲರಿಂಗ್‌ ಯಂತ್ರಗಳನ್ನು ಕೊಟ್ಟಿದೆ. ಆರ್ಥಿಕ ಸಾಕ್ಷರತೆ ಕಾರ್ಯಕ್ರಮ ಹಮ್ಮಿಕೊಂಡಿದೆ. ಯುವತಿಯರು, ಮಹಿಳೆಯರ ಆರೋಗ್ಯ ಕಾಳಜಿ ಸಂಬಂಧ ಶಿಬಿರಗಳನ್ನು ಆಯೋಜಿಸುತ್ತಿದೆ. ವಾರ್ಡ್‌ ಹಾಗೂ ಗ್ರಾಮ ಸಭೆಗಳಲ್ಲಿ ಪಾಲ್ಗೊಳ್ಳುವ ಮಹತ್ವ ತಿಳಿಸುತ್ತಿದೆ.